Jirimías
Israer shuara umitmakmari̱ etsertamu
7 Tura Uunt Yus Jirimíasan chicharuk 2 “Yamaikia Uunt Yus Je̱a̱ wá̱i̱ti̱a̱i̱ri̱n wajasam ju̱ chicham étserkum ashí Jutá shuartiram ju̱ wáitinmaani̱ waya̱rum Yus shiir awajkuram Uunt Yusa chichame̱ anturkatarum tiartá. 3 Kame Ashí Akupin Uunt Yus Israer shuara Yusri̱ jú̱nis tawai. Atumí enentái̱n iwiarnartarum tura atumí túrutairi̱sha eseeratarum. Túrakrumni̱ṉkia nuiṉ pujustinian tsaṉkatkattajrume. 4 Núnisrumek wáitrin ainia nu chichainiak ‘Uunt Yusa Jé̱e̱, Uunt Yusa Jé̱e̱, nekas jú̱waiti Uunt Yusa Je̱e̱ṉka’ ajainiakuisha nekasapitia tiirap. 5 Warí atumí enentái̱n iwiarnarum tura atumí túrutairi̱sha eseerarum nekas enentáiji̱a̱i̱ iniaisarum nuamtak áentsja̱i̱sha nekasa nuja̱i̱ métek túrakrum 6 yajaya̱ aentssha mitiaikiasha waje̱sha wáitkiachkurminkia nútiksarmek ju̱i̱ tunamkachua nuna numpé̱ uputachkurminkia ántsamek atumek yajauch awajmámkuram chíkich yus áiniana nu tikishmátchakrumni̱ṉkia 7 ju̱ nuṉkan atumí úuntri̱n yáunchuk tuke susamiaj nui̱ṉ atumniaka apujsattajrume.
8 Wats iiskua átumka waitiá chichame̱ yaintmakchamnia nu nekasa tímianu enentáimtarme. 9 Túmakrum kasamsuárum, maṉkartasuárum, tsanirmasuárum, tsanumsuárum kuṉkuin Paar aestasuárum nuyá̱ átum nuik nekaachma chíkich yus áiniana nu tikishmáttsuárum 10 winiayatrumek Winia Naar pachisar Uunt Yusa Je̱e̱ tu anaikiamua nui̱ táarum ‘yamaikia aṉkantaitji’ mui̱jmiai̱ ainia nuka ashí túratin tárume. 11 Warí Winia Naar pachisar Uunt Yusa Je̱e̱ tu anaikiamua nu je̱a̱sha átum íismaka ¿kasa matsamtai̱ je̱a̱kait? Wats nekaata. Wisha núnaka wainjiai” tawai Uunt Yus.*
12 Tura Siru nuṉkanam Wi pujutai̱niam Winia Naar shiir awajtai̱niam emka pujumiaj nui̱ werum Israer shuar yajauchin túrin ásarmatai Wi emeskamaj nu iyutarum. 13 Antsu yamaikia Uunt Yus chichaak “Ashí nu tura árumni̱ṉ péṉker enentáimpraku tusan chicharkamaitiatrum anturtukchamarme tura untsuamsha ái̱rkachmarme. 14 Tuma asamtai Siru nuṉkanam Wi itiurkamaj nútikiattajai. Warí ju̱ Je̱a̱k Winia Naar pachisar atumí we̱a̱tri̱ nuyá̱ atumniasha ju̱ Yusa Je̱e̱n amasmaj nuke nekaska enentáimtarme. 15 Tuma asamtai yamaikia ashí atumí yachi̱n Eprain wea shuaran yajá akuprámiaj nútiksanak atumniasha wini̱ya̱ṉka yajá akuprattajrume.
16 Túrasha ámeka ju̱ aentska áujtusairap. Núnismek kúntuts enentáimtusmesha seatiaraip. Warí peṉké anturkashtatjame tuma asamtai Wíniaka seatip. 17 Jutanam pepru írunna nui̱ tura Jerusaréṉnumsha paasa jintianam túruiniana nuka ¿wáintsurmek? 18 Warí uchirí̱ jinia juuk ikiankarmatai aparí̱ṉkia jinia ikiamtuiniawai. Tura nayaimpinmaya̱ nuwa̱ úunt akupin súsatniun uunt páṉkan najanatai tusar núwa̱ka trikiu nekeṉman iwiarainiawai. Núnisaṉ Winia akajtuktai tusar najankamu yus ainia nuna umutain ukaténawai. 19 Kame Winiaash akajtukarat. ¿Nekaska niṉki natsanmai̱ ajakartiniakchak áninia?” tawai Uunt Yus. 20 Tuma asa Uunt Yus chichaak “Nekaatarum jú̱ nuṉkanam aentsnumash yajasmanumash tura ashí numi kampunniunam tura ashí yuraṉ írunna nui̱sha Winia kajetáirun tura Wi suir kaje̱ntkamurun ukartatjai. Tura keekka peṉké kajinkiashtatui” tawai.
