Yus Kanta
Uunt Yus Israer shuaran uminiachunak waitnentramu
Asap kantamámu
78 Wí shuartiram, wi títiatjarmena nu anturtuktarum.
Tura winia chichamur nekas esettsa pujusrum antuktarum.
2 Métektaku chichamja̱i̱
yaunchu u̱kma ainia nuna enentáimsan paant ujaktatjarme.
3 Nu chichamka ii uuntri̱ ujatmákakrin antukar nékaitji.
4 Tuma asar ii shuari̱sha ujakártatji.
Túrar Uunt Yus shiir túramuri̱sha,
Ni kakarmari̱sha nuyá̱ ashí nekaachminian túramusha ii uchirí̱sha ú̱rkashtatji.
5 Israer shuar akupkámu chichaman umikiarat tusa
Uunt Yus Jakup shuarja̱i̱ chichaman najana
“atumí uchirí̱ unuimiárarat tusarum jintintiatarum” tímiayi.
6 Nuyá̱ ukunam akiiniawartatna nu ni uchirí̱ncha tura tiraṉki̱ncha
nuna nekaawar jintintiáwarat tusa túramiayi.
7 Kame ni túramuri̱n kajinmáttsuk
Nin enentáimtusar akupkámu chichaman
umikiarat tusa najanamiayi.
8 Ni we̱a̱tri̱ uruku armia núnin ti yajauch kajen
ní Yusri̱ncha nekas enentáimtichu ára̱i̱ṉ tusa
Uunt Yuska nu chichaman najanamiayi.
9 Eprain shuarka mesetan iwiarnatrar naṉkiji̱a̱i̱ tíshimkiuja̱i̱ wénayat
mániatin jeamtai pisarar waketrarmiayi.
10 Uunt Yus akupkámu chicham umiktarum timian
umichu ásar túrunawarmiayi.
11 Nekaska Uunt Yus yaunchu Israer shuar iimiainiamunam
aents túrachminian iniaktusarmia nuna kajinmatkiarmiayi.
12 Ejiptunam Suan péprunam Israera uuntri̱ iimiainiamunam
aentsti túrachminian untsurín tí shiiran iniaktusarmia nuka ju̱ áiniawai.
13 Nui̱ nayantsan jímiapetek akanák
kukach awajás Israer shuaran ikiati̱á̱rarmiayi.
14 Kati̱a̱rar wénakui tsawai̱kia yuraṉmin patatiarmiayi
tura káshikia ji keek tsáapnin ajasmatai we wéarmiayi.
15 Nui̱ wénakui Yuska kampuntin atsunumsha kayanmaya̱n jí̱i̱rkiar entsan árarmiayi.
Kame initia̱ entsan umararat tusa súsarmiayi.
16 Kayanmaya̱nak entsa tuke wainia nútikias akarmiayi.
17 Nu túramaitiataṉ nu arant tunáa túruiniak
kampuntin atsunum Ashí Naṉkamantu Yusan kajerkarmiayi.
18 Yurumkanka Yuska suíniamaitiataṉ ni wakeramun searmia nuja̱i̱
Yusan nekapsar akajkarmiayi.
19 Kame Uunt Yusan yajauch chicharainiak
“Kampuntin atsamunam ju̱í̱yash péṉker yurumkan ayurtamataji.”
20 Nu arant chichainiak
“Iiskua, kayá awatí entsá ji̱i̱r entsa tuke waa nútikiamai.
Túrasha yurumkancha namaṉnasha amastajiash” tiármiayi.
21 Israer shuar nuní̱ chichainiakui
Uunt Yus anturak ti kajerak jinia akuptuk asutiáwarmiayi.
22 Kame Yuska aṉkant awajkartusminiaiti
nekas tu enentáimtuscharmiayi.
23 78:23-24 Tuíniai̱ṉ yuraṉmin akupkámiayi tura nayaimpinmaya̱ waiti urati
maná yurumkan yurumáwarat tusa yumi yútana núnis núkap akuptuiniamaitiat.
