Mikías

Anaikiamu tátin etserkamu

5 Suntará pépruri̱ Jerusaréṉká ¡yamaikia ame suntarum irurarta! ¡Ii nemasri̱ téntatmak eṉketmáwarji! Tura Israer shuara sumamtikniuri̱nkia numiji̱a̱i̱ awatiar yapiniam tsupíawartatui. 2 Tura ame Épratanmaya̱ Piriṉkia, Jutá weanmaya̱ imiá uchich ámini̱ṉ, aminí̱ya̱ Israer shuarnum akupin jiintiurkittiawai. Niṉkia ti yáunchuya̱iti. Kame náṉkachu asa tuke pujuwiti.* 3 Túrasha nuwa̱ takustinia nu tsawantri̱ jeamam núnisaṉ chíkich nuṉkanam Israer shuar matsatainia ní shuarja̱i̱ iruntratai tusar waketkiar kaunmam Uunt Yuska ní shuarnaka ajapa iniaisartatui. 4 Uunt Yusa kakarmari̱ji̱a̱i̱ núnisaṉ Ni Yusri̱ Uunt Yusa naari̱ ti naṉkamantua nuja̱i̱ ni shuari̱ wainiainiam imiatkincha matsamsartatui. Warí Nisha nuṉka náṉkatrana ímianai naṉkamantu awajsamu átatui. 5 Tura Niṉkia aṉkant imiatkincha pujutainti.

Israer aṉkant awajsamu

Kame Asirianmaya̱ aents ii nuṉke̱n utsanawar ii akupniúri̱ pujutai̱niam waya̱warmataiṉkia murikiu wáinin siati tura uchu áishmaṉ peṉkeri̱ kakaram páantin ainia nu wajatrartatui. 6 Asiria Nimpruta nuṉke̱ya̱nka puya̱ja̱i̱ amukártatui. Núnisaṉ Asirianmaya̱ ii nuṉke̱n utsanturmawar yajauch awajtámkurnisha Ni puya̱n ukuinkiar aṉkant awajtámsartatji. 7 Kame sánaka Yusai̱ya̱ winiatsuk tura yumisha aentsnaka nákatsui núnisaṉ yaaksha akupkachmaitiat yútakka ashí nuṉkan péṉker awajui. Núnisaraṉ Jakup shuar ishichik juákarua nuka ashí nuṉkan péṉker awajsártatui. 8 Túramtai Jakupa shuari̱ úunt ya̱wa̱ kampunniunmaya̱ yajasma kajen ainia nuna ajapéri̱n nupetmaku wajana tura úunt ya̱wa̱ uchirí̱ murik matsatmanum ajapén pujuras péempruk esái júak chikichkiṉkisha iniaṉkakchattana núnisaṉ nisha ishichik juákaruitiat untsurí nuṉkanmaya̱ aentsu ajapéri̱n nupetmakaru wajasártatui. 9 Atumí nemasri̱ nupetkarum uwejém takuitiarum túrawakrumin atumín kajertamainia nuka amukma ártatui.

10 5:​10-15 “Nu tsawantinkia mesetnum mánitiai kárurmincha tura kawairmincha núnisnak pepru wenuimiu ainia nunasha núnisnak kumpin je̱a̱ncha ashí emestuktatjarme” tawai Uunt Yus. “Núnisnak uwishniuncha nekamniuncha emeskartatjai. Túramtai aents najanamu yus ainia nuka atakka peṉké tikishmátrashtatrume” tímiayi.