Yus Kanta
Tsaṉkurturat tusar Yus seatin
Tawit kantamtikiatniun áaruiti.
51 Yusá, ame timiá waitnenkartin asam waitnentrurta.
Áintsaṉ imiá péṉker asam winia tunaar tsaṉkurturta.
2 Winia yajauch túrutair japirturam
tunaarusha mash asaktúrata.
3 Warí, winia tunaarun wiki nekaamajai.
Tura tuke tunáa nekapmameajai.
4 Aya Aminí̱ tunaan túraitjiai.
Ame íimmianum yajauchin najanaitjiai.
Ame chichammeka nekasaiti tura nekasa nuja̱i̱ métek sumamtikniuitme.
Tuma asam Ámeka makuchminiaitme.*
5 Akiiniamiaj nuya̱ṉ yajauch túratniun akiiniaitjiai.
Wisha winia nukuruí̱ya̱ṉ tuke tunaarintin najanaruitjiai.
6 Iisiana, Ámeka nekasa nu wakerame.
Kame winia enentái̱rui̱ péṉkera nu túratin unuitiame.
7 Uruchji̱a̱i̱ japirtinia núnis tunaar japirturta.
Túrutawakmin enentái̱rui̱ṉkia michaja̱i̱ naṉkaamas puju ajastatjai.
8 Tura aṉkant awajtúsam tsaṉkurturum nu paant nekamtikruata.
Túrutawakmiṉkia ukunchur najamáinia ayamprutkartinia núnis warastatjai.
9 Winia tunaaruka, maa tí yajauch túramusha asakátruram
atakka enentáimturchamnia awajtúrsata.
10 Maa Yusá, aṉkant awajtúsam enentái̱r yapajtiurata.
Túram aya péṉkera nui̱ṉ tuke enentáimtikritia.
11 Aminí̱ya̱ ajaprua iniaitiusaip
tura Ame Péṉker Wakanmisha juruttsaipia.
12 Núnisaṉ ti nekasapi uwempraja tu enentáimsan warastaj.
Ame wáratáiram surusam ataksha ikiakátrata.
13 Túrutawakmiṉkia tunaarintin ainia nuna Ámiji̱a̱i̱ péṉker wekasatniun jintintiáwartatjai.
Antsu nui̱ṉkia Ámin umirtamkartatui.
14 Winia uwemtikrin Yusá, maṉkartuatin tsaṉkatrukaipia.
Nui̱ṉkia ame péṉker túrutairmin ti wararsan kantampruáttajme.
15 Uunt Yusá, Áminiu chichastin ataksha tsaṉkatrukta.
Nui̱ṉkia ame páantniurmin paant etserkattajai.
16 Warí winia yajauchir tsaṉkurturai tusan
wi taṉkun maan takamtsuk áesan amaakuisha Ámeka nakitraintme.*
17 Kame nékajai, Uunt Yus nekas wakeramuka ju̱i̱ti, taṉku áestuatniuja̱i̱ṉkia naṉkaamas tunáa shuar waantu enentáimtumatsuk tí tunaitjiai tu enentáimtumasat tusa wakerawai.
Tura ni tunaari̱ji̱a̱i̱ tí kuntuts nekapeak péejchach ajasua nuka Yusru, nakitchaitme.*
18 Kame Ame wakera asam Jerusaréṉ pépruka waitnentrata.
Túram kayaja̱i̱ tanishmartinia núnis péṉker wáinkiata.
19 Nui̱kia nekas péṉkeran túruiniak suramsartatna nuka
ashí áesturmainiakui shiir enentáimtusartatme.
Nuya̱ṉ ni murikrí̱n áesturmawartatui.*