Riwiitikia

Arakmashtai̱ uwí

25 Senái náinnium Uunt Yus Muisaisan áujuk chicharuk 2 “Israer shuar áujsarta tura chicharainiakum ‘Nuṉkan atumín Wi amastatjarmena nui̱ waya̱wakrumni̱ṉkia núṉkaka Uunt Yusai̱ áyamu asa arakmashtiniaiti. 3 Sais uwí nuṉkemínkia arakmattame tura úwarmesha sais uwí ipiantram nere̱sha júuktatme. 4 Antsu uwí siátitinkia núṉkaka takamtsuk arakmashtatui. Nú uwinkia ayamtai̱ Uunt Yusna atí tusa akanák shiir awajsatniuiti. Ame nuṉkemíncha arakmashtatme núnismek úwarmesha ipiankashtatme. 5 Tura ame arakrum júukmanum araachmaitiat niṉki nerenana nusha júukchattame ántsamek uwa ipiankachmaitiat niṉki nerenakuisha nusha júukchattame. Kame nu uwikia nuṉka arakmashtai̱ uwiyaiti. 6 Túmaitiat arakmashtai̱ uwitin nuṉká tsapattana nuja̱i̱ amesha tura ame iniatai̱ram nuwa̱sha áishmaṉsha núnisaṉ takarniúrmesha nuyá̱ írar ámiji̱a̱i̱ pujuttana nusha nu yuáttarme. 7 Tura nui̱ ashí nerettana nuka ame waakarmin tura ashí yajasma ame nuṉkemín írunna nuna yurumkari̱ ártatui.

Tsaṉkurnatai̱ uwí

8 Nuya̱ṉka siati semana uwiniu nekapmarta. Kame núnaka siati uwí awaiṉkim siatia nui̱ tusan tajai. Tuma asa siati semana uwiniuka kuaraintinuíwi uwí átatui. 9 Túram nantu siátitin tsawant tiásnum kachu umpuarta. Tura aṉkant ajastin tsawantinkia ashí nuṉkemín kachu umpuartatme. 10 Antsu uwí seṉkuintiaka akankarum imiatkímprachma awajsatarum túrarum aṉkant ajastin tsawantaiti tusarum ashí aentsnum atumí nuṉke̱nka etserkatarum. Kame nú uwikia tsaṉkurnatai̱ uwiyaiti. Tuma asamtai aṉkant aṉkant ní nuṉke̱nak awaiṉkí̱ ní nuṉke̱ni̱ṉ waketkitniuiti núnisaṉ aentssha ní shuarnumaṉ waketkiartiniaiti. 11 Warí uwí seṉkuintiaka tsaṉkurnatai̱ uwiyaiti. Tuma asamtai arakmatcha arakmashtatrume tura niṉki nerenana nusha júukchattarme. Ántsarmek úwasha ipiankachmaitiat nerenakuisha júukchatniuitrume. 12 Kame tsaṉkurnatai̱ asamtai akantúkmaiti túmakrun arakchamaitiat nuṉká niṉki nereana nu yuáttarme. 13 Ju̱ tsaṉkurnatai̱ uwitinkia aṉkant aṉkant atumí nuṉke̱ni̱ṉ waketkittiarme. 14 Kame yaaksha ní shuari̱n warinkisha súrakka núja̱i̱nchuka warinkisha súmakka ni yachi̱n anaṉkashti. 15 Tura tsaṉkurnatai̱ uwiniumia̱ urutmá uwiya naṉkaamasa nuja̱i̱ métek amé aentska sumarkattame nuyá̱ nisha chíkich uwitin urutmá juwá nuja̱i̱ métek surutmaktiniaiti. 16 Kame tsaṉkurnatai̱ uwí jeatin núkap táasmatai̱ṉkia amesha núkap kuitji̱a̱i̱ suruktatme tura nu uwí takí̱ wéakui̱ṉkia amesha kuítriṉkia nuṉkach itiaram suruktatme. Warí auka urutmá júuktin taasa nuna niṉkia amaawai. 17 Yaaksha ni shuari̱n wáitkiaschati. Antsu áyatik ame Yúsrum ashamkata, warí Wikia Uunt Yusaitjiai atumí Yusri̱.

