Jirimías

Níniak enentáimtuiniachuk asutniáwartin

5 Uunt Yus chichaak “Kame Jerusaréṉnum jintia áiniana nu wekaatusrum íisrum nekaatarum. Wats pepru áṉkamuri̱ iisam aents chikichkisha nákaa nuja̱i̱ métek túrak aya nekasa nunak ¿túrasha áwash? Túmaitkiuiṉkia Wisha tsaṉkurattajai. 2 Túraitkiusha nekas umiktatjai tusar ‘Iwiaaku Uunt Yus’ íirsati tuíniakush núnaka peṉké ántar tuíniawai” tímiayi. 3 Maa, Uunt Yusá ¿Ámeka nekasa nuna túrawarat tusamchak íimiam? Amek asutiáwarmame túrasha najaimiakcharuiti. Amutcha amukármame túrasha iwiarnartinniaka peṉké nakitiarmai. Ni enentái̱ kayaja̱i̱ naṉkaamas kátsuram ajasár yapi̱sha nusháa iira ajasár tunaarí̱ya̱ ayantár waketkitniun peṉké nakitrarmai. 4 Nuya̱ṉka chichaakun “Nekas ju̱ aentska peṉké nékachu áiniawai. Tura ni Yusri̱ akupkámuri̱n Uunt Yusa jinti̱n nékainiachu ásar peṉké enentáimcha ajasárai” tajai. 5 Wats uunt ainia nuna weriaran chichasártajai. Warí niṉkia ni Yusri̱ nekasa nuja̱i̱ métek túrutairi̱n Uunt Yusa jinti̱nkia nékainiawai. Túrasha nisha Yus wakeramunka ashí nékainiayataṉ peṉké anturkacharmai. 6 Nuna tura ásarmatai úunt ya̱wa̱ kampunniunmaya̱ jíintiurar esaiyartatui. Tura kampuntin atsunum matsamin rúpuka emeskartatui. Antsu ni pépruri̱ ainia nui̱ṉkia yampiṉkia nákarartatui. Kame Yus timian umiktinian nakitiáiniak peṉké ántichu ajasármatai péprunmaya̱ jiiniainiaka achia̱rma ártatui.

7 Uunt Yus chichaak “Nuna túruiniancha ¿itiurak tsaṉkurartaj? Warí atumí uchirí̱ṉkia ajaprua iniaitiusarai. Túmainiak yuscha ainia nuna pachisar nekas túrattaji tuíniawai. Warí ni atsumainiamunka Wikia ashí súsarmajai túramaitiat niṉkia tsanirmawar aya̱shin súrin nuwa̱ matsamtainmasha tí waketiarmai. 8 Ni írutkamuri̱ nuwe̱n wakerutainiak kawái péṉker ayurtai pampain apujsamu kuṉkatin nántea nántea ajak chichana núnisaṉ aṉkant aṉkant túmarmai. 9 Nuna túmainiakiuisha ¿asuttsukek iniaisartataj? ¿Tura uunt nuṉka mátsatkamu túmaitkiuisha Wikia yapajmiákchattajak? tawai Uunt Yuska. 10 Átumka uwa arakma áiniana nu warukrum emeskatarum. Túrasha ashikia amukairap. Kame Úunt Yusnachu ásarmatai aya kánaweṉ asantratarum. 11 Warí Israerka tura Jutasha Winia peṉké pachittsuk chikichja̱i̱ anaṉkruawaruiti” tawai Uunt Yus.

12 Tura Uunt Yuska nékatsji tusar Uunt Yuska atsawai núnisrik puya̱sha tura tsukasha wáinkiashtatji. 13 Tura Yúsnan etserin áiniana nusha nekasa nuna etserainiachu ásar násea núnin ajasártatui. Niṉkia tímiatrusaṉ túrunawartatui tuíniawai. 14 Tuma asamtai Ashí Akupin Uunt Yus chichaak “Tu chichaku asakmin yamaikia ju̱yá̱ núnisaṉ Winia chichamprun ame wene̱mín ikiuajai. Ju̱ aents nakashua ánin átatui tura ji ju̱ aentsun amuktatui” tawai. 15 Iisiá, Uunt Yus chichaak “Israerá yamaikia nekaata, uunt nuṉka mátsatkamu yajaya̱ tí uunt núnisaṉ tí yaunchuya̱ ni chichame̱sha ámeka nekarchamun ámin ikiatkattajme. Ni chichaamusha nekarachartatme. 16 Ni tuntarí̱i̱nkia tséntsak tí péṉker iwiarkamu piaku asa iwiarsamu urakma núniniaiti. Tuma ásar tí kakaram áiniawai. 17 Ame arakrumniasha tura yurumkarmincha núnisaṉ uchirmíncha ántsaṉ nawantrumniasha yurutrámattarme. Áitkiasaraṉ murikrumniasha waakarmincha tura úwarmincha nuyá̱ íkiurmi̱ncha yurutrámattarme. Tura ame pépruram iwiarkar utúachmin awajsamu ásarmatai ju̱i̱ṉkia itiurtámkachartatji tu enentáimtarmena nunasha puya̱ja̱i̱ emesturmaktatrume” tawai.

