Wekasarma
Mui̱jmiai̱ ajakmánum nijiamatai̱ entsa
19 Uunt Yus Muisaisan Araunja̱i̱ áujeak chicharainiak 2 “Ju̱i̱ti umiktin chichaman Uunt Yus akupeak chichaak Israer shuar chicharainiakum ‘Waaka nuwa̱ kapantin takamtsuk péṉker tura tunamárcha núnisaṉ nuṉka pukutáisha péerkachma itiarti. 3 Túrarum Yúsnan pujurin Iriasár susatarum. Túramka matsamkamunmaya̱ arant jukí̱ nisha íimmianumaṉ suen tsupirak máamtikiattawai. 4 Nuya̱ṉka Yúsnan pujurin Iriasár nú numpan ishichik achik Yus Shiir Awajtai̱ Je̱a̱ nákari̱ni ukatak ataksha awaiṉki̱ ukatak awá awajeakua siati ejettawai. 5 Nuya̱ṉka nisha íimmianumaṉ waakanka namaṉtuk nuáptuk tura númpe̱ntuk ijiji̱a̱i̱ irumar áesmamtikiattawai. 6 Nuyá̱ Yúsnan pujurniuka sétur numin tura isupuncha núnisaṉ murikiu ure kutampramu kapa̱a̱kun achik waaka nuwa̱ jinium aesma nui̱ epeattawai. 7 Yúsnan pujurniuka nuna tura pushiri̱n nijiá nisha aya̱shí̱n entsaja̱i̱ nijiartiniaiti. Kame matsamkamunmaṉka waya̱yataṉ ki̱i̱miam mui̱jmiai̱ṉ pujustatui. 8 Núnisaṉ waakan aesa nusha pushiri̱n entsaja̱i̱ nijiá nisha entsaja̱i̱ nijiamártiniaiti. Tura ki̱i̱miam nisha mui̱jmiai̱ṉ pujuttawai. 9 Tura chíkich aents mui̱jmiai̱ ajakcha waaka áesamu yuṉkunmiri̱n jukí̱ matsamkamunmaya̱ arant péṉker wapikchanum ikiustatui. Nu yuṉkunmikia Israer shuar imiatkímprachu awajkur entsaja̱i̱ pachimpratin asamtai péṉker ikiusártiniaiti. 10 Núnisaṉ waaka áesamu yuṉkunmiri̱n juukua nusha pushiri̱n nijiá ki̱i̱miam mui̱jmiainiak pujuttawai. Atumí shuari̱ atum weanmaya̱ tura yajaya̱ aents ukunam atumji̱a̱i̱ matsamártatna nusha jú̱ akupkámunka iniaṉnatsuk tuke umikiartin najanamuiti.
11 Yaaksha aents jakaan antiṉkiuka imiatkímprachu ajaamam siati tsawant mui̱jmiai̱ ajasu pujuttawai. 12 Kame tsawant menaintiutin tura siátitincha nu entsaja̱i̱ imiatkímprachu awajmamas imiatkímprachu ajastatui. Antsu tsawant menaintiutincha tura siátitincha imiatkímprachu awajmamchakka imiatkímprachma ajaschattui. 13 Ashí aents jakáa aya̱shí̱n takasuitiat imiatkímprachu awajmamchakka Uunt Yus Shiir Awajtai̱ Je̱a̱ncha mui̱jmiai̱ awajsattawai. Nu aentska Israer shuarnumia̱ṉka akankámu átiniaiti. Warí imiatkímprachu ajatai entsa ukatkachma asa mui̱jmiai̱ ajasuíti. Tuma asa mui̱jmiai̱ ajasmari̱ṉkia ninkia tuke araawai’ titiarum” tímiayi.*