Wekasarma

Marí jakamu

20 Uwí naṉkama chikichkí nantu taka ai̱ Israer shuar kampuntin atsú Sen nuṉkanam ashí jeawar Káatish nuṉkanam matsamkar pujuiniai̱ Marí jakamiayi. Túrunamtai nui̱ṉ iwiarsarmiayi.

Muisais Miripianam kátsuram kayan awati entsa ji̱i̱kmia

2 Tura entsa umarmin atsá asamtai Israer shuar Muisaisan Araunja̱i̱ irunturar kajerkarmiayi. 3 Nui̱ Israer shuar Muisaisan kajerkar chicharainiak “Uunt Yus ii aentsun amukármia nui̱ṉ iisha jákaitkiurkia maak ára̱a̱ji. 4 ¿Urukamtai Uunt Yusa shuari̱ árincha taṉkurtiuk kaji̱ṉkiarat tusamsha kampuntin atsú nuṉkanmasha ikiakratkaitiam? 5 ¿Núnisaṉ Ejiptunmaya̱ jukartukim imiá yajauch nuṉkanmasha ikiakratkaitiam? Warí, ju̱i̱ṉkia arakmar yurumámniasha ikiu nere̱sha tura úwasha nuyá̱ munchisha tsapaichminiaiti tura entsa umarmincha peṉké atsawai” tiármiayi. 6 Tuíniakui Muisaiska Araunja̱i̱ Israer shuar irunar pujuiniamunmaya̱ jíinkiar Yus Shiir Awajtai̱ Je̱a̱ wá̱i̱ti̱a̱i̱ri̱n jeawar tikishmarar nijia̱i̱ji̱a̱i̱ nuṉkan antiastatuk tsuntsumawarmiayi. Túrunawarmatai Uunt Yusa winchari̱ paant wantintiukarmiayi. 7 Tura Uunt Yus Muisaisan áujuk chicharuk 8 “Wai̱ achikrum ámeka Araunja̱i̱ Israer shuar irurtarum túrarum nisha iimiainiamunmaṉ kátsuram kaya chicharkatarum. Kátsuram kayanmaya̱ entsa jiinkittiawai. Aentsna entsa kayanmaya̱ jí̱i̱ttiarme túram aentska tura taṉkurí̱sha nu entsa áarartatme” tímiayi. 9 Tutai Muisaiska Uunt Yussha íimmianumaṉ Ni akupkámia tímiatrusaṉ wai̱n achikmiayi. 10 Nuya̱ṉka Muisaiska Araunja̱i̱ Israera shuari̱n kátsuram kayanam naka irurar Muisais chicharainiak “Yusan enentáimtichu Israerá antuktarum. ¿Átum umartin jú̱ kayanmaya̱ entsa jí̱i̱ktiatjik?” tinia 11 kunturi̱n takuí wai̱ji̱a̱i̱ kayan jimiará awatmiayi. Túramtai entsa tí nukap jiinkimiayi túrunamtai ashí aents tura waakasha nu entsan umararmiayi. 12 Nuya̱ṉka Uunt Yus Muisaisan Araunja̱i̱ chicharainiak “Tuma asarum Israer shuar iimiainiamunam Wi tunaarinchaitjiana nu tunaarinchaiti turutcha asarum núnisrum enentáimtursachu asarum atumín amasuítjiarmena nú nuṉkanmaṉka jú̱ aentska átumka awayá̱shtatrume” tiármiayi. 13 Kame ju̱ka Miripia* éntsaiti. Warí ju̱i̱ Israera shuari̱ Uunt Yusja̱i̱ kajernaikiarmiayi túrasha Niṉkia Tunaarincha nuna nin iniaktusarmiayi.*

