Isekiár
39 “Aentsu uchiri̱yá, ámeka Kuk chicharkum ‘Uunt Yus Ashí Aentsu Uuntri̱ chichartamuk “Misekan tura Tuparan akupniu uuntri̱ Kuká, ju̱ nekaata. Yamaikia áminkia kajerkajme. 2 Tura arakaani̱ nuṉka náṉkatkamunmaya̱ ji̱i̱ki̱ ewekámsan Israera náintri̱ya̱ nui̱ itiattajme. 3 Ame menaarmiji̱a̱i̱ tíshimiuk takakmena nuna kupirkattajme. Túran naṉki untsuurumji̱a̱i̱ takakmena núnasha nuṉká aju̱ntrattajme. 4 Tura ámeka, ame suntarumji̱a̱i̱ tura untsurí nuṉkanmaya̱ aents ámiji̱a̱i̱ wekainia nusha Israer shuar pujutai̱ naintia nui̱ jakarum tepetar wái̱ṉtatrume. Túrunawakrumin atumí aya̱shí̱nkia churuwiasha tura ashí nanamtin yukartin ainia nuna núnisaṉ kampunniunmaya̱ yajasma yukartin ainia nunasha ayurkamattajrume. 5 Wi chichaku asamtai jakarum a̱a̱ tepetar wái̱ṉtatrume.” Wi Uunt Yus Ashí Aentsu Uuntri̱ asan nuna tájarme. 6 Nuyá̱ Makuk nuṉkanmaṉka núnisaṉ nayantsa yantamén aṉkant pujuinia núnasha jinia akuptúkartatjai. Túramtai Wi Uunt Yusaitjiana ju̱na nekarawartatui. 7 Nuya̱ṉka Wi Tunaarinchaitjiana ju̱na Israer shuar nekarawartatui. Tura Winia Tunaarincha náarun ántar yajauch áujmatsacharti tusan peṉké tsaṉkatkachartatjai. Tura yajá nuṉkanmaya̱ shuar ainia nusha Wi Uunt Yus Israera Yusri̱ Tunaarinchaitjiana ju̱na nekarawartatui. 8 Wats, nekaatarum. Wi chichakmiaj nu tsawant jeatémayi. Nekas uminkiattawai.’ Wi Uunt Yus Ashí Aentsu Uuntri̱ asan ju̱na tajai.
Kuk ni suntari̱ji̱a̱i̱ tuke amukma
9 Nuya̱ṉka ashí Israer shuar péprunam matsamárma nu jíintrar jinia ikiamtukar mesetnum mánitiai ainia nuna tantaran ayamprumatai̱ncha tíshimkiuncha tura nuja̱i̱ ekentai̱ncha nuyá̱ ekentai̱ naṉkincha peṉké naṉkincha áeskartatui. Kame núja̱i̱ṉ siati uwí jinia ikiapárartatui. 10 Nui̱ṉkia kampunniunmaya̱ jíniaka júukchartatui núnisaṉ jiniasha tsupikchartatui antsu mesetnum mánitiaiji̱a̱i̱ jíniaka ikiapáiniartatui. Nuní̱ túrawar atararmia nuna atantrartatui. Tura ni warirí̱n yarurkarmia nunasha nisha yapajmiainiak yarurkartatui” tawai Uunt Yus Ashí Aentsu Uuntri̱.
11 “Kame nu tsawantinkia wekain ainia nuna pakarí̱ tutai Israernum nayantsanmaya̱ṉka etsa̱ tatainmaani̱ ana nui̱ Kuk iwiarnastinian nuṉkan Wi susattajai. Tura Kukka núnisaṉ ni aentsri̱ ti untsurí nekapmarchamnia ainia nusha nui̱ṉ iwiarnasartatui túrawar Jamunkuk* paka anaikiartatui. Túrunamtai nú pakanmaani̱ wekasatniuka tujinniaktatui. 12 Tura nuṉka imiatkímprachma awajsatai tusar Israer shuarka jakaan siati nantu iwiarainiak pujursartatui. 13 Kame ashí nú nuṉkanmaya̱ aents iwiarsartatui. Tura ashí nupetmakan naṉkamantu awajmámsattajna nú tsawantinkia Israer shuarka ashí nuṉkanam shiir enentáimtusma ártatui” tawai Uunt Yus Ashí Aentsu Uuntri̱. 14 “Tura nuṉka imiatkímprachma awajsatai tusar jákaru iwiarsachma juákarun wekaatus iwiarsarat tusar aentsun akuprartatui. Túrawar siati nantu naṉkaamasmatai jákaru ashí iwiarsamuash ainia tusar wekaatus tuke iyartatui. 15 Kame nu nuṉkan íistaj tusa wéaj tukamá aentsu ukunchí̱n wainkiaṉka iwiarin ainia nu wáinkiar Jamunkuka pakari̱n iwiarsarat tusa nu ukunch tepamunam numin ají̱a̱ ikiukiartatui. 16 Nuna túrawar nuṉkanka imiatkincha awajsártatui. Nui̱sha pepru Jamuna* náartin átatui.
