Riwiitikia

Yúsnan pujurin ainia nu umikiartin

22 Nuyá̱ Uunt Yus Muisaisan áujeak chicharuk 2 “Araun tura Arauna uchirí̱ ju̱ ujakárta. Winia akankámu áiniana nuja̱i̱ Winia Tunaarincha Náarum imiatkímpra awajka̱i̱j tusar Israer shuarnum Yusna akantúkma áiniana nuna tsuntsumpruá tí arantúkmaja̱i̱ takasárti. Witjiai Uunt Yus. 3 Tura ju̱sha ujakárta. Ukunam atum weanmaya̱ aents chikichkisha atum shuar imiatkímpra ajasuítiat Uunt Yusna akantúkman Israer shuar akantúkar susamun weantúkka nú aentska Wini̱i̱ya̱ṉka ji̱i̱kmia átatui. Witjiai Uunt Yus. 4 Aents chikichkisha Araun weanmaya̱ kuchaprukuitkiuṉka núja̱i̱nchuka aents uchi najanatai̱n ájapkuṉka imiatkincha ajaamam Yusna akantúkma áiniana núnaka yúashtiniaiti. Kame aents jaká antiṉ imiatkímpra ajasún antiṉkiusha núja̱i̱nchuka aents uchi najanatai̱n ájapusha 5 túrutskesha nuṉká japinias yujá áiniana nuna antiṉ imiatkímpra ajasusha núja̱i̱nchuka aents warinkisha takas imiatkímpra ajasún antiṉkiusha 6 nu aentska ki̱i̱miam imiatkímpra ajasu pujus Yusna akantúkma áiniana núnaka yúashtiniaiti. Túraka aya̱shí̱n entsaja̱i̱ nijiamam yuámniaiti. 7 Etsa̱ akaikímtai imiatkincha ajasu juáktatui. Antsu nuya̱ṉka Yusna akantúkma áiniana núnaka yuámniaiti. Warí jú̱chakait ni yurumkari̱ya. 8 Tura imiatkímpra ajasá̱i̱j tusa kuntin mejearuncha nuyá̱ yajasma esái achia̱rmancha yúashtiniaiti. Witjiai Uunt Yus. 9 Kame umikchamunam iik makura̱i̱j tura imiatkímpra awajkámunam jáka̱i̱j tusar niṉkia Wi akupkámun péṉker enentáimtusar umikiartiniaiti. Warí, Witjiai Tunaarincha awajkartin Uunt Yus.

10 Yajaya̱ aentska chikichkisha Yus akantúkma áiniana núnaka yúachartiniaiti. Yúsnan pujurniu irari̱sha tura kuitji̱a̱i̱ takakmak nui̱ pujasha Yus akantúkma áiniana núnaka yúashtin áiniawai. 11 Antsu Yúsnan pujurniu iniatairi̱ ni kuítri̱ji̱a̱i̱ sumakma tura iniatai̱ nui̱ akiiniawaru áiniana nuka nu yurumkanka yuamnia áiniawai. 12 Núnisaṉ Yúsnan pujurniu nawantri̱ Yúsnan pujurchaja̱i̱ nuatnaikiasha Yus akantúkma núnaka yúashtiniaiti. 13 Túrasha Yúsnan pujurniu nawantri̱ waje̱ juak núja̱i̱nchuka áishri̱ji̱a̱i̱ ajapnaiya uchinkia takuscha nátsauya núnis aparí̱ je̱e̱n taa pujakka antsu nui̱ṉkia aparí̱ yurumkari̱ṉkia yuámniaiti. Túrasha chíkich aentska núnaka peṉké yúashtiniaiti. 14 Yaaksha nékatsuk Yusna akantúkman yuaṉka nuna kuitri̱ urutmá jea nuna seṉku nakakmanumia̱n chikichik nakasmachin Yus akantúkma nú yurumámu kuítian patak Yúsnan pujurniun súsatniuiti. 15 Israer shuar Uunt Yusan susamunka Yúsnan pujurin Yusna akantúkman imiatkímpra awajkachartiniaiti. 16 Tuma asamtai Israer shuar Yusna akantúkman yuíniak niṉki makurara̱i̱ tusar Yúsnan pujurin núnaka tsaṉkatkachartiniaiti. Warí, Witjiai Tunaarincha awajkartin Uunt Yus tawai tiartá” tímiayi Muisaisan.

