Jíinkiarma

Jímiar asutkiaka mukuntja̱i̱

8 Nuiṉkia Uunt Yus Muisaisan chicharuk “Parauṉ werim chicharkum ‘Uunt Yus chichaak “Wí shuar wéar Winia shiir awajtúsarat tusam akuprarta” tawai’ titiá. 2 Tura akupratin nakitiakminkia ashí nuṉkemín akupeam nui̱ mukuntja̱i̱ wáitkiastatjai. 3 Núnisaṉ Nírunmaṉka mukunt ti pampaṉ jíintrar ame je̱e̱min, tura kanutairmincha áintsaṉ ashí shuarumincha, ame takartámniu je̱e̱ncha tura paṉ najantairmincha utsanturmawartatui. 4 Nu mukuntcha amiin tura takartámniui̱sha tura ashí ame shuarumincha peetar ajartatui” tímiayi. 5 Nuyá̱ Uunt Yus Muisaisan chicharuk “Araun chicharkum ‘Ame wái̱ram ashí entsa ainia nuní̱ tura entsa akatai nuṉka táurmanumaani̱ núnisaṉ entsa pajamtai ainia nuní̱ iwiaiṉkiata. Túrawakmin mukunt entsaya̱ wárar Ejiptunam aya múkuntak piáktatui tawai’ titiá” tímiayi. 6 Nu tutai Arauncha ni wai̱ri̱ entsaani̱ iwiaiṉkiamtai entsaya̱ mukunt wárar Ejiptumaṉka aya múkuntak piákmiayi. 7 Nu túrunamtai uwishin nui̱ pujuarmia nusha, nisha ni anaṉkartutairi̱ji̱a̱i̱ nútiksaraṉ mukuntan entsaya̱n iwiarar Ejiptunam aya múkuntak awajsarmiayi.

8 Nuya̱ṉka Parauṉ Muisaisan tura Araunja̱i̱ untsukar chicharainiak “Waitneasrum winia je̱a̱ruí̱ya̱ tura wi shuarai̱ya̱ mukunt jíintrar shiákarat tusarum Uunt Yus seatritiarum. Tura wi tájarmena nu umirtukakrumni̱ṉkia Israer shuar ni Uunt Yusri̱n taṉkun máwar áestuiniak shiir awajúwarat tusan tsaṉkatkartatjai” tímiayi. 9 Nuna takui̱ Muisais Parauṉkan aya̱k “Amek uunt asam turuttia. ¿Urutái amiiya̱sha tura takartámniurmiya̱sha, shuarumiya̱sha nuyá̱ je̱e̱miya̱sha mukunt jíintrar entsan matsamsat tusancha Uunt Yusan seattiatjam?” 10 Tutai nisha “kashin seatritia” tímiayi. Nuna takui̱ Muisais Parauṉkan aya̱k “Ame wakeram nútiksanak Yusan seattiatjame. Kame chíkich Uunt Yus íi Yusri̱ji̱a̱i̱ métekka peṉké atsawai. Kame amesha nú nekaak tusan túrattajai. 11 Nuyá̱ Yusa seamtai ame je̱e̱miya̱ nuyá̱ takartámniurmiya̱sha tura ame shuarumiya̱sha mukuntka jíintrar Nírunmaṉ matsamsartatui” tímiayi. 12 Tura Muisais Araunja̱i̱ Parauṉkai̱ya̱ jíinkiarmiayi. Nuyá̱ Muisais Parauṉkai̱ mukunt akuprámun Uunt Yusan seatmiayi. 13 Túramtai Uunt Yus Muisais seamia nuna ímiatrusaṉ umíak mukunt je̱a̱ya̱sha tura á̱a̱ya̱sha núnisaṉ ajanmaya̱sha ashí kajinkiarmiayi. 14 Tura júukar irumpramusha káukar ashí Ejiptunmaṉka ti meje̱miayi. 15 Núnisaṉ nu itiurchatnumia̱ aṉkant ajas ataksha Parauṉka, Muisaisnasha Araunnasha anturtsuk Uunt Yus timia ímiatrusaṉ ni enentái̱n ikiatsuármiayi.

