Nekatai̱n Jintinkiartin
15 Kakaram chichastin atsakuiṉkia kajektinniasha emeṉkáwai
tura kakaram áimkiatin ákuiṉkia kajektinian nu arant awajui.
2 Neka shuara chichatairi̱ji̱a̱i̱ neka átin awai.
Antsu netse shuara wene̱ya̱ yajauch chicham tuke jiiniui.
3 Yus íimmiaka ashí nuṉkanam awai.
Yajauchincha tura péṉkernasha iyawai.
4 Shuar iniai̱ji̱a̱i̱ péṉker chichaawa nuka numi sameka áintsaiti
tura iniai̱ji̱a̱i̱ yajauch chichaawa nuka wakanniasha emesniuiti.
5 Shuara uchirí̱ netse ainia nuka ni aparí̱ chichame̱ncha nakitiawai
antsu péṉkera nuka ni aparí̱ chichame̱n esetas ánturu asa péṉker enentáimkia átatui.
6 Shuar péṉkera nuna je̱e̱ṉkia tí nukap awai
tura shuar yajauchia núnaka kuit ákusha yaya̱a̱tsui.
7 Shuar neka nuka ni nékamuri̱n chíkich shuaran ájameawai.
Núnisaṉ nétsea nuka ni enentáimmiaja̱i̱ íksaṉ nekatai̱n ajamastinian tujintiainiawai.
8 Yusan enentáimtichu shuar ainia nu súamunka Uunt Yuska muí̱jiawai.
Antsu Nin enentáimtuinia nu seamka waras ánturui.
9 Yus muí̱jiawai yajauch jintianam wekainia nú shuaran
antsu péṉker jintianam wekainia nú shuarnaka aneawai.
10 Shuar péṉker jintinmaitiat nakitniuka jakattawai.
11 Jaka matsamtai̱n tura emeskartinniasha Uunt Yuska imiá paant wáiniusha aentsu enentái̱ncha ¿itiur nekarashtiṉ?
12 Imiá katsekmak wishikiartiṉkia chicharea nunasha aneechuiti.
Tura neka ainia núja̱i̱sha tsanichuiti.
13 Enentai warakuiṉkia yapí shiir iira ajawiti
tura kúntuts nekapeamuja̱i̱ wakancha pimpíawai.
14 Péṉker enentáimniuka nekatai̱n e̱a̱witi.
Antsu enentáimcha wene̱ṉka aya yajauchiniak áujmatas yurumua núnis nekapniuiti.
15 Shuar wáitkiatai pujuwa núnaka ashí tsawant itiurchataiti.
Antsu waras pujuwa núnaka nampernum pujá núnisaiti.
16 Núkap takakainiachkusha tura Uunt Yusan arantuiniana nuka
kuítrintin itiurchat pujuinia núja̱i̱ṉkia naṉkaamas péṉker áiniawai.
17 Waaka nuerma namaṉke̱ péṉker iwiaramun kajernaishim yurumáinia núja̱i̱ṉkia
aya ápatkuk anenaisar yurumma imiá péṉkeraiti.
18 Shuar wárik kajena nuka mániawai
antsu wárik kajechua nuka mánaiktinian enentáimchaiti.
19 Shuar nakia nuna jínti̱ṉkia jaṉki irumpramua áintsaiti.
Antsu ásumpi jínti̱ṉkia ti péṉker waṉkarmaiti.
20 Uchi péṉker enentáimniuka ni aparí̱n waramtikniuiti
tura nétseka ni nukurí̱ncha waramtikchaiti.
21 Shuar peṉké enentáincha nuka ni yajauchiri̱niak wararniuiti
tura neka nuka ni enentái̱n esetar wekainiuiti.
22 Jintinkiartin atsakuiṉkia enentáimpramu umintsui.
Antsu untsurí shuar tuíniamuja̱i̱ nekasaiti tíminiaiti.
23 Shuar ni chichame̱ja̱i̱ péṉker antumtikiaṉka warawiti.
¡Maa, nu chichamka imiá péṉkershata!
24 Nuṉká jaka matsamtai̱niam we̱e̱j tusa
neka nuka yakini̱ní̱ jeatin jintianmaani̱ wéawai.
25 Shuar waantu enentáimtuma nuna je̱e̱nka Yus emestiniaiti
antsu wajé̱ nuṉke̱n imiankaska péṉker wáitniuiti.
26 Yajauch shuar ainia nuna enentáimmiari̱ṉ Uunt Yus muí̱jniuiti
tura péṉker shuaran chichame̱nka wararniuiti.
27 Kasamshim ni warirí̱n tí nukap takustaj tusa súrinia nuka ni shuari̱miak emestumaiti.
Antsu yajauch túratniunam útsuakur akiktaj tutai nakitniuka aṉkant pujuwiti.
28 Péṉker shuara nuka áimtsuk emka enentáimnuiti.
Tura Yusan enentáimtichuka aya yajauchiniak chichawiti.
29 Nin enentáimtichu ainia nuyá̱ Uunt Yuska arant pujuwiti.
Túrasha péṉkera túrin ainia nu seamka anturniuiti.
30 Tsáapninnium íimsatniusha enentáin waramtikniuiti
tura péṉker chichamsha íkiakar waramtikiartiniaiti.
31 Iwiaaku pujustin chicham chichaream antukua nuka
nisha neka shuar matsatainia nui̱ pujusártiniaiti.
32 Shuar jintintiáttsa chicharmaitiat nakitniuka niṉki nakitmamnuiti.
Antsu chicharam esetar ántinia nuka nékaiti.
33 Yusa naari̱ shiir awajsatniuka ti neka átinian jintinkiartiniaiti.
Tura shiir awajtin árat tákurkia emka péejchach átiniaiti.