Isekiár

Yusa Uunt Je̱e̱ átatna nu ímiaja̱i̱k wainkiamu

40 Ii achintrar yaruakma paintiséṉku uwí jeá yama uwí náṉkamuk chikichik nantu tias tsawantin tura Jerusaréṉ pepru nupetkamu katurse uwí naṉkamamunam nui̱ Uunt Yus uwejé̱n awantrus jurukmiai. 2 Tura ímiaja̱i̱k Yúsnan wainkiamaj nuka Israer shuara nuṉke̱n jurukí̱ naint yakí̱ wájakmanum apujtusmai. Nui̱ wajasan nuṉkaani̱ yantam iimkiamán péprunam uunt je̱a̱ je̱a̱mkatin iwiarkamua ániun wainkiamjai. 3 Tura nui̱ jurukmiatai áishmaṉ yaṉkú jírua nuní̱ iira wáitiniam wajamai. Nisha riniu sentan nuyá̱ nekapkancha uwejé̱ja̱i̱ takus wajamai. 4 Tura nu áishmaṉsha chichartak “Aentsu uchiri̱yá, ashí wi ámin iniaktustatjamna nu péṉker esetram iisam tura antukam nekaata. Kame ashí ame wáiniam nu Israer shuar ujakárta tusa itiamuitme” turutmiai. 5 40:​5-16 Tura Yusa Uunt Je̱a̱ a̱a̱ri̱ wenukja̱i̱ ashí téntakma amai. Nui̱ aents nekapmatai̱n takaku wajamai tura nuja̱i̱ je̱a̱n nekapmamai. Nuya̱ṉka wayá̱ wáitincha núnisaṉ watai̱ncha nekapmamai. Nui̱ tesarma irunmiania nusha nekapma iisam métek armai. Tura ashí nui̱ najankamu arma nu nekapma iismasha ashí núniniak armai. 17 40:​17-23 Nuna tura umik nuya̱ṉka á̱a̱ri̱n jurukmiai tura nui̱sha traintia tesarma armai. Núnisaṉ á̱a̱ri̱sha nekapma iisam seṉkuintia mitru jeá amai tura nuṉkaani̱sha núnisaṉ arakaani̱sha métekeyi. Nuya̱ṉka arakaani̱ wáitin nekapmamai nui̱sha núnisaṉ menaintiú tesamu ju̱í̱ni̱sha tura á̱a̱wini̱sha menaintiú tesamu amai. Tura wáitikia emka wáitiya̱ nuja̱i̱ métekeyi. Nekapkari̱ṉkia núnisaṉ métek najatkamuri̱sha armai. Tura wáitinmaya̱ chíkich wáitiniam nekapmamka seṉkuintia mitru jeauyi. 24 40:​24-27 Nuya̱ṉka nuṉkaani̱ jurukmiai tura nui̱sha waiti amai nuna nekapmamuri̱sha tura najanamuri̱sha emka waiti arma nuja̱i̱ métek armai. 28 40:​28-31 Nú waitinmaani̱ wayá̱ initiaani̱ jurukmiai. Nui̱sha núnisaṉ wáitisha tura nu najanamusha núniniak armai. Antsu wá̱i̱ti̱a̱i̱ri̱ṉkia uchu tesamuyi. 32 40:​32-37 Nuya̱ṉka etsa̱ tatainmaani̱ tura arakaani̱sha wáitikia tura nu najankamusha emka najankamu arma núnisaṉ najankamu irunmiai. 38 40:​38-43 Nui̱ tesamu ámanumka taṉku takamtsuk áestuattsar nijiatai̱ amai. Tura nui̱ jimiará awa̱tai̱ ju̱í̱ni̱sha tura jimiará awa̱tai̱ á̱a̱wini̱sha pujuarmai. Nui̱ takamtsuk áestuatniun suen tsupirak mátin armai. Nui̱ waya̱munam kuatru awa̱tai̱ ju̱í̱ni̱sha tura kuatru awa̱tai̱ atuni̱sha pujuarmai. Mash iruram uchu awa̱tai̱ armai. Núnisaṉ chíkich kuatru awa̱tai̱ kaya pakamá iwiarkamu nui̱ taṉku sue̱ tsupirka mákur takatai̱ arma nusha nui̱ṉ patamarmai. 44 40:​44-46 Nuya̱ṉka init wáitinmaya̱ jiinkí̱ initiaani̱ tesamunam jimiará tesamunmaṉka kantamin ainia nuna armai. Chíkichkia waiti arakaani̱ ana nui̱ nuṉkaani̱ íimtikiamuyi. Tura chíkichkia waiti nuṉkaani̱ ana nui̱ túrasha arakaani̱ íimtikiamuyi. Tura nu aents chichartak “Ju̱ tesamu nuṉkaani̱ íimiak ana ju̱ka Yúsnan pujurin Yusa Uunt Je̱e̱n wáinin pujusártiniaiti tura tesamu arakaani̱ íimiak ana ju̱i̱ṉkia Yus shiir enentáimtakur áestutai̱n wáinin Riwí shuarnumia̱ Satuka uchirí̱ Uunt Yusan takarsartin achikiárma ainia núnaiti” turutmiai. 47 40:​47-49 Nuya̱ṉka á̱a̱ri̱n nekapmam waṉkantí̱sha tura esantí̱sha 50 mitru jeá ásar métekeyi. Tura shiir tesamu nákari̱n Yus áestutai̱nkia pujumai. Nuya̱ṉka Yúsnan takarkur entsatai̱ tesamunam jurukmiai. Nuna esantí̱ṉkia tias mitru tura waṉkantí̱ṉkia sais mitru jeá armai.*