Riwiitikia
Uunt Yus suir enentáimtamun atsaṉkratin tsawant
16 Arauna jimiará uchirí̱ Uunt Yus pujamunam weankar jákarmatai Uunt Yus Muisaisan áujsamiayi. 2 Nui̱ Uunt Yus Muisaisan chicharuk “Ame yátsum Araun ujakta nisha náṉkamas tsawantin Ti Shiir Tesamunam tarach ejamua nui̱ init waya̱wa̱i̱ṉ. Tura Tunaan Akikmatrukmatai Tsaṉkurnatai̱ya nui̱ weantkashti, jáka̱i̱ṉ. Kame Wikia Yusna Eṉketai̱ etektutai̱ri̱n Tunaan Akikmatrukmatai Tsaṉkurnatai̱ya nui̱ yuraṉminiam wantinkiattajai. 3 Antsu Araunka aya ju̱na túrataj tusa Ti Shiir Tesamunmaṉka waya̱mnia átatui. Tunáa túramunam waaka yamatskaman tura murikiun takamtsuk áestuatniuja̱i̱ waya̱ttawai. 4 Tura Yus takarkur entsatái̱ri̱nkia riniu tarachji̱a̱i̱ pushí takamtsuk najanamun entsartiniaiti. Nuyá̱ awetai̱ri̱sha riniu tarachji̱a̱i̱ najanamun awekatniuiti. Emenmamkesha ríniuja̱i̱ najanamun emenmamatniuiti. Muuknum jiṉkiamátai̱sha ríniuja̱i̱ najanamun jiṉkiámátniuiti. Ju̱ka Yusna akantúkma ásarmatai péṉker maa maas entsartiniaiti.
5 Nuyá̱ ashí Israer shuarka tunáa túramunam áestuatniun jimiará chipiu áishmaṉkan núnisaṉ chikichík murik áishmaṉkan takamtsuk áestuatniuncha Araunai̱ itiartiniaiti. 6 Áitkiasaṉ Arauncha waaka yamatskaman tunáa túramunam Yusan áestuatniuiti. Nuja̱i̱ níniun nuwe̱nun uchirí̱niun Yus suir enentáimtamun atsaṉkar aṉkant ajasártaj tusa túrattawai. 7 Nuiṉkia jimiará chipiu áishmaṉkan Yus pujamunam Yus Shiir Awajtai̱ Je̱a̱ wá̱i̱ti̱a̱i̱ri̱n júkitniuiti. 8 Nui̱ Araun jimiará chipiu áishmaṉkan itiá Uunt Yus áestuatniusha tura tunáa sumamtikia akupkatniusha túkit tusa nekapkamas iis nekaattawai. 9 Tura nekapkamsamunmaya̱ Yusna jíinkinia nu chípiun itiá tunáa túramunam Uunt Yusan áestuatniuiti. 10 Antsu chíkich chipiu áishmaṉ tunáa jukí̱ wétin nekapkamsa iisar nekaamu jíinkinia núnaka Uunt Yusai̱ iwiaakunak itiatniuiti. Nú chipiun kampuntin atsú nuṉkanam akupeak nuja̱i̱ Yus suir enentáimmian atsaṉkar aṉkant ajastatui. 11 Nuyá̱ Arauncha waaka yamatskaman tunaanum Yus áestuatniun Yusai̱ itiatniuiti. Nuja̱i̱ níniun núwe̱nun uchirtiuk Yus suir enentáimtamun atsaṉkar aṉkant ajasártaj tusa nu waakan tunaanum Yusan áestuatniuiti. 12 Nuya̱sha Yus íimmianum Yus áestutai̱ pujana nuya̱n jinia kaí̱ri̱ kapa̱a̱n jusa kuṉkuin áestai̱niam eṉkea tura kuṉkuin nekeṉman jimiará atsakak tarach ejamu á̱a̱wini̱ júkitniuiti. 13 Nui̱ Uunt Yus pujamunam kuṉkuin áestai̱niam jinia kaí̱ri̱ kapa̱a̱munam kuṉkuinian eṉkea áestak mukuintiuri̱sha Yusna Eṉketai̱ etektuktai̱ri̱n Tunaan Akikmatrukmatai Tsaṉkurnatai̱n mash amuattawai. Nuna túrakka Arauncha jákashtatui. 14 Nuyá̱ waaka yamatskama numpe̱n tsara uwejé̱ja̱i̱ antiṉ Tunaan Akikmatrukmatai Tsaṉkurnatai̱n yantamén etsa̱ tatainmaani̱ ukatkatniuiti. Tura nú numpaja̱i̱ṉ Tunaan Akikmatrukmatai Tsaṉkurnatai̱ nákari̱ncha uká ukateakua siati ejetniuiti.
