Jirimías
¿Urukamtai yajauch ainia nusha péṉker matsatainia?
12 Maa Uunt Yusá, Ámeka nekasa nuja̱i̱ métek enentáimniuitme. Tuma Ámini̱ṉ ju̱na Ámin títinian wakerajme. Túmaitkiuisha túratin tsaṉkamkamua núnan Ámiji̱a̱i̱ aújmattsattsan wakerajai. Kame Yusa enentáimtichu ainia nuka ¿urukamtai timiá peṉker kuítrintin ajainia? Núnisaṉ ashí anaṉkartin ainia nusha ¿urukamtaitsuk timiá péṉkersha pachischamu matsatainia? 2 Ame araitme túram kaṉkapruiniawai, tsakainiawai tura nerenawai. Tura aya chíchame̱ja̱i̱ṉ Áminkia pachitmainiawai túrasha Áminkia ishichkisha enentáimturmainiatsui. 3 Túmaitkiuish Uunt Yusá Ámeka nékarme. Ámeka wáitkiam winia enentái̱r Ámiji̱a̱i̱ urukuit nekaprusa iirsame. Murik mátin tusar enetkar niisháa matsasma nútikiam mátin tsawant jeamtai maami tusam akankarta. 4 ¿Nuṉkasha ajakmárua núnikmancha tura kampunniunam ashí nupa̱ irunainiana nusha kaatnasha urutáik iniaisarat? Nui̱ matsatainia nuna yajauchiri̱ji̱a̱i̱ nanamtincha tura yajasmasha amuukaruiti. Warí, Yuska ii náṉkatkamuri̱nkia iyatsui tiarmai. 5 Takui̱ Yus chichaak “Nuṉkak wena nuja̱i̱ tsékeṉkim pimpíamsha ¿kawaiji̱a̱i̱ tsékeṉtincha jeatámeash? Túrasha aṉkant péṉker pujayatam péṉker nekapeachkumsha Jurtana sa̱a̱kri̱ timiá teea nui̱sha ¿urukattamek? 6 Warí, ame yatsumsha tura ame apá shuari̱sha anaṉkramawaruiti. Nisha ame úkurmin kakantar untsumiármai. Péṉker chichartamainiakuisha peṉké anturkaraip.
7 Winia je̱a̱rnaka ajapan iniaisaitjiai tura Wíniana nunasha pachischaitjiai. Tura Winia enentái̱r aneema nunasha ni nemasri̱n íktusaran iniaisaruitjiai. 8 Winia nuka kampunniunmaya̱ úunt ya̱wa̱ núnin ajatrúsuiti. Winia kajertuk kakantar chichaku asamtai Wisha nútiksanak muí̱jkiaitjiai. 9 ¿Winia nuka nanamtin yukartin paiṉkiampramun chíkich nanamtin yukartin yuatai tusar téntakma ajapén pujá núninchakait? Wats, kampunniunmaya̱ yajasma yuáwarat tusarum werum ashí irurtarum. 10 Murikiu wáinin untsurí uwa ajarnasha emesturkar Winia nuṉkarnasha amuuturarai. Winia tí shiirmachia nuka kampuntin atsá awajsamuiti. 11 Kame peṉké atsá aya jú̱nik awajtúrsarai. Tuma asa Winia enentáimturas ajakmárua núnis pujawai. Nuṉkasha atsá aya jú̱nik awajsámuk peṉké pachischamuiti. 12 Atsamunam ashí naint írunna nuyá̱ ashí emeskartinkia káunkaruiti. Yamaikia iwiaaku ainia nu péṉker aṉkant pujusártinkia peṉké atsawai. Warí, nuṉka jú̱ náṉkatkamunmaya̱ juarki̱ atú náṉkatkana tímianaisha Uunt Yusa puya̱ri̱ ashí amukártatui. 13 Tríkiun arakáriat jaṉkin júukarmai. Jakamnia nekapenawai túrasha nuka peṉké yainiatsui. Uunt Yus kajekú asamtai arakan jukartatna nunasha natsantrartatui” tíniuiti.
14 Uunt Yus chichaak “Winí̱ ayamach yajauch aents matsamsar Winia shuarun Israeran níniun súsaran apujsarman yajauch awajainia núnaka yamaikia ju̱ nuṉkanmaya̱ṉka mashi ji̱i̱rartatjai tura núnisnak Jutá shuari̱ nu nuṉkanam matsatainiancha ashí ji̱i̱rartatjai. 15 Tura ji̱i̱rarmiaj nú ukunam waitnentraran aṉkant aṉkant ní nuṉke̱ni̱ṉ ataksha awakearartatjai. Túran ni nuṉke̱ni̱ṉ matsasártatjai. 16 Tura émamkesar wi shuara túramuri̱n nekaawar Wi shuaran Paara náari̱ji̱a̱i̱ nekas tajai títinian jintintiáwarma tímiatrusaraṉ nekas tajai tusar Uunt Yus iwiaakui títinian nekaawarka Wi shuar matsatainia nui̱sha tí peṉker nisha pujusártatui. 17 Kame nú nuṉka uunt mátsatkamu ántuiniachkuiṉkia nunasha ji̱i̱rartatjai. Tura ji̱i̱rarnasha emeskartatjai” tawai Uunt Yus.