Jíinkiarma

Yus ni kakarmari̱n iniakmasma

7 Nuyá̱ Uunt Yus Muisaisan chicharuk “Wi áminkia Parauṉ enentáimtusmaka yusa núnis awajsaitjiame. Nuyá̱ yátsum Araunka Parauṉkai̱ ame chichammin etserin átatui. 2 Tura ámeka Wi ashí títiatjamna nu ame yátsum Araun ujakta. Nuya̱ṉka ni Parauṉja̱i̱ Israer shuar Ejiptunmaya̱ ji̱i̱rar akupkarat tusa chichamprittiawai. 3 Ejiptunam aents túrachminian túrakun ti kakarman iniaktusartatjai túrasha Parauṉka enentái̱nkia ikiatsuátrattajai. 4 Túrasha Parauṉka atumniaka peṉké umirtamkashtatrume tura Ejiptunmaya̱ṉka kakaram asutiáwartatjai. Tura winia suntar, Israer shuar ainia núnaka ti naṉkamantu kakarmarja̱i̱ péṉkera nuna túrakun Ejiptunmaya̱ ji̱i̱rartatjai. 5 Wi Ejiptunmaya̱ aentsun kakaram asutiáwaran tura Israer shuar nui̱ pujuinia nuna ji̱i̱rarmatai nui̱ṉkia Ejiptunmaya̱ aents Wikia Úunt Yusaitjiana ju̱na nekarawartatui” tímiayi. 6 Nuya̱ṉka Muisais, Araunja̱i̱ Uunt Yus timia ímiatrusaṉ túrawarmiayi. 7 Kame Parauṉkan chichasarmia nui̱ṉkia Muisaiska uchaintia uwí takakuyayi tura Araunka uchaintitráis uwí takakuyayi.

Arauna wai̱ri̱

8 Uunt Yus Muisaisan Araunja̱i̱ chicharainiak 9 “Parauṉ chichartamuk ‘Aentsti túrachmin túrakrum iniakmastarum’ túramkurmincha Araun chicharkum ‘Parauṉ íimmianum wái̱ram aeprusam napi najanartatui’ titiá” tímiayi. 10 Muisaissha tura Arauncha Parauṉ pujamunam jeawar Yus timia ímiatrusaṉ túrawarmiayi. Tura Parauṉsha núnisaṉ ni takarniúri̱sha iimiainiamunam Araun ni wái̱ri̱n nuṉká aju̱a̱ram napi najanarmiayi. 11 Tura Parauṉka unuimiákuncha núnisaṉ uwishniuncha ikiankamiayi. Tura nisha ti neka ásar ni anaṉkartutairi̱ji̱a̱i̱ ímiatrusaṉ túruiniak 12 aṉkant aṉkant ni wái̱ri̱n nuṉká naṉkimiáwarmiayi. Túram napi najanakarmiayi. Túrasha Arauna wai̱ri̱ uwishniu wái̱ri̱n yuruawarmiayi. 13 Tura Uunt Yus nuik timia núnisaṉ Parauṉsha ni enentái̱n ikiatsuár Araunnasha tura Muisaisnasha peṉké anturkacharmiayi.

Emka asutkiaka entsa numpa ajasma

14 Nuya̱sha Uunt Yus Muisaisan chicharuk “Parauṉka enentái̱ tí katsuarmatai Israer shuaran akupratniun peṉké nakitiawai. 15 Túrasha kashin káshik Parauṉ entsá wéakui weritia. Túram Niru kaanmatkarin wai̱ napi najanarma nu takusam naka wajattsata. 16 Tura chicharkum ‘Uunt Yus, Israer shuara Yusri̱, amiin winia akattúr akuptak “Wi shuar kampuntin atsunum wéar winia tikishmátrurarat akupkarta” tímiaitiatam yamaiya̱ tímiaja̱i̱sha peṉké anturtukchame túramui’ titiá” tímiayi. 17 Tuma asamtai Uunt Yus jú̱nis tawai “Wikia Úunt Yusaitjiai tura ju̱ja̱i̱ nekarattame. Iistá, wi wai̱n takakjana ju̱ja̱i̱ Niru entsá awatmiatai numpa ajastatui. 18 Túruna namaksha ashí kajinmatai Nírusha ti meje̱ttawai. Túrunamtai Ejiptunmaya̱ aentssha entsan muí̱jiainiak umartinian tujintkiartatui” tímiayi.

19 Nuya̱ṉka Uunt Yus Muisaisan chicharuk “Araun chicharkum ‘Ejiptunam ashí entsa írunna nui̱ úuntri̱ncha, entsa akatai nuṉka táurmanumsha, entsa pajamtai ainia nui̱sha tura entsa yaraka ikiutai̱nmasha aya númpak ajasarat tusam ame wái̱ram nuní̱ iwiaiṉkiata. Nu túrawakmin entsa ikiutai̱ numiji̱a̱i̱ tura kayaja̱i̱ najanamunam entsa ainia tímianaisha Ejiptunmaṉka ashí aya númpak ajasártatui’ titiá” tímiayi. 20 Nuyá̱ Uunt Yus timia asa Muisaiska Araunja̱i̱ ímiatrusaṉ uminiak Parauṉsha tura ni takarniúri̱sha nui̱ matsatainiai̱ ni wái̱ri̱ji̱a̱i̱ Niru entsá awatim aya númpak ajasmiayi. 21 Túrunamtai Nírunam namak irunmia nusha kajinkiarmiayi. Tura entsasha ti meje̱e̱mtai Ejiptunmaya̱ aents nu entsan umartinian tujintkiarmiayi. Kame ashí Ejiptumaṉka entsa aya númpak ajasármiayi.

22 Tura Ejiptunmaya̱ uwishin pujuarmia nui̱ nú túramun wáinkiar ni anaṉkartutairi̱ji̱a̱i̱ nútiksaraṉ túrawarmiayi. Nuja̱i̱ Parauṉsha ni enentái̱ tí katsuram ajasu asa Uunt Yus timia núnisaṉ peṉké antukchamiayi. 23 Tuma asa Parauṉsha núnaka peṉké páchitsuk ni je̱e̱n waketkimiayi. 24 Ashí Ejiptunmaya̱ aents entsa úuntri̱ya̱ umarchamnia ajasmatai entsa umartin wáinkiatai tusar Niru entsá yantamach wa̱a̱n táukarmiayi. 25 Tura Uunt Yus Nírun awatim numpa awajsámia nuya̱ṉka siati tsawant naṉkaamasmiayi.