15 Nuyá̱ jiinkí̱ Israer shuara tunaari̱ncha Yus áestuatniun chipiu áishmaṉkan sue̱n tsupirak mátniuiti. Tura nuna numpe̱ncha tarach ejamu áwiini̱ júkitniuiti. Jukí̱ Tunaan Akikmatrukmatai Tsaṉkurnatai̱n yantamén tura nákari̱ncha waaka yamatskama numpe̱ja̱i̱ túrania nútiksaṉ chipiu numpe̱ja̱i̱sha túrattawai. 16 Israer shuar imiatkímpra ajasmancha tura Yus wakeramun nakitrar tura ashí tunaan túramuja̱i̱ Ti Shiir Tesamunam imiatkímpra awajsaru ásarmatai Ti Shiir Tesamun imiatkincha awajsatniun waaka yamatskama numpe̱ja̱i̱ túrania nútiksaṉ chipiu numpe̱ja̱i̱sha ukatkatniuiti. Núnisaṉ Israer shuar imiatkímpra ajasáru matsatainia nuna ajapéri̱n Yus Shiir Awajtai̱ Je̱a̱sha pujá asa imiatkímpra ajasuíti. Tuma asamtai Yus suir enentáimtamun atsaṉkar aṉkant ajasat tusa waaka yamatskama numpe̱ja̱i̱ túrania nútiksaṉ chipiu numpe̱ja̱i̱sha ukatkatniuiti.
17 Arauncha ni tunaari̱n, nuwe̱nun uchirí̱niun tura ashí Israer shuarnancha Yus suir enentáimtuiniamun atsaṉkar aṉkant ajasat tusa Ti Shiir Tesamunam ni jiinmam init pujurai̱ yaaksha Yus Shiir Awajtai̱ Je̱e̱n waya̱shtiniaiti. 18 Nuyá̱ jiinkí̱ Uunt Yus pujamunam Yus áestutai̱ pujana nu tunáa máatramtai Yus suir enentáimtamun atsaṉkar aṉkant ajasat tusa waaka yamatskama numpe̱n chipiu numpe̱ja̱i̱ pachimiar ashí kachuri̱n yakartiniaiti. 19 Tura Yus áestutai̱n Israer shuar tunaan túrawar imiatkímpra awajsamu asamtai uwejé̱ja̱i̱ numpa pachimpramun antiṉ uká ukateakua siati ejé imiatkincha awajás Yusai̱ surumakartatui.
20 Nuyá̱ Araun Ti Shiir Tesamunun nuyá̱ Yus Shiir Awajtai̱ Je̱a̱nuncha tura Yus áestutai̱niuncha Yus suir enentáimtamun atsaṉkar aṉkant ajasat tusa umik chipiu áishmaṉ iwiaakun itiatniuiti. 21 Tura Araun chipiu áishmaṉ iwiaaku muuke̱n uwejé̱n mai̱ awantas Israer shuar Yus wakeramun nakitrar umikchamuri̱n tura ashí tunaari̱n chípiun ujaktatui. Túramtai chíkich aents anaitiukma jukí̱ kampuntin atsú nuṉkanam chípiun akupkatniuiti. 22 Tura aents anaitiukma nu chipiu áishmaṉkan kampuntin atsunum jukí̱ akupak ikiuttawai. Túram nu chípiusha Israer shuara tunaari̱n ashí yaruak aents atsamunam wétatui.