17 Maa, aentsu uchiri̱yá, ashí nanamtin núnisaṉ kampunniunmaya̱ yajasma ainia nu ame chicharainiakum ‘Uunt Yus Ashí Aentsu Uuntri̱ chichaak “Ashí nuṉkanmaya̱ iruntratarum túrarum Israera náintri̱n Yus súsatniua nútiksan atumín amastajtsan Wi iwiaraj nui̱ káunkatarum. Túrarmeka namaṉ yuáttarme tura numpa umartatrume. 18 Kame aents kakaram ainia nuna namaṉke̱ yuáttarme tura akupin ainia nuna numpe̱sha umartatrume. Nisha murik áishmaṉ nuyá̱ murik yamatskam tura chipiu áishmaṉ núnisaṉ turu Pasannum unuekarma núnisar áiniawai. 19 Núnisrumek macharí̱sha yu yu nakitkittiarme tura Yus súsatniua nútiksaṉ atumín amastaj tusan iwiaraitiajna nuna numpe̱sha nampemam umartatrume. 20 Winia ekentsa yurumtairui̱ṉkia kawái tura kawainium ekemta unuimiátra ainia nuna namaṉke̱sha tura aents kakaram núnisaṉ ashí aents mesetan unuimiátka ainia nuna namaṉke̱sha yu yu nakitkittiarme” tawai Uunt Yus Ashí Aentsu Uuntri̱ tiartá’ tímiayi.
Israer shuar ni Yusri̱n enentáimturarma
21 Nuna túran Winia kakarmarun ashí nuṉkanmaya̱ aentsnum iniakmastatjai. Tura itiur sumamtikiawarna asutiáwaraj nunasha ashí nuṉkanmaya̱ aents wáinkiartatui. Núnisaṉ Winia kakarmarja̱i̱ nupetkaran Winia awajsaraj nunasha nekaawartatui. 22 Kame Israer shuarka nu tsawantai̱ Wi Uunt Yus ni Yusri̱ntjiana ju̱na nekarawartinian juárkiartatui. 23 Kame chíkich nuṉkanmaya̱ aentska Israera shuari̱ṉkia ni yajauch túrutairi̱ni̱ṉ achirar yaruakarma yajá pujusárma nunasha nekaawartatui. Warí, Winia kajertukarmatai Wisha núnisnak yapirnaka ú̱rkarmajai. Túran ni nemasri̱n surukan iniaisarmajai túram mesetnum puya̱ja̱i̱ ashí jákarmiayi. 24 Núnisnak niṉkia tunáa túrutai̱ji̱a̱i̱ tura ni máakchari̱ji̱a̱i̱ métek túrawaran Winia yapirnasha ú̱rkarmajai” tímiayi.
25 Tuma asamtai Uunt Yus chichaak “Yamaikia Jakup shuar achirar yaruakma ainia nuna awakearartatjai. Tura ashí Israer shuarnaka waitnentrartatjai. Nuna túran Winia tunaarincha naarua nuna ti akasmatakun iniaktusartatjai. 26 Kame ni nuṉke̱n waketkiar aṉkant pujusárka tura yaaksha sapijmiamtikiamnia atsakui nui̱ṉkia nisha wishiktai̱ matsamin armia nuna tura Wiji̱a̱i̱ péṉker wekaicha armia nunasha kajinmatkiartatui. 27 Antsu Wisha chíkich chíkich péprunmaya̱ tura ni nemasri̱ nuṉke̱ya̱ yaruakan irurmatai núnisnak ashí Israer shuar iimiainiamunam aents túrachminian túrakun chíkich uunt nuṉka mátsatka ainia nusha iimiainiamunam túrattajai. 28 Nuja̱i̱ Wi achirar chíkich nuṉkanam yaruakarat tusan tsaṉkamkan iniaisámiaj nuyá̱ Wiki ataksha chíkich nuṉkanmaya̱ chikichkiṉkisha ikiutsuk ni nuṉke̱ni̱n awakearan irurmatai nui̱ṉkia Wi nekas ni Úunt Yusri̱ntjiana nuna nekarawartatui. 29 Tuma asamtai yamaikia Wikia u̱mprukchartatjai. Warí, Winia Wakantruka Israer shuarnumka akupkámu átatui” tawai Uunt Yus Ashí Aentsu Uuntri̱.