Taṉku Yus súsatin akupkámu Yúsnan pujurin umiktin

17 Uunt Yus Muisaisan áujuk chicharuk 18 “Araun tura Arauna uchirí̱n núnisaṉ Israer shuarka ashí chicharainiakum ‘Yaaksha Israer shuarnumia̱ núja̱i̱ṉchuka yajaya̱ aents Israernum pujuinia Yus akupkámun umíak túrutskesha ni súsatniun wakerak Uunt Yus takamtsuk áestuatniun súakka 19 susamu péṉker atí tusaṉka wáakaitkiui̱sha murikiuitkiuisha tura chípiuitkiuisha áishmaṉ peṉké tunamárcha átiniaiti. 20 Taṉku tunamáruka peṉké itiashtiniatrume. Warí nuka péṉkeraiti tunashtatui. 21 Núnisaṉ yaaksha ju̱na umiktatjai tiniu asa núja̱i̱nchuka ni súsatniun wakerak aṉkant pujustin áestutai̱n Uunt Yusan súakka susamu péṉker atí takurkia waaka tura chipiu núwaitkiusha peṉké tunamárcha súsatniuti. 22 Taṉku kusurúksha nawe̱ kupiniakuksha warirí̱ṉsha tsupirkamusha turirkáksha teremúrkaksha kuchaprúkuksha Uunt Yuska súsashtiniaitrume. Taṉku túmaka Uunt Yus áestutai̱nmaṉka awaṉchatniuitrume. 23 Kame ame wakerakum suákmeka antsu nuiṉkia waaka núja̱i̱ṉchuka murik áishmaṉ anu úuntaitkiuisha túrutskesha tunamáruitkiuisha susamniaitme túrasha ju̱na umiktatjai tiniu asam súakminkia antsu nui̱ṉkia péṉkeraiti tunashtatme. 24 Taṉku suki̱ emesturmaka tura jurusmáksha núja̱i̱nchuka tsupirkamuksha Uunt Yuska súsashtiniaitrume. Nuka atumí nuṉke̱nka peṉké túrashtiniaitrume. 25 Núnisaṉ atumí Yusri̱ yurumkari̱n yajaya̱ aents taṉku tunamáku suíniakui achikchatniuitrume. Warí niṉkia tunamáku áiniawai. Tuma ásarmatai péṉkeraiti tíchatniuitrume’ tawai titiá” tímiayi.

26 Uunt Yus Muisaisan áujuk chicharuk 27 “Waakasha muriksha tura chípiusha yama akiiniaṉka ni nukurí̱ji̱a̱i̱ siati tsawant pujustatui. Tura uchu tsawant naṉkaamas nuyá̱ emka antsu nui̱ṉkia Uunt Yus takamtsuk áestuatniusha péṉkeraiti. 28 Kame waaka tura murik nuwa̱sha nu tsawantinkikia ni uchirí̱ji̱a̱i̱ṉkia apatkarmeka máshtiniaitrume. 29 Tura Uunt Yus yúmiṉkiakum suákmeka itiur túrawakminia Uunt Yus péṉkeraiti tíminiait tímiatrusam túrata. 30 Nu tsawantini̱ṉ amukta tura kashiniuka peṉké ikiusaip. Witjiai Uunt Yus. 31 Chícham akupkámu umiktin Wi najankamu ashí arantúktarum túrakrum péṉker enentáimtusrum umiktarum. Witjiai Uunt Yus. 32 Winia Naar Tunaarincha nu imiatkímpra awajkairap. Warí Wikia Israer shuarnum Tunaarincha awajsamu átatjai. Warí, Witjiai Tunaarincha awajkartin Uunt Yus. 33 Atumí Yusri̱ átaj tusan Ejiptunam matsatrumin jí̱i̱rmiajrume. Witjiai Uunt Yus” tímiayi.