Mikías
Yus ni shuari̱ji̱a̱i̱ itiurchat takurnaiyamu
6 Uunt Yus tana nu anturkatarum. ¡Ame itiurchat takurkamna nu naint weme ujakta túrawakmin naintiar naintra nusha anturtamkarti! 2 Maa, átum naint árumna nútiram núnisrumek nuṉka tépakmanum naint wájakrumna nútirmesha Uunt Yus ní shuari̱ji̱a̱i̱ tunaiya nu anturkatarum. Kame Israer shuaran itiurchat takurkainiana nuna ujakar chicharkartatui. 3 Winia shuaru ¿warí itiurkajrumea kame wariji̱a̱i̱ ipimprájrum? Wats turuttiarum. 4 Warí Ejiptunam wáitkiatai matsatrumin Wi aṉkant awajsámiajrume. Tura atumín jintintrámawartinian Muisaisan, Araunan nuyá̱ Marin anaitiukaran ikiankamiajrume. 5 Winia shuaru, Uunt Yus nekasa nuja̱i̱ métek túramu enentáimpratarum. Iis, Parakka ¿warí yajauchinia túrattsa wakerimia. Túrasha Piura uchirí̱ Paraamsha itiura áimkiamia? Wats Setim nuṉkanmaya̱ juarki̱ Jirkara tímianai Paraam ¿waritia ai̱kmia? Nuja̱i̱ enentáimpratarum.
6 Tura Ashí Naṉkamantu Úunt Yusnasha ¿wariji̱a̱i̱ jearniak tikishmáttrataj? Waaka chikichik uwí takakun jurukniásh takamtsukeash ¿áestuataj? 7 Untsurí mir murikji̱a̱i̱ tura tias mir ashintsaja̱i̱ naṉkaamas jean asuiti súam nuja̱i̱ ¿Uunt Yus “péṉkeraiti” turuttiatuak? Ántsaṉ Yus wi péṉker umirkachmanum tura yajauch túramunam ¿winia uchir iwia̱i̱ya nunash áestuataj?
8 ¡Maa aentstinkia, péṉkera núnaka Niṉki paant awajtúrmasuiti! Kame Amincha Uunt Yussha ¿warí itiurkai tusa wakerutma? Áyatik péṉkera túrin tura tuke waitnenkartin nuyá̱ péejchach ajasam ame Yúsrum tuke umirin ai̱ tusa wakerutmawai.
9 6:9-16 Ashí weanmaya̱ antuktarum Uunt Yusa chichame̱ péprunam etsernaktatui. Antsu Nin ashamainia núnaka niṉki uwemtikrattawai. ¿Kijin nekapatai̱ nékaskechu anaṉma kasamtai ainia nunasha péṉkeraiti titiatjak? Núnisaraṉ aents nui̱ matsatainiasha wáitruiniawai. Tuma asakrumin atumí yajauchiri̱ni̱ṉ Wisha nútiksanak yapajkiatniun naṉkamajrume. Yurumeakmesha eje̱e̱machu asam tuke pimpikin pujustatme. Kame Úmpriji̱a̱i̱ Akaap túrawarmia núnisrumek atumsha túrattarme. Túrakrumin emesnakarti tusan Wiki iniaisattajrume.