Riwiitikia
Yúsnan pujurin imiatkincha ártin
21 Uunt Yus Muisaisan chicharuk “Yúsnan pujurin Arauna uchirí̱ chicharainiakum ‘Aents chikichkisha ní shuari̱ya̱ jakaan antiṉ imiatkímpra ajascharti 2 antsu ni nekas shuari̱nkiuiṉkia aparí̱ṉsha nukurí̱ṉsha uchirí̱ṉsha nawantri̱ṉsha 3 núja̱i̱nchuka ni umái̱ áishmaṉja̱i̱ tsaniṉcha niin pujá tura nuatnaikiachuitkiui̱ṉkia antsu nui̱ṉkia umai̱nkia nisha imiatkímpra ajasminiaiti. 4 Antsu náṉkamas shuara núniska imiatkin ajaschartiniaiti. Warí niṉkia ní shuari̱ uuntri̱ áiniawai. 5 Muuke̱ncha awar kesá kesá awajsashtiniaiti tura susurí̱ náṉkatkamuri̱ncha tsupirashtiniaiti núnisaṉ aya̱shniumsha akamarchatniuti. 6 Núnisaraṉ ni Yusri̱niu tunaarincha ártiniaiti tura ni Yusri̱ náari̱ncha peṉké yajauchikia chicharkachartiniaiti. Warí ni áiniawai Yus susamun áestuawartincha tura ni Yusri̱ páṉkri̱n súsartincha tuma ásar tunaarincha ártiniaiti. 7 Yúsnan pujurniuka nuwa̱ aya̱shí̱ súrin ainia nuja̱i̱ núja̱i̱nchuka áishmaṉja̱i̱ pujuuja̱i̱ nuatnaikiashtiniaiti. Núnisaṉ nuwa̱ ajapamuncha nuatkashtiniaiti. Warí niṉkia Yus íktusmaiti. 8 Tuma asamtai tunaarinchaiti títiniaitrume, warí, níchukait atumí Yusri̱n páṉkan súaka. Atumíincha tunaarincha átiniaiti, warí, Witjiai Tunaarincha awajkartin Uunt Yus. 9 Kame Yúsnan pujurniu nawantri̱ aya̱shí̱n súrin peṉké yajauch ajaska ni aparí̱n peṉké yajauch awajui. Tuma asamtai nuka jinium áesatniuitrume.
10 Nuamtak yachinmaya̱ṉ asuiti muuknum ukatkar Yúsnan pujurniun uuntri̱ atí tusar anaikiamuka intiashí̱n atirka iniaisashtiniaiti núnisaṉ ní pushiri̱ncha já̱a̱rchatniuiti. 11 Núnisaṉ aents jaka tepamunmasha waya̱shtiniaiti. Ni aparí̱ya̱itkuisha tura ni nukurí̱ya̱itkiuisha imiatkímpra áchatniuiti. 12 Nu arantcha Yus Shiir Awajtai̱ Je̱a̱nmaya̱ṉka jíinkishtiniaiti kame ni Yusri̱ Shiir Awajtai̱ Je̱a̱ncha imiatkímpra awajkashtiniaiti. Witjiai Uunt Yus. 13 Tura nuatkusha nuwa̱ natsach áishmaṉja̱i̱ tsaniṉchan nuatkatniuiti. 14 Waje̱ncha tura áishri̱ji̱a̱i̱ ajapnaiyancha nuyá̱ nuwa̱ áishmaṉja̱i̱ tsaniṉkiuncha núnisaṉ nuwa̱ aya̱shí̱n surinniasha nuatkashtiniaiti. 15 Nuna túrakka ní weantka ní shuarnumka imiatkímpra awajkashtatui. Warí, Witjiai Tunaarincha awajkartin Uunt Yus’ titiá” tímiayi.
16 Uunt Yus Muisaisan áujeak chicharuk 17 “Araun chicharkum ‘Ukunam amé shuar amé weanmaya̱ ártatna nuka tunamánkiaruka chikichkisha ni Yusri̱ páṉkri̱n susattsaṉka weamkashtiniaiti. 18 Kame tunamánkiaruka chikichkisha peṉké weankáshtiniaiti, kusurúksha shutuapkesha tsupikmaksha nuyá̱ aya̱shí̱n nuakuksha, 19 nawe̱nmaṉsha núja̱i̱nchuka uwejnumkesha kupiniakusha, 20 punuakuksha sútarchichisha ji̱ puju peemprukmaksha teremúrkaksha núja̱i̱nchuka kuchaprúkuksha tura suki̱ yajauch ajasúksha weankáshtiniaiti. 21 Chikichik aentskesha Araun weanmaya̱ tunamánkiaruka Yus susamu áiniana núnaka Uunt Yusan áestuachartiniaiti. Tunamáru asa paṉ Yus súsatniunkesha weamkachartiniaiti. 22 Antsu Ni Yusri̱ páṉkri̱nkia tura Yusna ti shiir akantúkmancha núnisaṉ ashí Yusna akantúkmancha yuámniaiti. 23 Túrasha tunamáru asa tarach ejamua nui̱ á̱a̱wini̱ṉkia naṉkaamakchatniuiti núnisaṉ Yus áestutai̱nmasha weankáshtiniaiti. Nuna túrakka Yus Shiir Awajtai̱ Je̱a̱rnasha imiatkikia awajkachartatui. Warí, Witjiai Tunaarincha awajkartin Uunt Yus’ tawai tiartá” tímiayi. 24 Nu tutai nuya̱ṉka Muisais Araunan tura Arauna uchirí̱n núnisaṉ Israer shuarnaka ashí ujakármiayi.