Riwiitikia
Taṉku Yus áestuatin jintíamu
17 Uunt Yus Muisaisan chicharuk 2 “Arauncha uchirtiuk tura ashí Israer shuarja̱i̱ chicharkum Uunt Yus jú̱nis tawai tiartá. 3 Yaaksha Israer shuarnumia̱ waakan nuíchuka murikiun nuíchuka chípiunkesha nuiṉ matsamkamunmaṉ tura a̱a̱ṉsha máyat 4 Yus áestuatniun Yus Shiir Awajtai̱ Je̱a̱ wá̱i̱ti̱a̱i̱ri̱n itiachkuṉka numpa ukaru asa makuumarai. Tura nuja̱i̱ maamnia ajasu asa Israer shuarnumia̱ṉka ji̱i̱ki̱ akupnáktiniaiti. 5 Tuma asamtai ju̱ nekaatarum. Israer shuar matsamkamunmaya̱ arant taṉkun mátaj tákuṉka Yus Shiir Awajtai̱ Je̱a̱ wá̱i̱ti̱a̱i̱ri̱n Yúsnan pujurniuí̱ itiati. Túramtai Uunt Yusan shiir awajuk áestuattawai. 6 Túramtai Yúsnan pujurin Yus Shiir Awajtai̱ Je̱a̱ wá̱i̱ti̱a̱i̱ri̱n Yus áestutai̱ pujana nuna numpaja̱i̱ ukatak macharí̱nkia áestuattawai. Tura Uunt Yus ti shiir kunkuan mayatak shiir enentáimsat tusa túrattawai. 7 Túrasha íwianchkia atakka peṉké áestuashtatrume. Warí iwianchin tikishmátrar shiir awajainiaka tsanirmatniua núnisaiti. Atumsha tura ukunam akiiniawartatna nusha ju̱ akupkámu peṉké iniaṉnatsuk umiktiniaitrume. 8 Áintsamek ju̱sha tiartá. Yaaksha Israer shuarkesha tura yajaya̱ nui̱ atumji̱a̱i̱ pujuinia nusha Yus taṉku áestuatniun tura takamtsuk áestuatniuncha 9 Yus Shiir Awajtai̱ Je̱a̱ wá̱i̱ti̱a̱i̱ri̱ya̱ tímianai Uunt Yus áestuatniun itiachkuṉka nú aishmaṉsha nuja̱i̱ maamnia ajasu asa Israer shuarnumia̱ṉka ji̱i̱ki̱ akupnáktiniaiti.
Numpa yúatin surimkiamu
10 Áintsaṉ Israer shuar nuíchusha yajaya̱ aents atumji̱a̱i̱ pujuinia nu numpá yuan wainkianka nuja̱i̱ maamnia ajasu asamtai kajerkan Israer shuarnumia̱ṉka ji̱i̱ki̱ akupkáttajai. 11 Warí aya̱sh iwiaakmaka numpanmaiti. Tuma asamtai Yus áestutai̱niam Winia áesturkuram suir enentáimtamu atsaṉkar aṉkant ajasmintrum tusan atumíin numpan súsaitjiarme. Warí Yus aentsun suir enentáimtamu atsaṉkar aṉkant awajsaniuka númpaiti. 12 Tuma asamtai Israer shuartiram tura yajaya̱ aents atumji̱a̱i̱ pujuinia nusha numpa yúashtiniaitrume tájarme.
13 Núnisaṉ Israer shuartiram tura yajaya̱ atumji̱a̱i̱ pujuinia nu kuntinian tura nanamtinniasha yutai̱ ainia nuna yuátaj tusa maakka kuntuje̱n tsupirak numpe̱n chukuikiá awajtus nuṉkaja̱i̱ yuturti. 14 Warí ashí aya̱shi iwiaakmari̱ṉkia númpaiti. Tuma asamtai Israer shuaran ujaakun ‘Ashí aya̱shi iwiaakmari̱ṉkia númpaiti. Tuma asamtai náṉkamas aya̱shi numpé̱ yuáwairap. Yaaksha nuna yúakka ji̱i̱ki̱ akupnáktatui’ tímiajai. 15 Tura Israer shuar núnisaṉ yajaya̱ṉsha kúntin yúatin tsaṉkamkamua nuna ántar jakaan tura yajasma esaim jakaankesha wainiak yuaṉka imiatkímpra ajasu ásar mai̱ tura nijiamá kashi ajamam pujusártatui. Túrunaṉka ataksha imiatkincha ajasártatui. 16 Antsu mai̱ nijiamatsuk pujakka tuke makumaru pujuttawai” Uunt Yus tímiayi.