Jirimías
8 Núnisaṉ Uunt Yus chichaak “Nu tsawantin Jutá nuṉká akupniúri̱ ukunchí̱ncha nuyá̱ uuntri̱ ainia nuna ukunchí̱ncha núnisaṉ Yúsnan pujurniunun áintsaṉ Yúsnan etserniu ukunchí̱ncha nuyá̱ Jerusaréṉnumia̱ aentsu ukunchí̱ncha iwiarsamunmaya̱ ashiwiartatui. 2 Tura yana anenakua enentáimtusar tikishmátrarma núnisaraṉ yana nemarsara aniasarma nui̱ etsa̱nam nantunam nuyá̱ nayaimpiniam ashí írunna nui̱ naka tepetar amajkartatui. Tuma ásar juutcha júukchamu tura iwiartasha iwiarsachma ásar arakan péṉker neremtikin nuṉká matsasma núnisar juákartatui. 3 Tuma asamtai nu tsawantinkia ju̱ aents imiá yajauch iwiaaku juákarun tui̱ṉsha akuprattajna nui̱sha iwiaaku pujustinji̱a̱i̱ṉkia jákatin imiá péṉker átatui” tawai Ashí Akupin Uunt Yus.
Papí ain tura neka ainia chichareamu
4 Núnismek Jirimíasá, chicharainiakum Uunt Yus chichaak “Nuiṉkia akaikí̱ iniararka ¿nantachuk ainia? ¿Tura achirar yajá yaruakma waketraṉka káunchak ainia? 5 Jerusaréṉká urukamtai jú̱ shuarka tuke umichu asasha aya kajetnaksha pujurniuit. Anaṉkartutain umiriakka antuktinniaka peṉké nakitiawai. 6 Émamkesan antú ajakun antukjai. Chichainiaksha naka chichainiatsui. Aents yajauch tura asa ené enentáimiá ajas ¿ausha warí itiurkája? tauka chikichkisha atsawai. Tútsuk kawái mesetnum urukniuit núnisar aya ní wakeramunak tsékentainiawai. 7 Unturusha yakí̱ urukatniuit núnaka nékawai. Tura yámpits núnisaṉ chinimpsha ántsaṉ amuntai̱sha yajá nuṉkanam urutái wéartiniait núnaka nékainiawai. Túrasha Wi shuarka Uunt Yus nekasa nuja̱i̱ enentáimna núnaka nékainiatsui. 8 Átumka chichaakrum ‘Iikia ti nékainiatsjik tura Uunt Yus akupkámu umiktin chichamsha ¿íiji̱a̱i̱ṉchuk pujá?’ itiurak tárum. Kame nekas túmaitiat papí ain ainia nuna áakmatairi̱ anaṉkartin ásar nú chichamnaka anaṉkartutai̱ awajsaruiti. 9 Tí neka áiniana nusha iniatsá̱nar ti sapijmiainiak ‘ausháa’ tuíniawai nuya̱ṉka achirárma armai. Wats nekaatarum. Warí Uunt Yusa chichame̱ncha nakitraru ásarmatai yamaisha ¿warí nekatai̱ji̱a̱i̱ṉ juárkara? 10 Tuma ásarmatai ni nua̱rí̱ ainia núnaka chíkich aentsnum surutkartatjai tura arakri̱nkia utsantuawar nupetmakarua nuna súsartatjai. Warí uchichinmaya̱ juarki̱ úuntaimiak anaṉma kuítriniatniun wakeruiniawai. Ántsaṉ Yúsnan etserin ainia nuyá̱ juárkimiuk Yúsnan pujurniuimiak anaṉkartuiniawai. 11 Tura Wi shuara nawantri̱ wait ajá pujakuisha atsaṉkratniunka wakeruiniachiat túkeneas ‘Aṉkant atí, aṉkant atí’ tuíniawai. Túrasha aṉkant pujustinkia peṉké atsawai. 12 ¿Antsu mui̱jmiainian túrawarua nui̱sha natsamainiawak? Warí nekasaiti peṉké natsa̱a̱rcharuiti ántsaṉ péejchachisha ajascharuiti. Tuma ásar iniainiana nuja̱i̱ métek iniarartatui. Tura asutniátin tsawant jeatéma nui̱ nekaska tukumkartatui” tawai Uunt Yus. 13 “Niṉkia nekas peṉké amukártatjai” tawai Uunt Yus. “Warí kanawe̱nka uwa nére̱ṉka peṉké juákchattawai ántsaṉ ikiu numiri̱ncha nere̱ṉka peṉké juákchattawai. Ántsaṉ nuke̱sha ashí ja̱ja̱tkartatui tura nin ashí súsaruitjiana nusha ashí naṉkaamasartatui.
Jerusaréṉka enentáimtus Jirimías kúntuts nekapeamu
14 ¿Urukamtai pujutrasha ajainiaji? Iruntrartai túrawarar pepru wenuke̱ iwiartukar utúachmin awajkámu áiniana nui̱ utsanawarar kajiṉkiartaiyá. Warí ii Yusri̱ṉ Uunt Yusak amuukatniunam akuptámkarji. Túrak entsa tséas eṉketámun áatmakarji. Warí Uunt Yusai̱sha tunaaka túrawaruitji. 15 Kame itit awajsachma aṉkant pujustin nákasarji túrasha nú péṉkerka peṉké wainkiacharji. Tsuámartincha wáinkiacharji antsu imiaankir wáurkamnia ajainiaji. 16 Tánnumia̱ juárkin kawairi̱ chichainiamu antuwainiawai. Ni kawairi̱ chichainiamun ántuiniak ashí núṉkaka kurá núniawai. Káutkar ashí nuṉkanka wakerú ajamai irunainia núurtiuk tura péprunka shuári̱ntiuk amú amú awajénawai. 17 Pai yamaikia napin atumín akuptajrume. Warinkish unuimiátkaru ainia nusha nú napinkia wariṉkish itiurkachmin áiniawai. Tuma ásar esatmíttiarme tawai Uunt Yus titiarum” Jirimíasan tímiayi.
Jirimías Jutanmaya̱ shuaran e̱a̱rma
18 Tí najaimia asan enentái̱rsha jakamnia nekapeawai túrasha tsuákri̱ṉkia peṉké atsawai. 19 Pai yamaikia Wi shuara nawantri̱ yajá pujá winiak untsumui. ¿Nuikia Uunt Yuska Seúnnumka pujatsuk? ¿Kame ni úunt akupniuri̱ṉkia nui̱ṉkia atsawak? ¿Urukamtai nakumkamu yusja̱i̱ tura yajaya̱ itiamu ántar áiniana núja̱i̱sha akajtukuram? 20 Júuktinkia amukáyi núnisaṉ esatcha naṉkaamasai̱ túrasha iikia uwempracharuitji. 21 Wi shuara nawantri̱ itiurchatri̱ji̱a̱i̱ jakamnia enentáimpran pujajai. Ajakmárua núnisaṉ enentáimjiai. Warí sapijmiakan tí kuntuts enentáimpramu takamtsuk amutáyi. 22 ¿Kame Karaatnumka kuṉkuin tsuakka atsawak? ¿Tsuákratniuka nuiṉkia peṉkek atsuinia? Nui̱kia Wi shuara nawantri̱ tsuámartintri̱ṉkia ¿urukamtai atsá?