Yus Kanta
Jáakur kúntutsja̱i̱ Yus seamu
Tawit kantamtikiatniun áaruiti.
41 Kuítrincha nuna waitnenniuka warasti.
Tuma asamtai itiurchat pujakuisha Uunt Yus yáiṉtatui.
2 Tura Uunt Yus wainiu asa ju̱ nuṉkanam waras pujusat tusa tsawantri̱n éketkattawai.
Tura nemasri̱ ní wakeramun túrawarat tusasha tsaṉkatkashtatui.
3 Kame jaak najaimiá tepamunmaya̱sha Uunt Yus ikiaká̱rtatui.
Tura ni jáamurmiya̱sha Amek ayap awajsattame.
4 Tura wi Yusan seakun “Uunt Yusá, Amiin yajauchin túraitjiai.
Túmaitkiuisha winia waitnentruram tsuárata” tímiajai.
5 Winia nemasrusha yajauch chichartuiniak
“¿Urutáiṉ jakasha meṉkakat?” turutainiawai.
6 Nuyá̱ iirsattsa káutruiniaksha wáitian ujatainiawai.
Túmainiak niṉki ni enentái̱n awajmamainiawai.
Tura a̱a̱ jíinkiar ántuiniamunam nu yajauchin paant awajainiawai.
7 Ashí winia nakitruinia nú iruntrar yajauch enentáimtursar chichartuiniak
8 “Tsuámarchamnia suṉkurja̱i̱ jaak peaknum teperusha
¿itiur péṉker ajastiṉki?” turutainiawai.
9 Winia tí peṉker amikiur péṉker enentáimtiniuj nu
tura wiji̱a̱i̱ yurumniu nuke íksaṉ nemasur ajasmai.
10 Túrasha Uunt Yusá Ame waitnentruram iniantuktia.
Túrutawakminkia wisha yapajmiáktaj.
11 Ju̱ja̱i̱ shiir enentáimtikruruitmena nuna nekaattajme
tura winia nemasrusha nupetkajai tusa kantamprutacharti.
12 Tuke nekas túratniua nuna túrati tusam tuke wáitkiaitme.
Túram Amiin eem tuke pujusat tusam najatamiame.
13 Uunt Yus Israera Yusri̱ tuke shiir awajsamu atí.
Tura uwir uwir núnisaṉ tuke ti shiir awajsamu atí.
Nekas nuke atí.