Jirimías

1 Ju̱ka Irkíasa uchirí̱ Yúsnan pujurin Jirimías Piṉjiamín nuṉkanam Anatút peprunam Yúsnan pujurin pujuarmia nuna chichame̱nte. 2 Kame Amuna uchirí̱ Jusías Jutá nuṉkanam akupin ajas traise uwí pujamunam Uunt Yusa chichame̱ Jirimíasan tarimiayi. 3 Núnisaṉ Jusíasa uchirí̱ Juasim Jutanam akupin ajas pujumia nui̱sha tura Jusíasa uchirí̱ Setekías Jutanam akupin ajas aunse uwí pujamunam nu uwí amúamunam nántuka séṉkutin Jerusaréṉnumia̱ aentsun achirar yajá yaruakarmia tímianaisha Yusa chichame̱ Jirimíasan tarimiayi.

Jirimías untsúamu

4 Nuya̱ṉka Uunt Yus chichartak 5 “Wikia nukui̱ṉkia najantsuk áminkia nekaamjame núnisnak akiintsumni̱ṉ Winia atí tusan akankámiajme. Tura ashí uunt nuṉka mátsatkamu áiniana nui̱ Winia chichamprun etserin atí tusan anaikiamiajme” turutmiayi. 6 Túrutkui chichaakun “Maa winia Uunt Yusá wisha uchi asan péṉker chichastinian jeatsjai” timiajai. 7 Tutai Uunt Yus chichartak “Wikia úchitjiai. Péṉker chichaktinian jeatsjai turutip. Antsu ashí Wi akuptiatjamna nui̱ wétatme túram ashí Wi títiatjamna nuke chichaktatme. 8 Túrasha nu aentska ashamkaip. Warí Wi ámiji̱a̱i̱ṉkia pujá asan Wiki uwemtikrattajme” turutmiai Uunt Yus. 9 Nuya̱ṉka Uunt Yus uwejé̱n iwiaintiurak wenurun ántiṉ chichartak “Pai, yamaiya̱ ju̱yá̱ ame chichaktatmena nuna Winia chichamprun amaajai” turutmiai. 10 “Tura ju̱ nekaata. Ashí nuṉkanam tura uunt nuṉka mátsatkamu ainia nui̱ tsuriarar tsai̱ tsai̱ awajsatniun áitkiasrik emeskar amuktinian núnisrik je̱a̱mkar arakmaktinian yamái ju̱ tsawant ánaiyajme” turutmiai.

Armintru wai̱ ímiaja̱i̱k wainkiamu

11 Nuya̱ṉka Uunt Yus chichartak “¿Warí wáiniam Jirimíasá?” turutmiai. Takui̱ ayakun “Armintru numí wai̱ najanamun wainjiai” tímiajai. 12 Tutai Uunt Yus chichartak “Nekas tame. Warí Wikia Winia chichamur uminkiat tusan iisan pujajai” tímiayi.

Ichiṉnanam kuá ímiaja̱i̱k wainkiamu

13 Nuyá̱ Uunt Yus ataksha chichartak “¿Warí wáiniam?” túrutkui “Ichiṉkian kuá araki̱a̱ ukanártaj tusa yantak eketun wainjiai” tímiajai. 14 Tutai Uunt Yus chichartak “Ju̱ nuṉkanam pujuinia núnaka araki̱a̱ ti itiurchatja̱i̱ ashí aentsun wáitkiasartatui. 15 Tura wi Uunt Yus asan araki̱a̱ akupin ainia nuna ashí untsukartatjai. Nu akupniúsha káunkar Jerusaréṉka wáitiri̱n núnisaṉ wenuke̱ kayaja̱i̱ téntakma ainia nui̱ nuyá̱ Jutanam pepru ainia nui̱sha ni akupkur pujutái̱rtiuk ashí matsamtúkartatui. 16 Nútiksanak Winia iniaitiusar ántar yusan ní najanamunak shiir awajainiak kuṉkuinian áestuawar tikishmátainiak ashí yajauchin túrawaru ásarmatai sumamtikiawaran asutniáwarti títiatjai. 17 Pai, yamaikia weme Wi títiatjamna nu etserkatin iwiarnarta. Túrasha pujuiniakuisha sapijmiakaip. Núja̱i̱nchuka ni pujuiniamunam íksanak ámin sapijmiamtiki̱a̱i̱jiam. 18 Warí Jutanmaya̱ shuar nuyá̱ ni uuntri̱ tura ni yusri̱ takarniúri̱sha núnisaṉ ashí nuṉkanmaya̱ pepru ainia nu iismasha pepru wenuke̱ iwiartukar eṉkear utúachmin awajsamua núnin tura namincha jiruja̱i̱ pau najanamua ánin núnisnak náṉkamas aents waya̱wara̱i̱ṉ tusar wénuk yaṉkú jiruja̱i̱ najanamua núnin Wi áminkia awajsaitjiame. 19 Núnisaṉ ámiji̱a̱i̱sha mánaikiartatui túrasha Wi ámin uwemtikrattsan pujá asamtai peṉké nupettamkachartatui” tawai Uunt Yus.