Jirimías
Jutá túrunatin etserkamu
2 Uunt Yus winia chichartak turutmiayi 2 “Jerusaréṉ péprunam weme ántuiniamunam kakantram chicharainiakum Uunt Yus chichartak ‘Áminkia tuke enentáimtajme. Natsa asamka péṉker enentáimtursamiame. Anajmarma aneṉkrata núnisam kampuntin atsú nuṉkanam arakmamusha atsuiniamunmasha péṉker enentáimtursam nemartusam wekasamiame. 3 Kame Israerka Uunt Yus íktusmauyayi tuma asa araka peṉkeri̱ eem juukma tímianuyayi. Tura Israer shuaran yajauch awajiarma nuka ashí sumamawar nisha nú yajauchik íktukma armai tawai’ tímiayi” turutmiayi.
4 Wats, ashí Israer shuartiram Jakupa uchirí̱ya̱itrumna nu Uunt Yusa chichame̱ antuktarum. 5 Uunt Yus chichartak “Átum Wini̱i̱ya̱ kanakrum antra nú werakrum atumsha ántar ajasúk tusasha atumí uuntri̱ armia nusha ¿warí yajauchinia Wini̱i̱ya̱ncha wáinkiarma? 6 Núnisaṉ Ejiptunmaya̱ yarurmak atsamunam aya ju̱ju̱ptinniumaṉ kíritniunmaṉ wa̱a̱ írunmanum áentskesha nuiṉkia pujushtai̱niam tura wekachatai̱nmaani̱ juramkimiajnia nu Uunt Yussha ¿tui̱ pujá? turutchamkarum. 7 Tura ashí írunna nu núnisaṉ péṉker yurumak yuámniuram tusan péṉker nuṉkanam atumniaka ikiankamjarme. Túramaitiatrum Winia nuṉkar átum amastinian anajmatramiajrumna nu yajauch mui̱jmiai̱ awajsarume. 8 Yúsnan pujurniusha Uunt Yussha ¿tui̱ pujá? turutcharmai. Tura akupkámu umiktin chichaman nékainiasha nekaracharmai. Murikiu wáinin arma nusha Wíniaka nakitruiniak kajertukarmai. Núnisaṉ Yúsnan etserin arma nusha Paara náari̱ji̱a̱i̱ etserkarmai. Túmainiak antra nuna e̱a̱karmai.
9 Tuma asamtai atumji̱a̱i̱sha tura atumí uchirí̱ji̱a̱i̱sha núnisaṉ atumí tiraṉki̱ji̱a̱i̱sha tuke mánaiktatjai” tawai Uunt Yus. 10 Tura Kitim nuṉka* pakari̱ni̱ naṉkaamakrum íimsatarum. Tura Ketar péprunam yaaksha akupkatarum túrarum nu émamkesrum enentáimtustarum. Wats atumsha niji̱a̱i̱ métekeash túraitrum iistarum. 11 Warí uunt nuṉka mátsatka áiniana nu chikichkisha ni yusri̱ nekascha yus ainia nuna ¿yapaji̱áwaruk ainia? Túrasha Winia péprurka ni páantniuri̱nkia iniaisar antra nuna enentáimtuiniawai. 12 Tuma asamtai “Nayaimpitirmesha, nú túramunam ausháa tákuram tí sapijmiakrum kuraṉtarum. 13 Warí Winia shuaruka jimiará yajauchin túrawaruiti. Wikia iwiaaku entsa saar púkunitjiana* núnaka iniaitiusar niṉki entsa pajamtai chiṉkiara asa entsasha pajamchan najatmakaruiti” tawai Uunt Yus.
14 Nuikia Israerka emetamu íniakur wáitkiatai ¿nuí̱ṉkik akiniait núja̱i̱nchuka sumakmakait? ¿Enta urukamtai aṉkant wekainia achikia emetamua núnikiara? 15 Úunt ya̱wa̱ uchirí̱ṉkia Israeran weruiniak júrur ajainiawai. Úunt ya̱wa̱ shiniakui antukar Israer nuṉkaka aya jú̱nik ajasárai. Tura pépruri̱sha ekemátramu ásar shuari̱sha atsá aya jú̱nik juákarai. 16 Warí, Mímpis péprunmaya̱ aents tura Tápnis péprunmaya̱ aents atumí muuke̱n tsairtamkachurmek. 17 Kame átumka péṉker jintianmaani̱ juamaitiatrum atumí Uunt Yusri̱ ajapa iniaisa ¿asarmechuk túrunaitrum? 18 Túrasha Ejiptunmaya̱ túruiniamusha atumsha ¿warí íistiniaitrum Nírunmaya̱ entsa úmiartincha? Ántsarmek Asirianmaya̱ túruiniamusha atumsha ¿warí íistiniaitrum Yúpratis entsa úmiartincha? 19 Ame yajauchirmek asuttiámattawai. Yus enentáimtamuka ántraiti támena nuke áminkia surutmaktatui. Wats iisam nekaata. Atumí Uuntri̱ Uunt Yus ashamtsuk iniaisatniusha ¿urutmá yajauchikit tura urutmá yapaakit? tawai Ashí Akupniu Uuntri̱ Uunt Yus.