25 Túmainiayat nú aentsush nayaimpinmaya̱ suntara yurumkari̱
yuáwar nútsurarmiayi.
26 Kame nuṉkaani̱ya̱n tura etsa̱ jintiainmaani̱ya̱n
Yus ni kakarmari̱ji̱a̱i̱ násenmamtikiamiayi.
27 Túrunamtai nanamtinniasha nuṉká ju̱yu̱ri̱
tura nayantsa náikmiri̱ya̱ tímiatrus akaketkarmiayi.
28 Nuap je̱a̱mkar matsamkamunam
yantam akaketkarmiayi.*
29 Kame ejemararat tusa tí nukap akaketkarmiayi.
Nuní̱ Uunt Yus Israer shuar wakeramun umirkamiayi.
30 Túrasha yuí yuiniayataṉ nútsuiniachkui
yurumá pujuinianak nu chichamtaik
31 Uunt Yus kajerak
Israer shuarnum peṉkeri̱ armia nuna ashí amutkarmiayi.
32 Nu túramsha nu arant tunaan túrawarmiayi.
Túmainiak Yusa túramuri̱ncha shiir enentáimtuscharmiayi.
33 Tuma ásarmatai untsurí uwí pujustinian tsaṉkatkacharmiayi
tura nu pujustinniasha ántar awajtus tí waitkiasarmiayi.
34 Kame Yus amuiniamka
Niin enentáimtuiniak ti seawarmiayi.
35 Túmainiak “Naṉkamantu Uunt Yusaiti.
Ii ejamtairi̱nti tura uwemtikkiartiniaiti” tiármiayi.
36 Túrasha nekas enentáiji̱a̱i̱ tuíniachu ásar
Yusan ántar páchiarmiayi.
37 Tura nekas enentáimtuiniachu ásar
Yus Ni shuari̱ja̱i̱ chícham najanamuncha tímiatrus umircharmiayi.
38 Tura ti yajauch enentáimiainianak
Uunt Yuska asuttsuk antsu waitnentar tunaari̱ncha tsaṉkuriarmiayi.
39 Warí, aentsu iwiaakmari̱ṉkia
nase umpuim naṉkaamana ántsaiti tu enentáimturmiayi.
40 ¡Maa, kampuntin atsunum urutmá yajauchiji̱a̱i̱ṉtsuk
Yusan kúntuts enentáimtikrarmia!
41 Ataksha Tunaarincha Yusan nekapáiniak
tunaan tí turuiniak akajiarmiayi.
42 Uunt Yus ni kakarmari̱ji̱a̱i̱ Ejiptunam ni nemasri̱ wáitkiatai pujuinian
aṉkant awajsarmia núnaka peṉké enentáimticharmiayi.
43 Kame Suan péprunam aents túrachminian iniakmasmiayi.
44 Tura umarara̱i̱ṉ tusa ashí entsan
aya númpak awajsámiayi.
45 Núnisaṉ anchi akuptúram ti mukuniarmiayi,
nuyá̱ mukuntcha ti yajauch awajiármiayi.
46 Tura maancha manchiji̱a̱i̱ ashí arakan amukarat tusa akuptúrmiayi.
47 Ántsaṉ michan akaketar ikiu
tura uwa arakmancha ashí emestukarmiayi.
48 Nuyá̱ umpururi̱ncha,
waakari̱ncha michan akaketar ashí amutkarmiayi.
49 Nuna tura tí kuntuts enentáimtikrarmiayi.
Tura kajek suir nekapeak
nayaimpinmaya̱ suntaran nu aentsun amukarat tusa akuptúkarmiayi.
50 Ti kajerkámuja̱i̱ tsaṉkurtsuk suṉkurja̱i̱ wáitsarti
tura jaaksha jákarti tusa tsaṉkatkarmiayi.
