Jirimías
4 Waketkitin wakerakmeka Wini̱i̱ṉ waketkitia Israerá tawai Uunt Yus. Wi íimmianumash ame mui̱jmiai̱ túrutairam iniaisámka tura náṉkamsam chichaachkumka 2 tura nekasa nuja̱i̱ tímiatrusnak nekas nákak túrattajai tusam Uunt Yussha iirui tákumni̱ṉkia antsu nui̱ṉkia ashí nuṉkanmaya̱ aentssha Nin péṉkernum yumiṉkramu ártatui tura Níini̱ṉ shiir awajnásartatui. 3 Warí Uunt Yus Jutanmaya̱ tura Jerusaréṉnumia̱ áishmaṉnasha chicharainiak “Nuṉka pukukrumsha jaṉkinmaṉka arakmakairap. 4 Uunt Yusai̱ tsupirnaktarum. Aentsu aya̱shi̱ tsupirnaktinia ántsarum Jutanmaya̱ shuartirmesha tura Jerusaréṉnum matsatutirmesha atumí enentái̱n tsupirnaktarum. Túrachkurmiṉkia átum yajauch túramunam Winia kajetair jiya núnin jiinkí̱ atumín ekemátmakairum. Túrunamtaikia yaaksha nuna ikiajniáktinkia atsuinti” tíniuiti.*
Aneartarum emeskartin winiawai tama
5 Kachu umpuakrum uunt nuṉka mátsatkamunam ántumtikiatarum. Túrakrum kakantrarum étserkuram chichaakrum “Iruntratarum túrawakrumin pepru wenuke̱ iwiartukar utúachmin awajkarma ainia nui̱ utsanawartai” titiarum. Tákuram Jutanam etserkatarum túrakrum Jerusaréṉnumsha ántumtikiatarum. 6 Tarach Seúnnumaani̱ iniakmasrum takuitiarum túrarum sétutsuk ú̱mkatniusha e̱a̱tmaktarum. Warí itiurchatan tura tí yajauchin araki̱a̱n inimprajrume. 7 Úunt ya̱wa̱ka tepetairi̱ya̱ jiinkiyi. Kame uunt nuṉka mátsatkainian emesmia nuka jiinkí̱ wéawai. Ame nuṉkemín emesak aya jú̱nik awajsartaj tusa pujutái̱ri̱ya̱ṉka jiinkiyi. Ame pépruram ainia nuka emesnak áentsri̱ncha awajnásartatui. 8 Tuma asamtai yuṉkunim ukatmamkarum kúntuts jakamnia enentáimkiuram tsej ausha urukatjik ajatarum. Warí Uunt Yus suir kaje̱ntkamuri̱ṉkia ikiurmatsji. 9 Tura nu tsawantinkia úunt akupniusha tura unuimiákaru ainia nuka nusháa enentáimias jakamnia nekaprartatui. Tura Yúsnan pujurin ainia nuka sapijmiakar waa waa tiártatui. Núnisaraṉ Yúsnan etserniuka jákachiat waṉka wajasártatui.
10 Nuya̱ṉka chichaakun “Winia Uunt Yusru, nekas ju̱ pépruka tura Jerusaréṉsha anaṉkawaruitme. Warí ii enentái̱nkia puya̱ka ijiukratmanumaṉ itiurchat awajkachma aṉkant matsamsattarme” tichakaitiam. 11 Nu tsawantinkia ju̱ péprunka tura Jerusaréṉnasha chicharainiak “Kampuntin atsunum naint irunainia nuyá̱ nase tsue̱r ii pépruri̱ nawantri̱ pujuinia nuní̱ winiawai. Nusha awa̱jtiur péṉker iwiarkattsaṉka winiatsui tunattawai. 12 Antsu nase nuna naṉkaamas kakaram Wini̱i̱ya̱ winiawai. Tura yamaikia Wisha núnisnak nekasa nuja̱i̱ métek niṉkia sumamtikiawartatjai.