20 Warí ámeka tí yaunchuya̱ṉ nuṉka pukutai̱ netuamun waaka nakitiak kupir jiṉkiarmári̱ncha tsuriar ikiuana núnismek amesha túramame. Tura chichaakum “Peṉké umirkashtatjai” tímiame. Tú takum aya̱shí̱n súrin nuwa̱ urukainia núnisam ashí naint tura ashí numi ukat ukatin ainia nui̱ ámeka tepekní̱ wekaimiame. 21 Kame Wikia tí peṉker árak asakmin tí peṉker uwa ati tusan araamjame. Túramatiatmesha ¿urukamtaitsuk yajauch uwa núnikmesha muímprasha ajasum? 22 Uunt Yus ii Yusri̱ chichaak “Rijiaja̱i̱ nijiamakum japuṉ amuka amuka íkkiumesh tunaarumka Winia ji̱rui̱nia̱ṉka peṉké sakarchattawak. 23 Kame ¿itiura wikia mui̱jmiainkia ajakchaitjiai tura Páarnasha peṉké enentáimtuschaitjiai tíminiaitiam? Wats pakanam túramamna nu enentáimsam náṉkamas wekain kamiyuch nekasapitia titiá. 24 Kampunniunmaya̱ umpuru atsamunmaṉ pujutan unuimiátra ni wakeramun umíak máyai̱ya̱ núnis wekaikiní̱ ajawa núnisaitme. Kame numpareakui̱sha yaki emetat. Ashí e̱a̱iniaka yawe̱tsuk wáinkiartatui. 25 Náwek wekasa̱i̱j tura kitiamtánash kitiami̱j tusam anearta. Túrasha chichaakum ‘Atsá nuka péṉkerchaiti warí yajaya̱ aents nékashtai̱ ainia nunasha anenajai. Tuma asan ni wénakui wisha pataakattajai’ tímiame.
26 Kasa kasamú pujá wainkiam natsamana núnisar Israernumia̱ṉka úunt akupniusha unuimiákarusha tura Yúsnan pujurin áiniasha núnisaraṉ Yúsnan etserin áiniasha 27 numin chicharainiak ‘Ámeka ii aparí̱nme tura kayan amiiya̱ iikia akiinkiaruitji’ tuinia nuka natsa̱a̱rartatui. Warí Winia tuntuprua iniaitiusar íirsatniuncha nakitruiniawai. Túrasha itiurchat pujuiniakka ‘Yáiṉkiam aṉkant awajtústa’ turutainiawai. 28 Túrasha átum najatmamkamarumna nú yussha ¿tui̱ pujuinia? Atumí itiurchatri̱ya̱ṉka nú yus yáintmak aṉkant awajtámsarti. Warí Jutá atumíin urutmá pepru ainia nuja̱i̱ métek atumí yusri̱sha írunui. 29 Tuma ai̱sha ¿urukamtai Winiasha kajertarum? Warí Wíniaka ashí kajertukrum átumka ajapa iniaitiusuitrume, tawai Uunt Yus. 30 Atumí uchirí̱ncha yáiṉchartinian ántran asutiáwaruitjiai. Chicharkámash Winia chichamprunka peṉké antukcharuiti. Tura úunt ya̱wa̱ emesmak itiurawa nútiksar atumí puya̱rí̱ Yúsnan etserniun amukáruiti. 31 Maa aentsú, Uunt Yusa chichame̱ enentáimtustarum. Warí nuikia Israer shuar íismaka Wikia kampuntin atsú nuṉka núja̱i̱nchuka nuṉka kirit teeya ¿núninkiaitiaj? Enta nuikia ¿urukamtai Wi aentssha ‘Iikia yamaikia aṉkantaitji tura amiinkia peṉké waketkishtatji’ tuinia? 32 Warí natsach aentsja̱i̱ tsaniṉcha ainia nusha ni iwiarmamtairi̱ tí shiirmach iwiarkamu ainia nuna tura nuwa̱ nuatnaiyasha ni iwiarmamke̱n ¿kajinmátainiawak? Tuma ai̱ṉ Wi shuar nekapmarchamnia tsawant Wíniaka kajinmátrukiarai. 33 Ame aneamu wáinkiataj tusamka ¡urukamtai timiá péṉkersha ame jíntimkia íwiaram! Nútiksamek netse nuwa̱ ainia nusha ame túramu jintintiáiniame. 34 Aents kuítri̱ncha tura umitmákcha ainia nuna numpé̱ ame entsarmarmincha máatraitme. Warí kakarmaja̱i̱ je̱á̱ waya̱ttsa pujasha wáinkiachuitme. Túrasha nuka ashí túraitiatam ámeka 35 chichaakum ‘Wikia umitmákcha asan Uunt Yusa kajetáiri̱ya̱ṉka aṉkantaitjiai. Warí yajauchinkia túrachuitjiai’ tame. Túrasha Wikia ame túramuja̱i̱ métek sumamtikiattajme. 36 Ame túramuka páchitsuk wárikmasam yapaji̱átin jeame. Kame Asirianmaya̱ iniatsá̱tmararmamia nútiksaraṉ Ejiptunmaya̱ iniatsá̱tmartatme. 37 Nuya̱sha núnismek muukem achíaku jiinkittiame. Warí iiṉkia jú̱ yaintmakartatji ame tu enentáimiamna núnaka Uunt Yus emesturmaku asamtai núja̱i̱ṉkia warí péṉkersha wáinkiashtatme.