Nekatai̱n Jintinkiartin

Uchi péṉkerka ni aparí̱n waramtikniuiti antsu uchi peṉké nétsea nuka nukurí̱ncha tí wáitkiaiti.

 2 Yajauchiniam kuit achiktinkia waramtikiartichuiti.

Antsu péṉker túratniuka jákatniunmaya̱ uwemtikiui.

 3 Uunt Yuska péṉkera túrinniaka tsukái wáitkiachuiti.

Antsu Yusan enentáimtichunka ní wakeramuri̱niak pujursa̱i̱ṉ tusa suritiawai.

 4 Shuar nakia nuka ti wárik kuítrincha ajawiti

antsu shuar ti takakmawa nuka ti wárik ni takatrí̱ji̱a̱i̱ kuítrintin ajawai.

 5 Kame uchi enentái̱ ajasua nuka aetak esat ai̱ṉ ni araamuri̱n juuk ikiuwiti

tura uchi nakia nuka júuktin ai̱ṉ aya kanú tepak aparí̱n natsan awajniuiti.

 6 Péṉkera túrinia núnaka Yus shiir pujutnum yúmiṉkiawai

túrasha Yusan enentáimtichuka aya yajauch awajkartustinniak chichainiawai.

 7 Péṉkeran túrinia nuka ni péṉkeri̱ji̱a̱i̱ṉ shiir enentáimtutai̱ átatui.

Antsu Yusan enentáimtichu ainia nuna náari̱nkia mui̱jmiai̱ enentáimtiartatui.

 8 Nekas enentáimias nékana nuka akupkámun umirniuiti

túrasha nétsea nuka ni waantu chichatairi̱ji̱a̱i̱ṉ emestumaiti.

 9 Péṉker enentáiji̱a̱i̱ wekaana nuka imiatík enentáimtumatsuk wekaawai.

Antsu umitmashím wekaana nuka ni túramuri̱n paant nekanattawai.

10 Nékayat mítsumsaṉ nékachu ajawa nuka kúntuts awajkartiniaiti.

Núnisaṉ nétsea nuka ni waantu chichatairi̱ji̱a̱i̱ṉ emestumaiti.

11 Péṉker chichamtinia nuka púkuninmaya̱ entsa iwiaaku átinian súana núnisaiti.

Antsu Yusan enentáimtichuka yutuumak péṉker chichawiti.

12 Shuar nuamtak kajernaiya nuka mániawai.

Antsu shuar aneṉkrattain takakna nuka yajauch awajnaitsuk aya tsaṉkurnainiaiti.

13 Neka nuka enentáimias chichawiti.

Antsu esetra enentáimsatniuja̱i̱ túrichua nuka asutniátniuiti.

14 Neka ainia nuka núna naṉkaamas unuimiaiti.

Antsu netse chichamtinkia mash emesmamniuiti.

15 Shuar kuítrinniuka ni kuítri̱ji̱a̱i̱ṉ ayamprumawiti

antsu kuítrinchaka itiurchata iṉkiuṉsha ayamprumakchamniaiti.

16 Péṉkera túrinkia iwiaakman wainkiattawai.

Antsu Yusan enentáimtichu túramuka yajauch asa tunaiti.

17 Chichaream ántinia nuka péṉker pujustatui.

Antsu chichareamsha ántichua nuka niṉki emesmamui.

18 Kajeayat nekasa tímiatrus péṉker chichaawa nuka wáitriniaiti.

Tura wekas áujmatkartinkia nétsete.

19 Ti áujmatsatniunmaṉka yajauch chichamka tunaaka támchaiti.

Antsu chichaataki̱ ajachua nuka péṉker enentáimniuiti.

20 Péṉkera túrinia nuna chichame̱ṉka kuítji̱a̱i̱sha naṉkaamasaiti.

Antsu Yusan enentáimtichu enentáimtairi̱ṉkia peṉké ántraiti.

21 Péṉkera túrinkia ni chichame̱ja̱i̱ untsurí aentsun ikiakáiniawai.

Antsu nétseka ní nekascharaṉ jáiniawai.

22 Tura Uunt Yusa péṉkeri̱ṉkia aentsu enentái̱ni̱i̱n kuítriniatniua núnis awajkartiniaiti.

Nuna túrak kúntuts enentáimtikiartichuiti.

23 Nétsea nuka yajauchin túraksha nakuwa áintsaṉ wararniuiti.

Antsu enentáimniua nuka nekatai̱ nekaatniun wararniuiti.

24 Yusan enentáimtichunka ni ashamamuk tarittiawai.

Antsu péṉker enentáimniua nuka ni wakeramuri̱ sunastatui.

25 Yusan enentáimtichuka uunt nase iniar wárik naṉkaamana áintsaṉ aya méṉkawai

tura péṉker enentáimniuka kayanam ukuamua núnis tuke pujutniuiti.

26 Shuar nakia nuka akupeam umíachuk akupeana nuna churuin esaitniuana

tura jinia mukuintiuri̱ ji̱nium eṉkeetniua nútikniuiti.

27 Uunt Yusan ashamainiak umirainia núnaka ni tsawantri̱ncha éketkartatui.

Antsu Yusan enentáimtichu ainia nuna tsawantri̱nkia wárik amutkartatui.

28 Péṉker enentáimin ainia nuka nákainia nuja̱i̱ warainiawai.

Antsu Yusan enentáimtichuka nákainia núnaka wáinkiachartatui.

29 Uunt Yus túramuka péṉker wekáa nuna ejamtairi̱nti

antsu yajauchi túrin ainia núnaka émesnartinia nuiti.

30 Yusan enentáimta nuka peṉké umuchkiachminiaiti

antsu Yusan enentáimtichuka ju̱ nuṉkanmaṉka tuke pujuschartatui.

31 Yusan enentáimtin ainia nuna chichame̱nka nekatai̱ji̱a̱i̱ kuku̱jrana ántsaiti

antsu yajauch chichamtinkia iniái̱ ukuinkia ajapruamua núnis juaku asa chichakchattawai.

32 Yusan enentáimtin ainia nuka antú ajamai chichawiti

tura nétsea nuka aya yájauchiniak áujmatniuiti.