Wekasarma
Uunt Yus Israer shuaran jiji̱a̱i̱ asutiámu
11 Tura Uunt Yus ántamunam ti kuntuts nekapenak ashí aents yajauch chichatan naṉkamawarmiayi. Uunt Yus nuna antuk ti kajek suíran ka̱e̱ kaje̱ntkamiayi. Nuya̱ṉka amukratin ji Úunt Yusai̱ya̱ tara matsamkamun tsukintiaani̱ amukmiayi. 2 Nuya̱ṉka aents Muisaisan seawarmiayi. Túram Muisais Uunt Yusan seamiayi túramtai jisha kajinkiamiayi. 3 Tura Úunt Yusai̱ya̱ ji nin taruraru asamtai nú nuṉka náari̱nkia Tawira anaikiarmiayi.
Saisiantu mir aentsun Uunt Yus namaṉken súamu
4 Nuya̱ṉka yajaya̱ aents nui̱ páchitra matsamia nu aya yúrumatniunak enentáimiarmiayi. Túmainiakui Israer shuarka útainiak chichainiak “Ii yúatniuncha ¿yaki namaṉnasha amastaji? 5 Warí Ejiptunam pujusár yúarmiaj nusha enentáimtuiniatsjik namaksha akikmatsuk yúchamkiaj tura pipiniusha nuyá̱ úunt munchisha núnisaṉ úunt sepuisha ántsarik peṉké sepuisha núnisrik ájussha yúcharmakiaji. 6 Túrasha yamaikia ii tsukarí̱sha meṉkaterarai. Warí chíkich yurumkaka atsá asamtai iikia aya mananmaṉ iimji” tiármiayi. 7 Kame manaka kurantru jiṉkiaiya núniniaitiat numí macharí̱ya núnin yaṉkutakuyayi. 8 Kame aentska jíintiurar juu wéarmiayi. Túrawar neketai̱ kayaja̱i̱ nekeṉkar núja̱i̱nchuka tuntuipinmaṉsha tsairar ichiṉnanam iniariármiayi. Túruiniak asuitiji̱a̱i̱ pachimprar paṉ najanamua timianú kunturman najaniarmiayi. 9 Kame matsamkámunam kashi sanamákui manasha nui̱ kakemiayi.
10 Nuyá̱ Israer shuarka aṉkant aṉkant ní shuari̱ji̱a̱i̱ṉ ni je̱e̱ wá̱i̱ti̱a̱i̱ri̱i̱n pujusár uur ajainian Muisais antukmiayi. Túmainiakui Uunt Yuska tí kajek suíran ka̱e̱ kaje̱ntkamiayi. Kame Muisais iismasha nuka yajauchiyayi. 11 Tura Muisais Uunt Yusan chicharuk “¿Urukamtai ámin takartámniusha timiá yajauchisha awajeam? ¿Urukamtai Amiincha péṉkerka íischamuitiaj? Warí ju̱ aents wáitiainiamusha winiak íkturam ¿ashí iniaitiúrsachumek? 12 ¿Antsu wíkiaitiaj jú̱ aentsun nukurí̱ya? ¿Kame wikia takusáruitiaj nuwa̱ uchi kuírchin tsakatmawa nútiksam chichartakum ‘Ní aparí̱n chicharainiakun jú̱ nuṉkan atumín amastiniaitjiarme tiármiajna nui̱ yaruakarta’ turuttinia? 13 Kame aents útainiak chichainiak ‘Namaṉ amasta yuamí’ túrutai̱ya nunasha ¿timiá jú̱ untsurí yúawartinniashá tuya̱na wisha namaṉsha timiá nukapnasha wáinkiataj? 14 Túrasha wíkikia aents timiajú̱ untsurí yaruaktinniaka peṉké jeatsusha. Warí wíji̱a̱i̱ṉkia ti itiurchataiti. 15 Kame Ame waitnenkartutairmin wáinkiaitkiuiṉkia tura tuke áitkiarkim wétatkumka winia wáitiamurun wáinki̱a̱i̱j antsu nekaska jákatin tsaṉkatrukta” Muisais tímiayi.
16 Nuya̱ṉka tutai Uunt Yus Muisaisan chicharuk “Pepru uuntri̱ tura peṉkeri̱ ame nékainiamu sataintia áishmaṉ Israer shuara uuntri̱ irurarta. Tura Yus Shiir Awajtai̱ je̱a̱nam ámiji̱a̱i̱ métek káunkarti. 17 Tura Wi taran ámiji̱a̱i̱ nui̱ chichastatjai túran Wakan aminí̱ pujana nuna jusan nincha súsartatjai. Nuna túramtaiṉkia nisha ashí aentsu itiurchatri̱n nekaawartatui nuya̱ṉka amekka wáitsashtatme. 18 Tura aents chicharainiakum ‘Kashiniu tunaarincha ajastarum túrarum kashin namaṉ yuáttarme. Warí Uunt Yus ántamunam úteakrum chichakrum “Ii yúatniuncha yaki namaṉnasha ¿amastaji? Ejiptunmaṉka tí peṉkerchak pujumiaj” tiniu asakrumin Uunt Yus namaṉken amastatrume túramtai namaṉ yuáttarme’ tímiayi.* 19 Túrasha nú yúakrumka chikichik jímiarchik seṉkuksha tiáskesha núja̱i̱nchuka painti tsawantchikia yúashtatrume 20 antsu chikichik nantu takamtsuk yuáttarme. Tura nuke yua asarum aya nuke mayattiatrume túmakrum mui̱ṉtiatrume. Warí Uunt Yus atumíin pujá nakitrarum Nisha ántamunmaṉ úteakrum chichaakrum ‘¿Urukamtaik Ejiptunmaya̱sha jiintramiaj?’ tiniu asarum túrunattarme titiá” tímiayi.