18 Tura chícham umiktin nuyá̱ akupkámu umiktin Wi najankamuka ashí arantúktarum túrakrum péṉker enentáimtusrum umiktarum. Túmakrumka ju̱ nuṉkanmasha sapijmiatsuk aṉkant matsamsattarme. 19 Nuṉkasha tí peṉker neremtiktiatui túrakrum nutsumam atumí yurumkari̱ṉ yuáttarme núnisrumek nui̱ṉkia sapijmiatsuk tí peṉker matsamsattarme. 20 Kame chichakrum “¿Uwí siátitincha wari̱ṉ yuátaj warí peṉké arakmashtatjishi tura peṉkechuk júukchartataj?” tichatarmeash. 21 Túrasha uwí sáistin péṉkernum yumiṉkrattajrume. Wi túramtaikia yurumak menaintiú uwí yúatin átatui. 22 Antsu uwí úchutinkia arakmattarme túrasha yaunchu júukmak yuáttarme. Kame arakmamu júuktin uwí nuiwi jeamam yaunchu júukmak nuke yútatrume. 23 Núṉkaka túkeka surunkashtatui. Warí núṉkaka Winia áiniawai tura átumka Wíji̱a̱i̱ṉkia íraraitrume túmaitiatrum áyatik Wi apujsamu pujarme. 24 Tuma asamtai átum pujarmena nú nuṉka chíkich seamuitkiuiṉkia awaketai uwí jeamtai nú nuṉka awaiṉkimnia ainti tusarum tsaṉkamkatniuitrume. 25 Kame amé shuar peṉké kuítrincha ajas níniun warinkisha surukmatai̱ṉkia ni shuar taa ni yachí̱ surukai nuna sumak ataksha awaiṉkitniuiti. 26 Antsu nu aentsu shuari̱ súmak ataksha awaṉtukmin atsakuiṉkia tura niṉki awaṉtumkittsa kuítian niṉki irurka 27 antsu nui̱ṉkia urutái surukma nuna uwin nekapmar urutmá uwiya taasa nunak aents sumakunka akiktatui núnaka tura ataksha awaṉtumkittiawai. 28 Kame nuna túratniun tujintkiamtaiṉkia antsu nui̱ṉkia tsaṉkurnatai̱ uwí jeamam nákastiniaiti. Tura tsaṉkurnatai̱ uwí jeamtai̱ṉkia nui̱ṉkia ataksha aṉkant júawai. Túrunaṉka emka nérenniuri̱ni̱ṉ wáketui.

29 Tura pepru wenuke̱ iwiartukmanum je̱a̱ init pujan súrakka sumakar ataksha awaiṉkitniun chikichik uwí takamtsuk takakui. Kame sumakar ataksha awaṉtumkitniuka áyatik chikichik uwichik aṉkant awai. 30 Tura chikichik uwí takamtsuk naṉkaamasmatai akikmak ataksha awaiṉkitniun tujintkiaṉka je̱á̱ pepru wenuke̱ iwiartukmanum init pujá sumakmaka sumakainia nuna tura ni uchirí̱niu tuke ajawai. Tura tsaṉkurnatai̱ uwí jeamtaisha aṉkantka peṉké juákchattawai. 31 Antsu je̱á̱ pepru wenuke̱ iwiartukchamunam pujuinia nuka nuṉka núnis íimsatniuiti. Nuka sumakar ataksha awaiṉkimnia áiniawai. Núja̱i̱nchuka tsaṉkurnatai̱ uwitin ataksha aṉkant júawai. 32 Tura Riwí shuara pépruri̱nkia nui̱ je̱á̱ pujuiniaka tuke awaiṉkimnia áiniawai. 33 Kame Riwí shuar ní pepruri̱n je̱a̱n surukka tura súmak ataksha awaiṉkichmataiṉkia tsaṉkurnatai̱ uwitin ataksha aṉkant júawai. Warí Riwí shuar pépruri̱n je̱a̱ írunuka niniu áiniawai Israer shuarnumka. 34 Antsu ni pépruri̱n ayamach nuṉka írunna nuka peṉké surunkashtiniaiti. Warí nuka tuke níniuk áiniawai.

35 Kame ame yátsum peṉké takurmakcha ajas kuítniasha peṉké takurmakchakuiṉkia ame apujsam ame wainkiattame. Írara nútiksam ame apujsam pujursattame. 36 Wariṉkish íkiakmesha amastiniana nuna naṉkaamas jurukip tura patasmeksha surusta tiip. Antsu ame Úunt Yusrum ashamkata túrakminkia ame yátsumka ámiji̱a̱i̱ pujustatui. 37 Kuítrum íkiakmesha amastinia nuna naṉkaamas patasam jurukip tura yurumak súakmesha pátasmek awaṉturkimnium tusam susaip. 38 Kame atumí Yusri̱ átaj tura Kanaan nuṉkan amastájrum tusan Ejiptunam matsatrumin jí̱i̱rmiajrumna nuitjiai Wikia Uunt Yus atumí Yusri̱.

