Riwiitikia
Répran achimiáku atak péṉker ajastin jintinma
14 Uunt Yus Muisaisan chicharuk 2 “Repra suṉkura achimiáku mui̱jmiainiumia̱ imiatkincha ajastaj tusa Yúsnan pujurniuja̱i̱ iṉkiunaikiartiniaiti. 3 Nuyá̱ Yúsnan pujurin matsamkamunmaya̱ jintiuki̱ repra suṉkura achimiákun iis péṉker ajasmataiṉkia 4 Yúsnan pujurin péṉker ajasu imiatkincha ajasat tusa jimiará chiṉkin iwiaakun tunamárchan nuyá̱ sétruncha tarach yamákáiji̱a̱i̱ eṉkerman tura isupu nupa̱ncha itiartiarum tusa akupkatniuiti. 5 Nuyá̱ Yúsnan pujurin entsa akaamunam wajá ichiṉnan nuweja̱i̱ najanamun takus wajana nui̱ chikichík chiṉki kuntuje̱ tsupirkarum numpe̱n chukuikiá awajsat tusa akupkatniuiti. 6 Nuyá̱ chíkich chiṉki iwiaakua núnaka setru numiri̱ji̱a̱i̱ tarach kapanniuja̱i̱ tura isupu nupa̱ja̱i̱ ashí irur púkuninmaya̱ entsa ichiṉnanam shikikma chiṉki maamu numpe̱n nui̱ eṉker nijiartiniuyi. 7 Nuna tura repra suṉkuran achimiákua nuna uká ukateakua siati ejé ‘imiatkincha ajasái’ títiniaiti. Tura chiṉki iwiaakunka kampunniunam awematniuiti.
8 Tura imiatkincha ajaana nuka pushiri̱n nijiá nuyá̱ intiashí̱ncha kesá kesá ajas máitniuiti. Nuna tura imiatkincha ajawai. Nuya̱ṉka matsamkamunam waya̱mniaiti túrasha ni je̱e̱nka wá̱i̱tsuk siati tsawant pujustiniaiti.
9 Nuyá̱ siati tsawant ejeṉka intiashí̱n susurí̱ncha tampejkatri̱ncha ure̱ncha ataksha kesá kesá awajsatniuiti. Nuyá̱ pushiri̱ncha nijiá nisha máitniuiti. Nuna umikkia Yus íimmianum imiatkincha ajastatui. 10 Nuyá̱ uchu tsawantinkia jimiará murik áishmaṉkan nuyá̱ chikichík murik nuwa̱chin chikichkí uwí tákakun tunamárcharun itiartiniaiti. Núnisaṉ araka neré Yus súsatniuncha trikiu nekeṉman siati ritru jeastatuk asuitiji̱a̱i̱ pachimpramun itiatniuiti. Áitkiasaṉ asuitin ritru ajapéri̱n jeastatuk itiatniuiti. 11 Túramtai Yúsnan pujurin ikiankamun jurukí̱ Uunt Yus íimmianum imiatkincha awajnástatna nuna Yus Shiir Awajtai̱ Je̱a̱ wá̱i̱ti̱a̱i̱ri̱n naka awajsattawai. 12 Ju̱ka makumamunam súamu asamtai Yúsnan pujurin chikichík murikiun tura asuitincha mai̱ weṉkuk pe̱a̱tak Uunt Yusan iniaktustatui. 13 Tura nú murikiun Yus Shiir Awajtai̱ Je̱a̱ pujana nui̱ itiá yajauch túramunam áestuatniun núnisaṉ takamtsuk áestuatniuncha mátai̱ya̱ nui̱ṉ Yúsnan pujurin murikiu sue̱n tsupirak mátnuiti. Tunáa túramunam áestuatniuja̱i̱ métek ju̱ makumarmanum Yus susamusha Yúsnan pujurniunuiti. Nuka ti shiir awajsamuiti. 14 Nuiṉkia Yúsnan pujurin nu makumarmanum maamu numpe̱n jusa, nu aents imiatkincha ajasti tusa kuishniumsha uunt uwejnumsha núnisaṉ uunt nawe̱nmasha aya untsuurnumaani̱ṉ yakartiniaiti. 15 Núnisaṉ Yúsnan pujurin asuitin jusa menaari̱ uwejé̱n ishichik yaratniuiti. 16 Tura asuitin menaarí̱ji̱a̱i̱ achíakman untsuur uwejé̱ja̱i̱ asuitin antiṉ siati ejeti Uunt Yus íimmianum ukatkatniuiti. 17 Tura asuiti ampiniar ni uwejé̱n juáktatna nuya̱ṉka Yúsnan pujurin imiatkincha ajastatna nuna kuishi̱ncha uunt uwejnumsha núnisaṉ uunt nawe̱nmasha ashí untsuurnumaani̱ṉ makumarmanum numpaja̱i̱ yakarma nui̱ṉ asuitiji̱a̱i̱sha yakartiniaiti. 18 Nuyá̱ asuiti ampiniar juáktana núnaka aents imiatkincha ajastatna nuna muuknum yakartatui. Ashí nu túramuja̱i̱ Yúsnan pujurin Yus nu aentsun suir enentáimtamun atsaṉkar aṉkant ajastaj tusa Uunt Yus íimmianum túratniuiti. 19 Nuya̱ṉka Yúsnan pujurin tunaanum áestuatniua nuna Yusan súsatniuiti. Tura nuja̱i̱ Yus nu aentsun suir enentáimtamun atsaṉkar aṉkant ajastatui. Nuyá̱ takamtsuk áestuatniun taṉkú sue̱n tsupirak mátniuiti. 20 Nuyá̱ Yúsnan pujurin takamtsuk áestuatniun araka nere̱ja̱i̱ irumar Yus áestutai̱niam áestuattawai. Tura nuja̱i̱ Yus nu aentsun suir enentáimtamun atsaṉkar aṉkant ajastatui. Tura nuja̱i̱ nu aents imiatkincha ajastatui.