18 Túrasha Uunt Yus chichaak “Nuna túraknasha nu tsawantiṉkia amú amuka awajsashtatjarme” tawai. 19 Tura anintruiniak “Ii Yusri̱ Uunt Yussha ¿urukamtai ju̱nasha jú̱tikramajⁱ?” tuíniakuisha chicharainiak “Ju̱ nuṉkanam pujusrum Wíniaka iniaitiusrum nékashtai̱ najankamu yus shiir awajkuram takarsamarumna tímiatrusrumek nú nuṉkanam pujusrumsha yajaya̱ aents shiir awajkuram takarsattarme” tiartá. 20 Tura Jakup shuarsha ashí antukarti tusam etserkata núnismek Jutanmasha ántumtikiata. 21 Kame jí̱ntiniaitiatrumek wáintsurme tura kuishmisha ai̱ṉ ántatsrume. 22 Warí ¿Wíniaka ashamprukchattarmek? tawai Uunt Yus. Wikia nayants naṉkanit tusan kaanmatkan ikiusmiajai núnaka ukunmasha peṉké naṉkaikishtiniaiti. ¿Tuma aí̱ṉkik ashamprakrum kúrakrakra ajashtatrum? Tampá tímiatmakuish tuke áchattawai núnisaṉ uu ajak téter ajakush núnaka peṉké naṉkaikishtatui. 23 Túmaitiat jú̱ pepru enentáinkia nétsete tura antuktinian nakitiáiniak aya kajen áiniawai. Tuma ásar kanakiar yajá wéaruiti. 24 Tura ii Yusri̱ Uunt Yus arakan tsapamtik neremtikiattsa yumin ni wakerak akupniu nu núnisaṉ júuktin tsawant jeat tusa nákawa nu ashamkatai tuuka ishichkisha enentáimiainiatsui. 25 Atumí yajauchiri̱n yajá juramkintrume tura atumí tunaari̱ni̱ṉ péṉkersha wáintsurme. 26 Warí Winia shuarui̱ṉkia Yusan enentáimtichu matsamsar kúntin wáketun akarun aeprusua tímiatrus íiniawai. Emeskartinian aeprusar aentsun achiniawai. 27 Chiṉki chumpitiai̱ jiru najanamunam chiṉki piak ana núnis anaṉmar wariṉkish yaruakma ni je̱e̱nkia mete piak áiniawai. Túrawar páantin tura tí kuitrintin ajasáruiti. 28 Túmainiak tí peṉker nuekar tsamapkar ajasárai. Ántsaṉ yajauch aents ainia nuna túrutairi̱ji̱a̱i̱ naṉkaamas yajauchin túruiniawai. Úuntnumsha mitiaik áiniana nuna yáiṉtaj tusasha ayampruiniatsui. Núnisaraṉ atsumainiana nuna chichame̱ncha anturainiatsui. 29 Kame núnaka ¿túruiniankek asuttsuk iniaisartataj? Uunt nuṉka mátsatkamu tuma ainia núnaka Winia Wakantruka yapajkiachartatuak.

30 Tsuumai̱ ashamkamnia wáinkiar sapijmiakar tsej aushá tú ajamai ashí nuṉkanam naṉkaamainiawai. 31 Tuma ásar Yúsnan etserin ainia nusha waitruá etserainiawai tura Yúsnan pujurin áiniana nusha ní enentái̱ji̱a̱i̱ṉ^ki jú̱nisar túratai tuíniawai. Tura Wi shuarsha nuna wakeruiniawai. Túrasha ni amuukatniuri̱ jeamtaisha atumsha ¿warí itiurkatarmek?