39 Tura ame yátsum ámiji̱a̱i̱ pujá peṉké kuítrincha ajas aminí̱ surumakmataiṉkia iniatai̱ya nútiksamka takamtiksashtatme. 40 Kuitji̱a̱i̱ takakma núja̱i̱nchuka írar ámiji̱a̱i̱ pujá núnis pujustatui tura tsaṉkurnatai̱ uwí jeamam áminkia takartámsattawai. 41 Nuya̱ṉka ame je̱e̱miya̱nka uchirí̱ji̱a̱i̱ aṉkant jíinkiar ni aparí̱ nuṉke̱n ní shuarnum waketkiartatui. 42 Warí niṉkia Winia takartin áiniawai. Ejiptunmaya̱ Wi jí̱i̱rarma tuma ásar niṉkia iniatai̱ya nútiksarkia surunkachartiniaiti. 43 Ní uuntri̱ ajasmesha ti kakaram takamtikkium wáitkiasaip antsu ame Yúsrum ashamkata. 44 Ame iniatairmeka nuwa̱sha áishmaṉsha uunt nuṉka mátsatkamu atumí nuṉke̱n ayamach matsatna nuyá̱ ártiniaiti. Antsu nuya̱ṉka iniatai̱ram nuwa̱sha áishmaṉsha páchitsuk sumakminiaitme. 45 Núnisrumek yajaya̱ aents tura ni shuari̱ atumíin pujuiniana nuna uchirí̱ atumí nuṉke̱n yajutmakarma áiniana nusha atumí iniatairi̱ árat tusarum sumakminiaitrume. 46 Túrarum átum jákrumsha atumí uchirí̱sha ikiurkímniaitrume. Antsu nu aentska atumí iniatairi̱ tuke árminiaiti antsu atumí yachi̱ Israer shuara uchirí̱ṉkia nuamtak atumí iniatairi̱ awajnáisarum wáitkianaisairap.

47 Kame yajaya̱ aents núja̱i̱nchuka átum apujsamu pujá kuítrintin ajasmatai atum shuar nui̱ pujá kuítrincha ajas yajaya̱ aentsnum núja̱i̱nchuka átum apujsamu pujana nui̱ túrutskesha nu aentsu uchirí̱ nui̱ pujuiniamunam surumakmataiṉkia 48 surumaku auk sumakar ataksha awaiṉkimniaiti. Ni yachi̱ṉsha sumak ataksha awaiṉkimniaiti. 49 Núja̱i̱ṉchuka ni kaná aparí̱ṉsha túrutskesha ni kaná aparí̱ uchirí̱ṉsha núnisaṉ ni nekas shuari̱ṉsha sumakar ataksha awaiṉkimnia áiniawai. Tura kuítian núkap waitmakka imia niṉkisha awaṉtumkimniaiti. 50 Kame nin sumakua nuja̱i̱ warí uwitinia surumakma tura tsaṉkurnatai̱ uwí jeatniusha urutmá uwiya taasa nuna nekaawartiniaiti. Ni surumaktin kuítri̱ṉkia urutmá uwiya taasa nuja̱i̱ métek átiniaiti tura urutmá uwiya nu je̱a̱nam pujusa nuka takakma urutmá akinkiatniuit nuja̱i̱ métek najanamu átiniaiti. 51 Tura tuke untsurí uwí táasmatai̱ṉkia nuja̱i̱ métek urutmá kuitji̱a̱i̱ surumakma nuya̱ṉ nisha kuítian awaṉtuktiniaiti aṉkant ajastaj tákunka. 52 Antsu tsaṉkurnatai̱ uwí jeatin ishichik táasmatai̱ṉkia niji̱a̱i̱ métek nekapmar urutmá uwiya taasa nuja̱i̱ métek akikmaktiniaiti aṉkant juáktajtsaṉka. 53 Kame nui̱ pujuska takakmak pujana núnis uwir uwir pujustiniaiti. Kame ame íimmianum chíkich ni uuntri̱ ajas takamtikiak wáitkiasa̱i̱ tusam peṉké tsaṉkatkashtiniaitme. 54 Tura tsaṉkurnatai̱ uwí jeachmanumaṉ ataksha awaṉnachkuṉka tsaṉkurnatai̱ uwitin ni uchirí̱ji̱a̱i̱ métekrak aṉkant jíinkiartatui. 55 Warí Israer shuara uchirí̱ṉkia Winia takartin áiniawai. Kame Winia takartin asakrumin Ejiptunam matsatrumin jí̱i̱rmiajrumna nuitjiai Wikia Uunt Yus atumí Yusri̱.