Yus Kanta
Yajauch áishmaṉka iwiaakmari̱ náṉkatkamu
Etum aents Tuek Sáuran mamikmá núnis chicharuk “Tawit Awimiríkia je̱e̱n we pujawai” timia nui̱ jú̱naka Tawit áaruiti. Tura kantamniu úuntri̱ṉkia kitiarja̱i̱ tuntuiyatniuiti.
52 Maa kakaram áishmaṉká, ¿urukamtia ame yajauch túramna nuja̱i̱ waantu enentáimtumam?
Kame Yusa aneṉkrattairi̱ṉkia náṉkatkachuiti.
2 Ame iniaim yajauch anaṉkartutai chichammeka nawaj atsakamua núnisaiti.
3 Yajauchikia péṉkerja̱i̱ naṉkaamas anenaitme
tura naka chichataiji̱a̱i̱ naṉkaamas wáitriniaitme. (Séraj)
4 Iniái̱ anaṉkartiniá,
ántar ainia nu tura ashí chichammiji̱a̱i̱ emeskartin ainia nusha anenaitme.
5 Tuma asamtai áminkia Yus tuke emestamprattawai,
ame pujamna nuyá̱ achirmak ji̱i̱rmaktiatui.
Túrutma iwiaaku matsatáinia nuyá̱ juramsattawai. (Séraj)
6 Péṉker enentáimkia ainia nuka nuna iisar ashamkartatui.
Túrawar nin wishikiainiak jú̱nis tiártatui
7 “¡Paij jú̱ aishmaṉ iisiá! Yuska winia ejamtairuiti títinian nakitramai.
Antsu ní kuitri̱ tí nukap takakuya nunak enentáimtus
aya ní yajauchiri̱ni̱ṉ pujumai” tiártatui.
8 Túrasha wikia Yusa Uunt Je̱e̱nkia uriwiu samek kuku̱jraná ímiatrusan átatjai.
Uunt Yusa waitnenkartutairi̱nkia amuicha tuke ana nuna enentáimtustatjai.
9 Ashí túrin asakmin tuke shiir yumiṉsattajme.
Túran Ame náaram péṉker asamtai Ámin enentáimturma ainia nu pujuiniamunam nákastatjame.