Yus Kanta
Uunt Yusai̱ weankar péṉker wainkiamuitji
91 Uunt Yusai̱ weatka nuka
Ashí Tujintkiachu Yus ayamprúkma pujustatui.
2 Úunt Yusrun chicharkun “Winia ayamprutkatniumka tura ejatkatniumka Ameketme.
Tuma asakmin aya Áminiak enentáimtustiniaitjiame” títiatjai.
3 Warí aya Niṉki itiurchatnumia̱
tura ashí jakamnia suṉkurnumia̱ uwemtikramprattawai.
4 Tura atash uchichíri̱n wear etektus pujurna
áitkias pujurtamkui ejamtiatme.
Kame nekas chichamtin asa tantara ánis ayamprutmaktatui.
5 Kashi sapijmiakminia nu
tura tsawái̱ naṉki naṉkatamainiakuisha
6 núnismek kiritniunmaya̱ tura tsawai̱ya̱ jatai̱ suṉkur wekáa mantuawainti tusam ashamkaip.
7 Menaarmiiṉkia mir tura untsuurumiini̱ṉkia tias mir aents káutramkarsha
peṉké itiurtámkachartatui.
8 Tuma asamtai imia amek
Yusan enentáimtichu asutíniamusha wainkiattame.
9 “Uunt Yus nayaimpiniam pujana nuka winia ejatniuiti
tura winia ayamprutniuiti” tame.
10 Tau asam itiurchatcha wáinkiashtatme.
Núnisaṉ suṉkursha achirmákchattawai.
11 Tuma asa Uunt Yus ame tui̱ wekaittiam nui̱sha
ni suntari̱n waitmakarat tusa akuptúrmaktatui.
12 Áintsaṉ kayanam ajiintsumni̱ṉ
ni uwejé̱ja̱i̱ weṉkurmaktatui.*
13 Winia kakarmarja̱i̱ úunt ya̱wa̱sha tura uchirí̱sha nupetkattame
nuyá̱ najamin napisha najartatme tajai.
14 “Warí Winia anenta nuna uwemtikrattajai.
Tura Winia nekara núnaka naṉkamantu awajsattajai.
15 Tura ni seatkuiṉkia anturkan ái̱ktatjai.
Núnisaṉ ni waitia nui̱sha pujuru asan yáiṉkian páantin awajsattajai.
16 Nui̱ṉkia untsurí uwí iwiaaku pujustinian susattajai.
Túram Wi uwemtikramun nekáa warastatui” tawai Uunt Yus.*