Yus Kanta

Tura Ame akantúkma Je̱e̱min arantutsuk ti yajauch awajsarai.

¡Túrawar Jerusaréṉnaka emeskar ikiukiarai!

 2 Ame takartámin ainia nuna aya̱shí̱nkia yaki̱ya̱ nanamtin yukartin ainia nuna ayurkamawarai.

Áminiak enentáimturmas pujú ainia nuna namaṉke̱ṉka nuṉkaya̱ yajasman ayurawaruiti.

 3 Ni numpe̱ncha entsaja̱i̱ métek Jerusaréṉka á̱a̱ri̱ṉkia ukararmai.

Tura iwiarsatniunka yáakesh atsumai.

 4 Iin ayatka pujuinia nu kajertamainiaji.

Tura iin téntatmak matsatna nu yajauch chicharsar nakumsa wishiktai̱ ajasji.

 5 Jiuwaá ¿urutma tsawanta kajeká pujustatam tura túkek kajektatam?

¿Ame akasmatairmeka ji kapá̱a̱ núniniak tuke átata?

 6 Ámin nekarmachu uunt nuṉka mátsatka ainia nui̱ tura

akupeamunam Ame náarmin páchiniatsna nui̱ Ame kajetáiram ukarta.

 7 Warí ni áiniawai Jakupa shuari̱nkia amukar

ni pépruri̱ncha emestukar aya jú̱nik awajsaruiti.

 8 Yaunchu ii we̱a̱tri̱ armia nuna tunaarí̱ enentáimtusam iin kajerkartukaip.

Ti pimpikir pujá asaakrin Ame waitnenkartutairmiji̱a̱i̱ wari iṉkiuṉkratkata.

 9 Iin uwemtikkiartin Yusá Ame náaram shiira nuja̱i̱ yáiṉkratkata.

Tura Yusá Ame náarmiji̱a̱i̱ aṉkant awajkartusam ii tunaarí̱sha tsaṉkurkarturta.

10 Yusan enentáimtichu ainia nu ¿Au Yusri̱sha tui̱ pujá? tíara̱i̱ṉ.

Yusna ainia nuna numpé̱ ukarmanum ¿itiur Yus yapajmiátkatniuit? nu iistai.

Yusan nékainiatsna nusha nisha nuna nekaawarat.

11 Achirar yaruakma ainia nu untsumas útmari̱ Ame anturkarta.

Ame kakarmarmiji̱a̱i̱ jákatniunam sumamtikiamu ainia nu uwemtikrata.

12 Jiuwaá Amincha timiá yajauch awajtámsaru ásarmatai iin ápatnik pujuinia nusha natsanmai̱ awajkarta.

Túram siati awenam yapajkiata.

13 Nuiṉkia iikia Amé shuartikia tura Ame murikrumea núnisar sá̱a̱knium matsasmatikia tuke shiir awajtiatji.

Yamaisha nuyá̱ ukunam pujuartatna ímianaisha Ámin tuke shiir awajtámainiak kantamprútmiartatji iisha.