Menaint asutkiaka temaja̱i̱

16 Nuyá̱ Uunt Yus Muisaisan chicharuk “Araun chicharkum ame wái̱rmiji̱a̱i̱ nuṉka awattia túram Ejiptunam nuṉka ju̱yu̱ri̱ntiat tema najanakarat titiá” tímiayi. 17 Tura Arauncha túrata timia asa ímiatrusaṉ wái̱ri̱ji̱a̱i̱ nuṉká awatmiayi. Túram nuṉká ju̱yu̱ri̱ Ejiptunmaṉka tema najanak piak, aentsnasha tura taṉkuncha ti yajauch awajiármiayi. 18 Núnisaṉ uwishniusha ni anaṉkartutairiji̱a̱i̱ nútiksaraṉ túratai tukamá peṉké tujintkiarmiayi. Antsu temasha aentsnumsha tura taṉkunmasha ti pampaṉmiayi. 19 Tura uwishin nui̱ pujuarmia nu Parauṉkan chicharainiak “Jú̱naka ti nekas Yus jú̱tikiawai” tiármiayi. Nu tutaisha Parauṉka Uunt Yus timia ímiatrusaṉ ni enentái̱sha ti katsua̱rmiayi.

Kuatru asutkiaka anchiji̱a̱i̱

20 Ataksha Uunt Yus Muisaisan chicharuk “Kashin káshik Parauṉkai̱ wetá. Tura nisha entsá jeamtai chicharkum ‘Uunt Yus chichartamuk “Wi shuar wéar winia tikishmátrurarat tusa tsaṉkatkarti. 21 Warí Wi shuar jíintratin tsaṉkateachkumni̱ṉkia yuraṉkim ki̱arua ímiatrus anchin amiincha takartámniurmincha amé shuarumi je̱e̱ncha akuptúktatjame. Kame Ejiptunmaya̱ aentsu je̱e̱ncha núnisaṉ ashí Ejiptunam matsatainia nui̱ṉ ánchikia piáktatui. 22 Kame nú tsawantini̱ṉ wí shuar Kusennum pujuinia nui̱ṉkia anchi waya̱wara̱i̱ṉ tusan tsaṉkatkashtatjai. Nuní̱ túramtai Kusennumka Uunt Yus pujawai turutiarat tusan túrattajai. 23 Tura kashinkia wí shuarnaka aṉkant iniaiyakun antsu ame shuarumini̱ṉ aents túrachminian túrakun iniaktustatjai” tawai’ titiá” tímiayi.

24 Nuya̱ṉka Uunt Yus jú̱nis túramiayi. Parauṉka je̱e̱ncha tura ni takarniúri̱ je̱e̱ncha nuyá̱ ashí Ejiptunmasha yuraṉkim kia̱r winiana ímiatrus anchin ikiankamiayi. Nuja̱i̱ Ejiptusha ti yajauch awajnásmiayi. 25 Túrunamtai Parauṉ Muisaisan Araunja̱i̱ untsuk chicharuk “Werum atumí Yusri̱ taṉku maa áestakrum shiir awajutarum. Túrasha Ejiptunmaṉ túratarum” tímiayi. 26 Nu tutai Muisais aya̱k “Nuka iikia ju̱i̱ṉkia túrachminiaitji. Warí ii Yusri̱ shiir awajsatai tusar taṉku mátniuitji. Nuka Ejiptunmaya̱ aents íimmianum ni túrushtairi̱ túrakrin iin kayaja̱i̱ tukurmar mantamashtatjik. 27 Kame iikia kampuntin atsunum menaintiú tsawant wekasa jear ii Uunt Yusri̱ túramajnia nu ímiatrusrik túratniuitji” tímiayi.

28 Nuyá̱ Parauṉ chichaak “Uunt Yus atumí Yusri̱ atsunum tíjiu̱chik werum shiir awajsak tusan akupkáttajrume, tura winiasha seatritiarum” tímiayi. 29 Tura Muisais Parauṉkan aya̱k “Amesha, weri ii Yusri̱ shiir awajútin anaṉkartú ajashtatkumni̱ṉkia wi amiiya̱ jiinkí̱ wéakun Úunt Yusrun seattiatjame. Túram Nisha amiin tura takartámin pujuinia nui̱sha núnisaṉ amé shuarumincha anchi súrua súrua ajainia núnaka kashin emeṉkátramprartatui” tímiayi.

30 Nuya̱ṉka Muisais, Parauṉka je̱e̱ya̱ jiinkí̱ Uunt Yusan seatmiayi. 31 Túram Uunt Yus Muisais seamuri̱n anturak anchi súrua súrua ajainiamuka Parauṉka je̱e̱ncha tura ní shuari̱ya̱sha tura ashí aents pujuarmia nui̱sha chikichkisha júatsuk mash ajasmiayi. 32 Nu arant Parauṉ ni enentái̱n ikiatsuár Israer shuar wéara̱i̱ṉ tusa suritkiarmiayi.