Yus Israeran namaṉkén nekas amastájai timia
21 Nuya̱ṉka Muisais chichaak “Wikia saisiantu mir suntar nuṉkak mánain ainia nuja̱i̱ pujajai túrasha Ámeka chichartakum ‘Namaṉkén amastatjarme túramtai chikichik nantu takamtsuk yuáttarme’ tame. 22 ¿Kame ni yúawartin muriksha tura waaka nuwa̱ kajeṉkármasha jeamniakait? ¿Tura ni yúawartin nayantsanmaya̱ namak ashí irutrarmasha jeamniakait?” 23 Takui̱ Uunt Yus Muisaisan chicharuk “¿Kame Uunt Yusa uwejé̱ṉka sútarach ajasáik? Wats yamaikia iistá ame iismasha Winia chichamur uminkiatpiash núja̱i̱nchuka uminkiashtimpiash” tímiayi.
Sataintia uunt Yúsnan etserniua núnis chichakarma
24 Nuya̱ṉka Muisais jiinkí̱ Uunt Yus timia nuna Israer shuaran ashí ujakármiayi. Tura sataintia aentsun pepru uuntri̱ armia nuna irur Yus Shiir Awajtai̱ Je̱a̱n téntak awajrámiayi. 25 Tura Uunt Yuska yuraṉminiam taramiayi tura Muisaisja̱i̱ chichasmiayi. Tura niin Yusa Wakaní̱ pujumia nuna achik pepru uuntri̱ sataintia armia nunasha súsarmiayi. Kame Yusa Wakaní̱ eṉkemtuawaran Yúsnan etserkarmiayi túrasha atakka túracharmiayi. 26 Túmaitiat matsamkamunam jimiará aishmaṉ Irtatja̱i̱ Mitiat juákarmiayi. Yusa Wakaní̱ niincha eṉkemtuawarmiayi. Kame nisha nu ármiayi túrasha Yus Shiir Awajtai̱ Je̱a̱nmaṉka wécharuitiat matsamkamunam Yusna etsertan naṉkamawarmiayi. 27 Nuya̱ṉka uchi natsa nuna wainiak tsékeṉtki̱ werí Muisaisan ujak “Irtat Mitiatja̱i̱ matsamkámunam étseruk pujuiniawai” tímiayi. 28 Nuya̱ṉka Nuuna uchirí̱ Jusuí natsa asaṉ Muisaisa yáiniuya nu chicharuk “Úuntur Muisaisá, núnaka túracharti suritkiarta” tímiayi. 29 Túrasha Muisais aya̱k “¿Nuikia ámeka akasmatramek? Kame ashí aents Yúsnan etserin ajasárka tura nú aentsnasha ni Wakaní̱n Yus súsarka maak ainti” tímiayi. 30 Nuya̱ṉka Muisais ashí uuntri̱ armia nuja̱i̱ irunar matsamkámunam waketkiarmiayi.
Uunt Yus nanamtinian súsar asutiáwarma
31 Tura Úunt Yusai̱ya̱ nase kakaram umpuí nayantsanmaya̱ nanamtinian waawaya núninian Israer shuar matsamkámunam akakekmiayi. Nu nanamtincha chikichik tsawant wekasam jea timianú arant matsamkamu mái̱ yantamen kakekamiayi. Tura nu nekapmamka jimiará kuntu jeá nuṉká tuwaimiayi. 32 Túrunamtai aentska tsawai̱sha káshisha nuyá̱ kashincha nuna juwak matsamtiarmiayi. Ni ishichik juukuka tias irumprarmiayi. Túrawar matsamkamu á̱a̱ri̱nkia péṉkas péṉkas téntakarmiayi. 33 Túrasha Israer shuarka yama yurumáttsa naṉkamainiai̱ Uunt Yus ti kajek untsurí aentsun suṉkuran akuptuk amukármiayi. 34 Tura nu nuṉkanka “aya yúrumtanak wakerin aents jákaru iwiarsarma” asamtai Kiprutjatáwa tu anainiakmiayi. 35 Kame Kiprutjatáwanka ikiurkiar Jaserútnumaani̱ wéar nui̱ matsamkar pujusármiayi.