21 Ashí Akupin Uunt Yus Israera Yusri̱ chichaak “Átum taṉku maa súarmena nui̱ átum takamtsuk áestamusha pachiatarum túrarum namaṉ yuátarum. 22 Warí Ejiptunam matsatrumin jí̱i̱rmiajrumna nú tsawantinkia atumí aparí̱ji̱a̱i̱ṉkia áujmattsachmaja̱i̱. Tura takamtsuk áestuatniuncha nuyá̱ taṉku maar súsatniuncha akupkacharmajai. 23 Núnaka tútsuk aya ju̱nak tinia akupkármajai ‘Winia chichamur anturtuktarum túrakrumni̱ṉkia Wikia atumí Yusri̱ átatjai tura atumsha Wi shuar átatrume. Núnisrumek péṉker pujustaj takurmeka Wi tájarmena tímiatrusrumek wekasatarum.’ 24 Túrasha Winia chichamprunka umirtukcharmai tura antutnaksha anturtukcharmai. Antsu ni yajauch enentái̱ wakeramuja̱i̱ métek ní iwiaramunak túrawarmai. Túmainiak eem wétsuk Yusnaka iniaisar úkumur waketkiarmai. 25 Atumí aparí̱ Ejiptunam matsatu jíintrarmia nuyá̱ juárkimiuk yamaiya̱ tímiaja̱i̱sha ashí Winia takartin Yúsnan etserin áiniana nuna kashi kashini̱ṉ táamtsuk tuke akuptúkiaran winiajai. 26 Túrasha Winia chichamprunka umirtukcharmai tura anturtuktinniaksha anturtukcharmai antsu antuktinian nakitiáiniak ántichu ajasár ni aparí̱ túrawarmia núja̱i̱ṉkia naṉkaamas tí yajauchin túrawarmai. 27 Tuma asamtai yamaikia Wi tájamna ju̱ ame ashí ujakártatme túrasha peṉké anturtamkachartatui. Ántsamek untsutcha untsukarta túrasha peṉké ái̱rmakchartatui. 28 Tuma asam yamaikia jú̱nisam tiártatme ‘Uunt nuṉka mátsatkamu Uunt Yusan ni Yusri̱ chichame̱n antukcharu tura umikiarat tusar asutiámash umikcharuka ju̱i̱ti. Anaṉkartutsuk nekas chichataiṉkia meṉkakaruiti.
Maṉkartutai paka
29 Ame intiashmeka tsupiram ajapata. Naint tsékeṉkim wakam kúntuts jakamnia enentáimprata. Uunt Yuska suira kaje̱nak nakitiar jú̱ aentsnaka ajapa iniaisaruiti.’ 30 Warí Wi íimmianum Jutá shuarka nekascha yusan mui̱jmiainian najanawar Yusa Je̱e̱n winia Naar pachitai̱niam awayá̱ tikishmátainiak yajauchin utsunáirarai. 31 Warí Piṉjiniúma pakarí̱i̱n uchirí̱ncha tura nawantri̱ncha áesawartai tusar nekascha yus Tupitian enentáimtutai̱n najankaruiti. Wikia núnaka enentáimtancha enentáimprachuitjiai tura akuptancha akupkachuitjiai. 32 Tuma asamtai Uunt Yus chichaak, tsawant jeattawai tura nu jeamtaikia Tupitkia tura Piṉjiniúma pakarí̱ atakka peṉké tunashtatui. Antsu Maṉkartuamu paka tunattawai núnisaṉ nuṉka aṉkant atsá asamtai Tupitniunmaṉ iwiarnasartatui. 33 Kame nu aentsu aya̱shí̱nkia nanamtin yukartin tura nuṉkaya̱ yajasma yukartin ainia nuna yumaṉke̱ ajasártatui. Nuna kírkartinkia yaaksha atsuttawai. 34 Tuma asamtai Jutanam pepru irunainia nui̱sha tura Jerusaréṉ péprunam paasa jintia áiniana nui̱sha warakur shiir enentáimsar kantamtai̱ncha núnisnak nuatnaiya̱munam áishmaṉja̱i̱ nuwa̱ nuatnaiya kantamtai̱ncha emeṉkátraran mitia awajsartatjai. Warí nu nuṉka ashí emesnakchattawak” tíniuiti.