Riwiitikia

Shirikip ekeematai̱ asuiti

24 Uunt Yus Muisaisan áujeak chicharuk 2 “Shirikip ekemárma tuke kees aku tsáapin ajat tusam uriwiu asuitiri̱ saar wariji̱a̱i̱ṉsha pachimprachma itiatárum timi Israer shuar akupkarta. 3 Núnaka kí̱akui̱ naṉkama keá keakua tsawai̱t tusa Araun ekemár Yus Shiir Awajtai̱ Je̱e̱n init tarach ejamu nui̱ á̱a̱nini̱ Uunt Yus íimmianum naka apujsattawai. Ju̱ka ukunmasha átum wea uminkiartin akupkámu umiktin tuke najanamuiti. 4 Shirikip eṉkear ekemátai̱ aya kúriji̱a̱i̱ṉ najanamua nui̱ shiripkinkia Uunt Yus íimmianum naka tuke apujtiatui.

Yus Iiji̱a̱i̱ Pujawai Tama Paṉ

5 Trikiu nekeṉma achikiam tuse paṉ najanata. Tríkiuja̱i̱ kuatru ritru naṉkaamas chikichik paṉ najanatniuiti. 6 Sais sais pekakam jimiará pekakma najanmaṉ awa̱tai̱ aya kúriji̱a̱i̱ṉ najanamua nui̱ Uunt Yus íimmianum tuke enentáimtin árat tusam naka awa̱sta. 7 Túram nu paṉ mái̱ pekakmanum peṉké kuṉkuin ikiursata tura nú paṉ Yus kuṉkuin susamun Uunt Yus áestuatniua núnis súsatniuiti. 8 Chícham najanamun Israer shuar ukunmasha tuke umikiartin ásarmatai péṉker pekakam ashí ayampratin tsawantai̱ Uunt Yus íimmianum tuke ikiustiniaiti. 9 Kame akantúkma tesamua nui̱ Araun ni uchirí̱ji̱a̱i̱ yuáwartatui. Warí nuka Uunt Yus takamtsuk áestuatin ti shiir akantúkmaiti. Nuka ukunmasha tuke uminkiatniuiti” tímiayi Uunt Yus.

Yajauch chicháa asutniátin

10 Israer nuwa̱ uchirí̱ aparí̱ṉkia Ejiptunmaya̱uyayi. Tura chíkich uchisha mai̱ nukurí̱sha tura aparí̱sha mai̱ Israernumia̱ṉ nu aentsja̱i̱ Israer matsamkamunam mánaikiarmiayi. 11 Tura Israer nuwa̱ uchirí̱ Yusa náari̱n yajauch chicharak yumiṉkramiayi. Túramtai Muisaisai̱ júkiarmiayi. Ni nukurí̱ náari̱nkia Serumít Tan shuar Tipri nawantri̱yayi. 12 Tura Uunt Yus warí itiurkatarum títiata nuna nekaamam wáinkiatarum tusa sepunam apujsarmiayi. 13 Nuyá̱ Uunt Yus Muisaisan chicharuk 14 “Winia yajauch chichartukainia nuka matsamkamunmaya̱ṉka arant jukitiarum. Túrawakrumin aents nuna antukarainia nu uwejé̱n muuknun awantkarti. Túrawarmatai ashí aents kayaja̱i̱ tukurar máwarti. 15 Túram Israer shuar chicharainiakum ‘Aents chikichkisha ni Yusri̱n yúmiṉkiakka imia niṉki makumawai. 16 Yaaksha Uunt Yusa náari̱n yajauch chicharkuṉka páchitsuk jákatniuiti. Ashí aents kayaja̱i̱ tukurar máwarti. Yajaya̱ írar áentsuitkiusha núja̱i̱nchuka tuke nuya̱itkiusha Yusa náari̱n yajauch chicharkuṉka jákatniuti.

17 Núnisaṉ aents chíkich aentsun akaṉma jákatin tepakui̱ṉkia nisha páchitsuk mantamnatniuiti. 18 Chíkich aentsu taṉkurí̱ awatmia jákatin tepakui̱ṉkia áyatik awaṉtuktiniaiti. Taṉkun tura asa nisha taṉkunak awaiṉkitniuti. 19 Aents chíkich aentsu aya̱shí̱n wariji̱a̱i̱ṉsha emesturka warinia itiurka nisha núnisaṉ túrunati. 20 Ukunchí̱n kupirkaṉka nisha ukunchí̱ṉ kupirnakti tura ji̱n apujtúkka nisha ji̱ṉ apujtúnkati núnisaṉ nai̱n akarkásha nisha nai̱ṉ akarnakti. Kame warinia itiurka nisha núnisaṉ túrunatniuiti. 21 Kame taṉkun maaṉka taṉkunak awaṉtukti antsu aentsun maaṉka nisha mantamnatniuiti. 22 Atumniaka chikichik akupkámu átatui. Yajaya̱ irarsha tura tuke nui̱ pujuusha nunak umikiartiniaiti. Warí Witjiai Uunt Yus atumí Yusri̱’ tawai” tímiayi Muisais. 23 Muisais chichakmatai áishmaṉ Yusa náari̱n yajauch chicharkamtaikia núnaka matsamkamunmaya̱ṉka arant júkiar kayaja̱i̱ tukurar máwarmiayi. Nuna túrawar Israer shuarka Uunt Yus Muisaisan akupkámia núnaka tímiatrusaṉ umikiarmiayi.