21 Antsu nu aents Yus áestuatniun tímiatrus takurmakchaka ni makumamunam Yus áestuatniun chikichík murikiun itiatniuiti. Núnaka weṉkuk pe̱a̱rak Uunt Yusan iniaktustatui. Tura nuja̱i̱ Yus nu shuaran suir enentáimtamun atsaṉkar aṉkant ajastatui. Núnisaṉ araka neré̱ Yus áestuatniuncha trikiu nekeṉman jimiará ritru ajapén asuitiji̱a̱i̱ pachimpramun tura ritru jeastatuk ajapén asuitincha itiatniuiti. 22 Tura jimiará yampitsan nuíchuka jimiará yámpits uchichin itiatniuiti. Chikichik ni tunaarí̱ tsaṉkurnartinian nuyá̱ chikichnaka Uunt Yusan shiir awajuk áestuatniuiti. 23 Tura uchu tsawant jeamtai nu aents imiatkincha ajastaj tusa Uunt Yus pujamunam Yus Shiir Awajtai̱ Je̱a̱ wá̱i̱ti̱a̱i̱ri̱n Yúsnan pujurin pujana nui̱ nuna itiatniuiti. 24 Yúsnan pujurin nu aents makumarmanum murikiun Yus áestuatin susamun asuitiji̱a̱i̱ mai̱ weṉkuk pe̱a̱rak Uunt Yusan iniaktustatui. 25 Tura Yúsnan pujurin nu aents makumarmanum Yus áestuatniun murikiun sué̱nam tsupik numpe̱n jusa imiatkincha ajasti tusa kuishniumsha uunt uwejnumsha núnisaṉ uunt nawe̱nmasha aya untsuurnumaani̱ṉ yakartiniaiti. 26 Nuyá̱ Yúsnan pujurin asuitin jusa menaari̱ uwejé̱n ishichik yaratniuiti. 27 Tura asuitin menaarí̱ji̱a̱i̱ achíakman untsuur uwejé̱ja̱i̱ asuitin antiṉ siati awaiṉki̱ Uunt Yus íimmianum ukatkatniuiti. 28 Núnisaṉ asuiti ampiniar ni uwejé̱n juáktatna nuya̱ṉka Yúsnan pujurin imiatkincha ajastatna nu aentsu kuíshi̱n tura uunt uwejnumsha núnisaṉ uunt nawe̱nmasha aya untsuurnumaani̱ṉ makumarmanum numpaja̱i̱ yakarma nui̱ṉ asuitiji̱a̱i̱sha yakartiniaiti. 29 Nuyá̱ asuiti ampiniar juáktana núnaka aents imiatkincha ajastatna nuna muuknum yakartatui. Ashí nu túramuja̱i̱ Yúsnan pujurin Yus nú aentsun suir enentáimtamun atsaṉkar aṉkant ajastaj tusa Uunt Yus íimmianum túratniuiti. 30 Núnisaṉ ni jeana nuja̱i̱ yampitsan nuíchuka yámpits uchichin itiatniuiti. 31 Ni jeana nuja̱i̱ chíkichkia ni tunaarí̱ tsaṉkurnartinian nuyá̱ chikichnaka Uunt Yusan takamtsuk áestuatniun nu arantcha araka nere̱ncha itiatniuiti. Tura imiatkincha ajana nuna ashí nu túramuja̱i̱ Yúsnan pujurin Yus nu aentsun suir enentáimtamun atsaṉkar aṉkant ajastaj tusa Uunt Yus íimmianum túratniuiti” Uunt Yus tímiayi. 32 Aents repra suṉkuran achimiak péṉker ajas imiatkincha ajastaj tusa takurmakchaka jú̱nis túratniuiti.*