23 Nuyá̱ Araun Ti Shiir Tesamunam waya̱taj tusa riniu pushí entsarainia núnaka Yus Shiir Awajtai̱ Je̱e̱n wayá̱ áimiar ikiustiniaiti. 24 Nui̱ṉ imiatkincha awajsámunmaṉ entsá jukí̱ máitniuiti. Nuna tura ni pushri̱n entsar jiinkí̱ ni tunaari̱nniun murikiun takamtsuk aestua núnisaṉ ashí Israera tunaari̱ncha murikiun takamtsuk aestua nuja̱i̱ Yus suir enentáimtamun atsaṉkar aṉkant ajastatui. 25 Núnisaṉ tunaanum áestamu taṉkú machari̱ juaka núnaka Yus áestutai̱niam áesatniuiti. 26 Nuyá̱ chipiu áishmaṉkan tunáa sumamtikiamun jukí̱ akupak ikiunia nusha mai̱ nijiamatniuiti. Nuna tura matsamkamunam waya̱tniuti. 27 Nuya̱ṉka waaka yamatskamchin chípiuja̱i̱ tunaanum áesamua nuna numpe̱nka Yus suir enentáimtamun atsaṉkar aṉkant ajasat tusa Ti Shiir Tesamunam jukimiua nuna tiáruri̱nkia nuape̱ncha namaṉké̱ncha íji̱ntiuk matsamkamunmaya̱ arant júkiar áesawartatui. 28 Tura nuna aesa nusha mái̱ nijiamatniuiti. Nuna tura matsamkamunam waya̱tniuiti.
29 Ju̱ akupkámu átumka peṉké iniaṉnatsuk umiktiniaitrume. Siati nantutin tias tsawant tsawa̱a̱munam atumek yajauch túramuram nekamatarum. Tura takatcha takaschattarme. Núnisaṉ Israer shuartirmeka tuke umiktiniaitrume tura yajaya̱ aents atumji̱a̱i̱ pujuinia nusha ashí umikiartiniaiti. 30 Warí nu tsawantinkia átum imiatkincha ajastin umíakrumin atumí tunaari̱n Yus suir enentáimtamu atsaṉkar aṉkant ajastatui. Nu túramuja̱i̱ atumsha Uunt Yus iisam imiatkincha ajastatrume. 31 Kame ayamtai̱ tsawantinkia áyamkuram matsamsarum atumek enentáimtumasrum átumka yajauch túramuram nekamatarum. Ju̱ akupkámu átumka peṉké iniaṉnatsuk umiktiniaitrume. 32 Nuiṉkia ni aparí̱n akintrukat tusa Yúsnan pujurniu uuntri̱ ajakui asuitiji̱a̱i̱ muuknum ukatkar anaikiamua nu Yus suir enentáimtuiniamun atsaṉkar aṉkant ajastatui. Tura nuka riniu pushí najanamu Yusna pujurkur entsatai̱ pushin nu tsawantinkia entsartatui. 33 Nuna tura Ti Shiir Tesamununcha tura Yus Shiir Awajtai̱ Je̱a̱nuncha, Yusna áestutai̱niuncha, Yúsnan pujurniununcha nu arant ashí Israer shuarnancha Yus suir enentáimtuiniamun atsaṉkar aṉkant ajastatui. 34 Ju̱ akupkámu átumka peṉké iniaṉnatsuk umiktiniaitrume. Ashí Israer shuara tunaari̱n Yus suir enentáimtuiniamun atsaṉkar aṉkant ajasat tusar ashí uwitin chikichkí túratniuitrume” tímiayi Uunt Yus. Tura Muisaissha Uunt Yus akupkámia tímiatrusaṉ umirkamiayi.