Jirimías
Iwiaaku Yus tura najankamu yus
10 Israer shuará antuktarum. Uunt Yus iin chicharmasuitji. 2 Uunt Yus jú̱nis tíniuiti “Chíkich uunt nuṉka mátsatka ainia nuna túrutairi̱ unuimiátrairap. Tura nayaimpinmaya̱ warinkish wainkiam nuja̱i̱ waintiash wainkiarum uunt nuṉka mátsatka ashamainiakuisha ashamkairap. 3 Warí aentsu túrutairi̱ ainia nuka ántraiti. Kampunniunmaya̱ numin tsúpiniawai tura najanniun suíniawai túram asewaija̱i̱ takakmawai. 4 Kuít jiruja̱i̱ tura kuriji̱a̱i̱ íwiareawai tura ajintrutai̱n martiyuja̱i̱ ajintiáiniawai muchitkiachmin ajasat tusa. 5 Chiṉkí awakín najanar ajanam awajsamua núnin áiniawai. Chichainiatsui, ishichkisha ékemkachmin asamtai yanakí̱ juíniawai. Yajauch awajsachmin asamtai niṉkia ashamainiatsui. Núnisaṉ péṉker awajsatniuncha kakarmanka peṉké takakainiatsui” tíniuiti.
6 Ámiji̱a̱i̱ métekka chíkichkia atsawai Uunt Yusru Ámeka úuntaitme tura Ame náarmeka ti kakarmaiti. 7 Maa, uunt nuṉka mátsatka úunt akupniuri̱yá ¿Amincha yaki ashampramkachaint? Nekaska Ameketme ashamkamniamka. Warí, ashí nuṉkanam neka irunainia nuja̱i̱ apatka iismasha tura ashí ni akupénamunmasha Ámiji̱a̱i̱ métekka chikichkisha peṉké atsawai. 8 Chichaktinniasha nékainiatsui tura enentáimtairi̱sha atsuiniawai. Kame numi tsupikiar najanamusha ¿wariniak jintinkiartuamniait? 9 Kame aents jiruja̱i̱ takastinian unuimiátra iwiarkamun kuít jirunka Társesnumia̱ itiar tura kurincha aents iwiarkamun Ujasnumia̱ ikianainiawai. Nuja̱i̱ najankar pushincha tí peṉker kíṉkian yamakáimpramuja̱i̱ áentsenawai. Túrasha áyatik aents unuimiáru najanamu áiniawai. 10 Tura Uunt Yuska nekas Yúsaiti. Niṉkia iwiaaku Yúsaiti tura úunt akupin tuke pujuwiti. Ni kajekmataikia nuṉka muchitiawai. Tura uunt nuṉka mátsatka ainia nuka Ni suíri̱n katsuntrachmin áiniawai.
11 Kame chicharkuram “Najankamu yus nuṉkancha tura nayaimpincha najankacharua nu yuska ju̱ nuṉkanmaya̱ṉka ántsaṉ nayaimpi wakenmari̱ya̱sha meṉkararti” titiarum.
12 Kame nuṉkanka Ni kakarmari̱ji̱a̱i̱ Yus najanamai. Antsu ashí nuṉkanka Ni nekatairi̱ji̱a̱i̱ najanak nayaimpinkia Ni nékamuriji̱a̱i̱ iwiaṉkarmai. 13 Ni chichaakuiṉkia nayaimpiniam entsa téter ajawai. Nuṉka náṉkatramunmaya̱ncha Ni yuraṉminkia iwiawai. Núnisaṉ chárpincha yuminiun najanaiti tura Niṉki nasencha ikiutairi̱ya̱n júawai. 14 Ashí aents nekatairi̱ táattsamu ásar nékachu ajainiawai. Ashí aents jiruja̱i̱ takakma ainia nuka yusri̱n ní uweje̱ja̱i̱ṉ najankar natsanmai̱ ajainiawai. Kame jiru unuikiar najanamu yus ásar ánaṉkaiti. Warí niṉkia enentáin takakainiatsui. 15 Peṉké ántar áiniawai, mui̱jmiai̱ najankamu ásar asutniátin tsawantinkia ashí amukártatui. 16 Kame ni urukua ainia núninchaiti Jakupa Yusri̱ṉkia. Ashí najankaka Níṉkiti. Israerka ni wea nuṉke̱nte. ¡Ni náari̱nkia Ashí Akupin Uunt Yusaiti!
Aents emesnakmatai utma
17 Wenuke iwiartukar utúachmin awajsámunam pujamna nusha ame wariram nuṉká matsatna nu jukarta. 18 Warí Uunt Yus tíniuiti. Nekaata, ju̱ nuṉkanam matsatainia nú shuarnaka achirma árat tusan yamaikia kaya eṉkear naṉkimtainiam urukniuit nútikiawaran natsa̱a̱rarat tusan wáitkiasartatjai. 19 Maa ju̱sha urukakna jú̱niaj, urukakna mesekaj. Warí, winia akamakmarka peṉké tsuámarchamniaiti. Túrasha wikia chichaakun “Ju̱ka nekas winia suṉkuruiti tuma asan wáitsatniuitji̱a̱i̱” tumammiajai. 20 Winia jutai̱ je̱a̱rsha emeskamuiti tura yaraṉkrusha ashí tsuriarmaiti. Winia uchirsha ikiurkiaru ásar atsuiniawai. Winia je̱a̱run iwiaṉkármincha tura jutai̱ je̱a̱run je̱a̱rtimniasha peṉké atsawai. 21 Warí murikiu wainniusha netse ajasár Úunt Yusnasha e̱a̱kcharuiti. Túmainiak péṉker wáinkiacharma ásar murikrí̱sha ashí tsakiṉmakaruiti. 22 Ju̱ nekaata, chicham tura tétete ajainiamu araki̱a̱ ántuwawai. Nuka Jutanam pepru írunna nuna aya jú̱nik awajsar yajasma kajen matsamtai̱ awajsartajtsa wininiawai.
23 Maa nékajai Uunt Yusá, aents ju̱ní̱ túrattajai tusa niṉki iwiartumarchamniaiti. Núnisaṉ ni túrataj tana núnaka nekas umiktatjai títinniaka jeatsui. 24 Uunt Yusá, kajetáirmiji̱a̱i̱nchu antsu nekasa nuja̱i̱ métek chichartukta, peṉké nékachua núnisan ajasá̱i̱j. 25 Ashí uunt mátsatkamunmaya̱ Ámin nekarmainiatsna nu tura Ame náarmin pachisar shiir awajtámainiatsna nu kajetáirmiji̱a̱i̱ asutiáwarta. Warí Jakupa shuari̱nkia amukar ni pujutái̱ri̱ncha emestukar aya jú̱nik awajsar aya íimtiksarai.