Jirimías

Senainium chícham najanamu umikchamu

11 Uunt Yusa chichame̱ Jirimíasan tarí akateak 2 “Chícham najanamua ju̱ antuktarum. Túrarum Jutanmaya̱ shuar tura Jerusaréṉnum matsatainia nusha 3 chicharainiakrum jú̱nisrum etseratarum. Uunt Yus Israera Yusri̱ chichartamuk ‘Jú̱ chicham najanamun shuar umíachuka yajauchiniam yumiṉkramu átatui. 4 Kame jiru tsuérnumia̱ júsatniua nútikian atumí aparí̱n Ejiptu nuṉkanmaya̱ ji̱i̱ran nu chicham najanamun akupáiniakun winia chichamur antukrum umirtuktarum. Nuiṉkia átumka Wi shuar átatrume tura Wikia atumí Yusri̱ átatjai. 5 Túrakrumni̱ṉkia atumí aparí̱n tí peṉker nuṉka ashí árak tsapáu asamtai muntsu míshkiji̱a̱i̱ entsa núnis akamunmasha chícham najanamuja̱i̱ súsatniuitjiarme tímiaj nuna átum yamái wáintrumna nuna umikmin aintjiai túramprume’ tiartarum” tímiayi. Takui̱ “Núnis atí Uunt Yusá” tímiajai.

6 Nuyá̱ Uunt Yus chichartak “Ju̱ chicham ashí Jutá péprunmasha tura Jerusaréṉka jinti̱ncha étserkum ‘Chícham najanamua ju̱ antukrum umiktarum’ tiartá. 7 Warí atumí aparí̱nkia Ejiptunmaya̱ jí̱i̱rmiaj ímiainia̱ṉ tura yamaiya̱ ímiaja̱i̱sha tuke Winia chichamur anturtuktarum tusan tuke chicharkiaran winiajai. 8 Túrasha niṉkia tuíniamaitiat peṉké anturtukcharmai. Tumá aṉkant aṉkant ní enentai̱n yajauch enentáimmianumaani̱ júkiarmai. Túrawar chícham najanamu umiktarum tusan akupkámiaj núnaka umikcharuiti. Tuma asamtai ashí itiurchat jú̱ chicham najanamunam áarman itiariártatjai” tímiayi.

9 Nuyá̱ Uunt Yus chichartak “Jutanmaya̱ shuarka tura Jerusaréṉnum matsatainia nusha mái̱ metek enentáimtin áiniawai. 10 Warí emka aparí̱ armia nu Winia chichamprun umirkatniun nakitrar aents najanamu yus armia nu umirkatai tusar tikishmátrarmiayi. Yamaisha núnisaṉ Israer shuarsha tura Jutá shuarsha ni aparí̱ yajauchiri̱n waketrukiar aents najanamu yus tikishmátrar nisha Wi yaunchu ni apachri̱ji̱a̱i̱ chichaman najanamiaj núnaka peṉké yajauch awajtúrsarmiayi.” 11 Tuma asamtai Uunt Yus chichaak “Wi nu aentsun itiurchatan itiariártatjai túrasha nuya̱ṉka ú̱mkatniuka atsuttawai. Nuyá̱ Winia untsurkartatui tura untsurainiakuisha Wi peṉké anturkachartatjai. 12 Tuma asamtai Jerusaréṉnum matsatainia nu tura Jutá péprunmaya̱ ainia nusha kuṉkuinian áestiarmia nu yusan weriar untsukartatui. Túrasha itiurchat átatna nu tsawantinkia nu yus peṉké uwemtikramnian tujintkiartatui. 13 Jutanmasha ni ántar yusri̱nkia peprua ímiatrus ti takakui. Núnisaṉ Jerusaréṉnumsha ni yusri̱ Páaran kuṉkuin áestutai̱ṉkia natsanmai̱ ni jinti̱ írunna nunisha untsurí najatmamkaruiti. 14 Jirimíasá ámeka jú̱ aentska seatiaraip núnisam untsumkam seattash seatiaraip. Kame itiurchat tarim waitiainiak untsurainiakuisha anturkachartatjai.

15 Winia aneamursha Winia Uunt Je̱a̱ruí̱sha ¿warinia nisha waya̱tniuit mui̱jmiainian ti nukap túrayatcha? Kame taṉku maar Yus susamua nu ¿ame wáitsattamna nú tsawant ame yajauch túramun ámin asaktúrmarminkiait warastaj tusamea?

16 ‘Samek uriwiu péṉker iira tura néreṉka shíiram’ ame náarminkia Uunt Yus jú̱nis anaitiamkaiti. Túrasha yamaikia kakaram ipiamtan aju̱ntar ni nuke̱ṉka áestuktatui tura ni kanawe̱ṉka kupintraru ártatui” tawai Uunt Yus tímiayi. 17 Israer shuarsha tura Jutá shuarsha Páaran kuṉkuinian áestuiniak yajauchin túrawar Ashí Akupin Uunt Yus atumín aratmawarma nu akajtukarmatai yajauchin akuptúkarmaiti.

Anatútnumia̱ shuar Jirimíasan maatai tiarma

18 Uunt Yus ujatkáma nuna nekaamjai kame shuar túriarma núnaka iniaktursamai. 19 Wikia murik peṉké kajechuch mátniunam júam urukniuit núnikmajai. Winia mantuatai tusa chichaman jurutainiak jú̱nis turutiarmai. Numi nérentiuk emesratai matsatainia nú nuṉkanmaya̱ṉka tsupinkiati túramka ni náari̱nkia atakka peṉké enentáimtunsashtatui. 20 Tura Ashí Akupin Uunt Yusá nekasa nuja̱i̱ métek túrutai̱ji̱a̱i̱ sumamtikniuitme. Túram enentáimtai̱sha tura enentáisha nekapsa iisam nekarainiame. Ni yapajkiartatmena nuna wisha íistaj iniaitiusta. Warí winia itiurchatrunka Ámin paant ujakuitjiame. 21 Tuma asamtai Anatútnumia̱ shuar winia mantuataj chichartuiniak “Uunt Yusa naari̱ pachismeka etserkaip ii uwejé̱n jáka̱i̱m” turutainia nuna Uunt Yus chicharainiak 22 “Ashí Akupin Uunt Yus jú̱nis tíniuiti Wi núnaka asutiáwartatjai. Nátsaka mesetnum jákartatui tura ni uchirí̱sha ni nawantri̱sha tsukái kajinkiartatui. 23 Ni shuar ainia nuka iwiaaku juákchartatui tura Wi Anatútnumia̱ aentsnaka asutiátin uwí átatna nuiṉkia yajauchin itiariártatjai” tímiayi.