Israer shuar naṉkaamartinian Etum aents nakitrarma

14 Kame Muisaiska Káatishnum pujus chichaman akatmamar Etumnumia̱ úunt akupniun akuptúkmiayi. Tura chicharuk “Atumí yachi̱ Israer shuar chichartamainiak ‘Ámeka ii itiurchatri̱ṉkia ti paant nékame. 15 Ii úuntri̱sha itiurá ashinkiara timiá untsurí tsawantcha Ejiptunmasha pujusáruit. Ejiptunmaya̱ aentska ii úuntri̱ncha tura iincha ti itiurchat awajtámiarmaji. 16 Túrasha Uunt Yus untsukmaji tura Nisha ii chichamen anturtamkamji. Nuya̱ṉka Ni suntari̱n akuptúrmak Ejiptunmaya̱ṉka ji̱i̱rmarmaji. Tura yamaikia atumí nuṉké̱ náṉkatkamunam ayamach Káatish péprunam pujuiniaji. 17 Tuma asamtai atumí nuṉke̱ni̱ naṉkaamakiartin tsaṉkatrukta. Kame árak arakmanumaani̱ṉkia tura uwa ajanmaani̱sha naṉkaamakchartatji. Ántsarik taurma yumirmatnumia̱sha éntsaka umarchartatji. Núnisrik atumí nuṉké̱ naṉkaamam menanmaani̱ṉsha núja̱i̱nchuka untsurnumaani̱ṉsha tupa̱tsuk antsu úunt akupniu jinti̱ya nuke wéartatji’ túramprume tiartá” tímiayi. 18 Nuna antuk Etumnumia̱ úunt akupin chichaak “Winia nuṉkaruí̱ni̱ṉkia naṉkaamakchattame tura ántutsuk naṉkaamakminkia puyá̱ jurukín winittiatjame” tímiayi. 19 Takui̱ Israer shuarsha chichainiak “Tuke wekatai̱ paasa jintiá nuke wétatji. Antsu ii waakarí̱sha tura iisha atumí entsarí̱ úmakrikia kuitri̱ urutmait nuka akikmaktatji. Áyatik nuṉkak naṉkaamartin nuke tsaṉkamkata. Warí aya núchik seamji” tiármiayi. 20 Támaitiat chichaak “Naṉkaamakchattarme” tusa Etumnumia̱ úunt akupniuka tí untsurí aents kakaram áinian yaruak naṉkí jurukí̱ Israer shuaran jiintiukmiayi. 21 Kame Etum aentsu nuṉke̱ni̱ naṉkaamaktinkia suritkiamu ásar Israer shuarka nuya̱ṉka arant wéarmiayi. 22 Tura Israer shuarka nui̱ matsamak pujuarmia nuka Káatishnumia̱ ashí jíintrar Jur nainnium jeawarmiayi.

Jur nainnium Araun jakamu

23 Tura Etum aentsu nuṉké̱ tesamu náṉkatkamunam Jur náinnium Muisaisan Araunja̱i̱ pujuinian áujenak Uunt Yus chicharainiak 24 “Araunka ni uuntri̱ jákar ayamainiamunam ayamuttawai tura wi Israer shuaran nuṉkan súsaruitiaj nui̱ṉkia jeashtatui. Warí anturtutsuk Miripia entsan kátsuram kayanmaya̱ jí̱i̱kmiaj nui̱ atumsha wi tímiajrumna nu umikchamarme. 25 Tuma asamtai Araun ni uchirí̱ Iriasárja̱i̱ júkirum Jur nainnium iwiakarta. 26 Nui̱ Arauna entsarmari̱ṉkia áitram ni uchirí̱ Iriasár nu áentsrata. Araunka ni uuntri̱ jákar ayamainiamunam ayamuttawai” tímiayi. 27 Tutai Muisaissha Uunt Yus timia ímiatrusaṉ umik ashí Israer shuar iimiainiamunam Jur nainnium wákarmiayi. 28 Tura nui̱ jeawar Muisaissha Yúsnan takakur entsatái̱ri̱n Araunka áitiak Iriasáran áentsramiayi. Nui̱ṉ Jur nainnium Araunka jakamiayi. Túrunamtai Muisais Iriasárja̱i̱ nú náinniumia̱ waketkiarmiayi.

29 Tura Araun jakamun nekaawar ashí Israer shuar nuna enentáimtusar traintia tsawant e̱a̱rarmiayi.