Anenaitiai̱ Kanta
Áishmaṉ anajmarmari̱n aujma
5 “Maa umaru, winia nua̱ru wisha ajaruí̱ támajai.
Tura mira kuṉkuinniasha tura chíkich kuṉkuinniasha júurmakmajai. Tura chininiuncha tura míshkincha winianak umararmajai.
Núnisnak winia wíniurnak muntsuncha umararjai.”
Jerusaréṉnumia̱ natsach kantamáwarma
“Maa winia amikru yurumátarum tura núkap umartarum aneamurtiram.”
Nuwa̱ áishmaṉ wéakui kúntuts nekapma
2 “Wikia kanimjiai túrasha winia enentái̱rka iwiaamiayi.
Untsumna nuka winia aneamuru chichame̱nchukait.
‘Winia ekentru, winia aneamuru winia yampitschiru eteṉmas enentáimniu aya wíniak uratritia.
Warí winia muukarnaka sana ukatkayi.
Tura ashí mash intiashruka kashi wekaamuja̱i̱ jíiniarai.’
3 ¡Wikia entsatáirnaka áimiarjai!
¿Itiurak ataksha entsartaj?
¡Áintsanak nawernasha nijiararjai!
¿Núnasha itiurak wapik awajsataj?
4 Tura winia aneamurka áṉkamunmaani̱ uwejé̱n awaintiurayi.
Túrutamtai winia enentái̱rui̱ purushnirmajai.
5 Tura winia aneamurun waiti urattiaj tusan wisha nantakmiajai.
Tura uwejrusha uratai̱ncha achíakui tura tsara uwejruí̱ya̱ mira kúṉkuiniak ajattsamai.
6 Wisha aneamurnasha uratmiajai.
Túrasha winia aneamurka weuyi, yaunchu naṉkaamakniuyi.
Ni chichame̱ úkuri̱n winia wakantrusha pataatukmai.
E̱a̱knasha wáinkiachmajai.
Untsukmasha ái̱rkachmai.
7 Uunt péprun téntak iin ainia nusha wáitkiarmiayi. Tura awatturarmai tura ijiutiarmai.
Wenukan iincha pátatek nukumakmancha jurutkiarmai.
8 Jerusaréṉnumia̱ nuwa̱ch natsatirmin nekas seajrume winia aneamur wainkiarmeka aneṉkratakun jaajai ujatruktarum.”
Jerusaréṉnumia̱ natsach kantamáwarma
9 “Ámeka, chikichja̱i̱ naṉkaamas shíirmaitme,
¿uruku asampa ame aneamurmesha chíkich áishmaṉja̱i̱ ainia núja̱i̱sha naṉkaamassha shíirmait?
¿Tura uruku asamtai ame aneamurmeka chíkich aneamuja̱i̱ iniaṉkassha e̱a̱ktincha seakratam? tukartikia.”
Nuwa̱ tama
10 “Winia aneamurka puapuat tura kapantakuiti.
Tias mir áishmaṉnum íismasha naṉkamantu páantniuiti.
11 Muuke̱nka nekas kuria tímianaiti.
Ni intiashi̱nkia shíirim mukusasha shanashná ániuiti.
12 Jí̱chiri̱, ashintsa entsari̱n yámpits muntsuja̱i̱ nijiamauwa timianú puju íirkaiti.
Nisha shíirmach kaya ekentramu núnis shiir íimtiniaiti.
13 Mishachiri̱ṉkia nuṉkach uchichiniam kuṉkuin kuku̱j arakar juutia núniniaiti.
Wene̱chiri̱ṉkia ririu entsachia ánin kitiak kúnkun mira ajana tímianaiti.
14 Uwejé̱nka uwejnum awetai̱ kuri jasintuja̱i̱ eṉkerma ániuiti.
Ni aya̱shi̱nkia yajasma wajiṉki̱ji̱a̱i̱ tura sapirua núniniaiti.
15 Mákui̱ṉkia mármur pau puju kayaja̱i̱ najanamu aya kúrinmaṉ ukuamua tímianu áiniawai.
Ríwianu sétur numi achikma núnis ni yapi̱nkia wakerú ajamainti.
16 Kayakpatrumka ti yuminiaiti. Ashí wakerú ajamainti.
Jerusaréṉnumia̱ natsachiá, nisha winia nekas aneamurka, nisha winia nekas wakeramurka níyaiti.”