Wekasarma
Marí Araunja̱i̱ Muisaisan yajauch chicharkarma
12 Muisais Kúsnumia̱ nuwa̱n nuatka asamtai Marí Araunja̱i̱ yajauch chicharainiak 2 “¿Aya Muisaisai̱ni̱ṉkik Uunt Yus chichakuit. Kame íiníni̱ṉkia chichakchakait?” tiármiayi. Tuíniamuncha Uunt Yuska anturkarmiayi. 3 Tura Muisaiska ashí nuṉkanmaya̱ áishmaṉ iruniarmia nuja̱i̱ naṉkaamas péejchachiyayi. 4 Nuyá̱ aya aneachma Uunt Yus Muisaisan, Araunan tura Marin chicharainiak “Menaintiutiram Yus Shiir Awajtai̱ Je̱á̱ wetarum” tutai wéarmiayi. 5 Nui̱ Yus Shiir Awajtai̱ Je̱a̱ wá̱i̱ti̱a̱i̱ri̱n Uunt Yus yuraṉkim wajamunam tara Araunan Mariji̱a̱i̱ untsuiniam mái̱ weriarmiayi. 6 Nui̱ Uunt Yus chicharainiak
“Yamaikia Winia chichamur péṉker anturtuktarum
Úunt Yusnan etserin átum takakkurminkia
Wikia ímiaja̱i̱ksha núja̱i̱nchuka mesekranmaṉsha níji̱a̱i̱ṉkia chichasaintjiai.
7 Antsu winia takartin Muisaisja̱i̱ṉkia núnaka túratsjai.
Warí, ashí Israer shuarnumka niṉki nekas tímiatrus Winiak enentáimturui.
8 Tura niṉkia nekaachminia nuna iniaktusan jintintsujai
antsu ní̱ja̱i̱ṉkia paant iisan yapían chichaajai.
Kame Uunt Yus urukuitiaj nunasha paant waitiui.
Enta túmasha ai̱sha winia takartin Muisaiska ashamtsuksha
¿urukamtai náṉkamsarmesha chicharearum?” tímiayi. 9 Nuna ti Uunt Yuska suíran ka̱e̱ kaje̱ntukarmiayi tura ikiukiármiayi. 10 Nuya̱ṉka Yus Shiir Awajtai̱ Je̱a̱nmaya̱ yuraṉkim takunmiatai Marikia kuchapruk micha núnis puju ajasmiayi. Tura Araunka Marin apajá̱s iyaj tukamá kúchapak ajasún wainkiamiayi. 11 Túrunamtai Araun Muisaisan chicharuk “Winia uuntru, waitneasam ii tunáa túramunmaṉka makukratip. Warí, iikia waurka núnisar enentáimtsuk chichakar tunáa túraji. 12 Waitneas Marikia uchí nukurí̱ni̱ṉ jaka akiiniuk urukawa núnik anu kauru juákchati” tímiayi. 13 Tutai Muisais Uunt Yusan seak “Maa Uunt Yusru waitneasam péṉker awajsata” tímiayi. 14 Nuyá̱ Uunt Yussha Muisaisan aya̱k “¿Ni aparí̱ yapiniam usukiámka natsa̱a̱ru siati tsawant pujuschaintiak? Tuma asamtai Marikia matsamkamunmaya̱ jí̱i̱krum siati tsawant apujsarum nuyá̱ ataksha awaiṉki̱ itiaatarum” tímiayi. 15 Tuma asamtai Marinkia matsamkamunmaya̱ jí̱i̱kiar siati tsawant apujsarmiayi. Tura Israer shuarsha Marí waketki̱ táamam wétsuk nákasarmiayi. 16 Nuya̱ṉka Israer shuarka Jaserútnumia̱ṉka ashinkiar kampuntin atsunum Parannum jeawar nui̱ matsamkarmiayi.