51 Tura Ejiptunmaya̱ aentsu uchirí̱ iwiá̱i̱ armia nuna ashí amutkarmiayi.
Kaama jutai̱ je̱e̱n emka yajutmarmia núnaka máwarmiayi.
52 Antsu murik jí̱i̱rtinia núnis Israer shuarnaka Ejiptu nuṉkanmaya̱ ji̱i̱r
kampuntin atsunumaani̱ yaruakmiayi.
53 Tura sapijmiakara̱i̱ṉ tusa péṉker wainiak yarummiayi.
Antsu ni nemasri̱ṉkia nayantsanam amuukarmiayi.
54 Nuna tura Israer shuar matsamkar Niin enentáimtusartin nainnium
Uunt Yus ni untsuuri̱ji̱a̱i̱ nupetmatkamia nui̱ ikiaankarmiayi.
55 Tura nuyá̱ aentsnaka ji̱i̱r ishiak
nu nuṉkan nakar Israer shuar tuke pujusárti tusa súsarmiayi.
56 Túramaitiat Israer shuarka Ashí Naṉkamantu Yusan nekapas íisarmiayi.
Tura akupkámu umiktin chichamnasha peṉké arantúkcharmiayi.
57 Tuma ásar ni aparí̱ yaunchu túrutainiak
Uunt Yusan kajinmatkiar umichu ajasár tséntsak tunirua núnikiarmiayi.
58 Túmainiak najanamu yus enentáimtutai̱niam irunainiak Yusan akajiarmiayi.
Tura ántar yusan najankar tikishmátainiakui ni Yusri̱ akasearmiayi.
59 Kame Yuska Israer shuar túruiniamun wainiak
ti kajek peṉké nakitrarmiayi.
60 Núnisaṉ Sírunmasha Yusa Je̱e̱n,
kame aentsja̱i̱ pujumia nu jutai̱ je̱a̱n ikiukmiayi.
61 Nuyá̱ achikiar yaruakarat tusa Yuska ni kakarmari̱n atanmiayi.
Tura ni páantniuri̱ncha nemasri̱n suá iniaisámiayi.*
62 Núnisaṉ Israer shuaran ti kajerak
puya̱ja̱i̱ mantamnawarti tusa nemasri̱n íktusarmiayi.
63 Tura áishmaṉ natsa armia nuka jiji̱a̱i̱ amuktinia núnis mesetnum mantamnawarmiayi.
Túrunawaruitkiui nuiṉkia nuatnainiakui warastincha peṉké atsumiayi.
64 Núnisaṉ Yúsnan pujurin armia nusha mesetnum jákarmiayi.
Túrunawarmatai waje̱sha ni aishri̱ aya̱shi̱n wáinkiacharu ásar kakantar úttinian tujintkiarmiayi.
65 Uunt Yuska kakarmari̱ji̱a̱i̱ shintiartinia núnis ni shuari̱n yáiṉtaj tusa,
kame aents kanaru shintiana ánis tura meseta unuimiátra karía umar atsantmar wea núnis juárkimiayi.
66 Túruna mesetnum nemasri̱n nupetak awakearar
tuke wishiktai̱ awajsarmiayi.
67 Jusé uchirí̱ Eprainia shuari̱nkia anaitsuk iniaisámiayi.
68 Antsu Jutá weanmaya̱
Seun nainnium pujuarmia nuna anea asa anaikiamiayi.
69 Núnisaṉ nayaimpisha tura nuṉkasha tímiatrusaṉ ainia núninian
Seun nainnium ni pujutái̱ri̱n tuke atí tusa je̱a̱mmiayi.
70 Nuyá̱ Uunt Yus murikiu wáinniun Tawitian winia takartin atí tusa anaikiamiayi.
71 Tura murik uchich waintiai̱ṉkia iniais
Israer shuara wáinin atí tusa apujsamiayi.
72 Kame Tawitkia esetar péṉker enentáimin asa
Israer shuaran tí peṉker wáinniuyayi.*