13 Wats nekaata, yuraṉmia núnis wakattawai tura ni káruri̱ṉkia úunt nasea tímianuiti. Tura kawairi̱ṉkia churuwiaja̱i̱sha naṉkaamas kakaram yujainiawai. ¡Maj ju̱sha iisha urukawartajik. Warí emesnakar aya jú̱nik awajsachmak áiniaji!” 14 Maa, Jerusaréṉká uwemprataj tákumka netse enentáim yapaji̱áta. Tura yajauch túruktin iwiarkam takakmena nusha ¿urutáiṉ iniaisatam? 15 Warí Tánnumia̱ tura naintiar naintiar Eprain nuṉkanam emesnainiamun etserniu chichame̱nka ántuwatsuk. 16 Tura uunt nuṉka mátsatkamu ainia nui̱ ashí etseratarum. Suntar jintiá iin yajaya̱ wininiawai tura pepru Jutanam irunainia nuna kajerkar kakantar chicharkartatui tusarum Jerusaréṉnumsha ántumtikiatarum. 17 Warí Winia kajertukaru ásarmatai jintiá iin awajsarma núnis téntakar pujuráiniawai. 18 Ame túramurmek tura ame umikchamurmek nuiṉkia ejetamiarai. Ju̱i̱ti ame emesnaktinkia. Tí kuntuts enentáimkiur wáitsamniaiti. Warí enentáimin nekaska antintramkachaik tawai Uunt Yus.
Utsantuawaru emeskartin
19 ¡Maa, tí itiurchatan wainkian peṉké pujuchmin nekapeajai! Warí winia enentái̱r eṉketmasha najamprutawai. Winia enentái̱rsha péṉker eṉkemsachmin ajatrawai. Winia wakantru wikia peṉké itiatkashtatjai. Warí ámeka meset náṉkamui tusa kachu umpuamu antukchamek. 20 Warí emeskamuitiat nuna naṉkaamas emesnaki̱ wéawai túmak nuṉkasha aya jú̱nik atsá awajnaki̱ wénawai. Aya aneachma winia pujutái̱rsha aya jú̱nik atsá ajasárai tura winia jutai̱ je̱a̱rsha núnisaraṉ túramu áiniawai. 21 Meset júamunam tarach nenaamu íistinniasha ¿urutáiṉ iniaisataj? Tura meset náṉkamkur kachu umpuamu antuktinniasha ¿urutáitsuk iniaisatniuitiaj? 22 Warí Wi shuarka Wíniaka nekarainiachu ásar enentáincha áiniawai. Uchi peṉké ántichua núnisar antutai̱ri̱sha atsuiniawai. Yajauch túratniunka tí nekainiayat péṉker túratniun peṉké nékainiatsui. 23 Nuṉká iimsan náṉkamas pachimnaikia wariṉkish atsan wainkiamjai. Nayaimpiniam iimsamash tsáapniṉkia peṉké atsumai. 24 Naint iisarmasha naintkia kurainiarmai tura naintiar naintiar áiniana nuka ashí téter ajarmai. 25 Kame nekaata, ashí iimsamash aentska peṉké atsúarmai tura ashí nanamtin yakiya̱ arma nusha pisakáruyi. 26 Núnisaṉ nuṉka tí peṉker arakan neremtikin arma nusha kampuntin atsú ajasárun wainkiamjai. Kame Uunt Yus suíran kaje̱e̱nak winiá asamtai ashí pepru arma nusha atsá aya jú̱nik ajasármai. 27 Warí Uunt Yus chichaak “Uunt nuṉka mátsatkamua núnaka ashí atsá aya jú̱nik awajsattajai túrasha peṉkeka amukchattajai. 28 Tuma asa ajakmárma núnis tí kuntuts nuṉkaṉka awai tura yakisha nayaimpisha tee ajasárai. Warí túrattajna nuna iwiarkan chichaku asan peṉké yapaji̱áshtatjai. Ántsanak umitskesha iniaisashtatjai. 29 Ashí péprunam aents matsatáiniaka suntar kawainium eketrainia tura tíshimkiuja̱i̱ ekenkatniun unuimiátkaru wininiak téter ajainiakui ashí pisakáruiti. Tura kampuntin tee ainia nui̱ núnisaṉ kátsuram kaya wájakmanum u̱mainiawai. Tuma ásar pépruka utsaṉkar ashí ikiukiarma aentska peṉké atsá ítiarkak wainkiarai. 30 Maj, yamaikia ámeka atsá aya jú̱nik awajsámumsha ¿warí urukattamek? Pushí yamakáimpramu entsaram kuri iwiarkamuja̱i̱ tí peṉker iwiarmamkumesh tura ji̱mi yakaram uunt awajsámesh ántram shíirmach ajame. Warí ame tsanirum ainia nuka áminkia muí̱jramkar aya iwiaakmarminiak wakerutramkartatui. 31 Warí nuwa̱ iwia̱i̱ri̱n takustaj tusa jateemá najaimiak ará ará ajana núninian antukjai. Nuka Seuna nawantri̱ jakamnia nekapeak uwejé̱n takuí ‘Maj, wisha urukatjak, winia enentái̱rka maṉkartin ainia nuna wainiak jakamnia nekapeawai’ tusa túmawai” tímiayi.