Wekasarma
Israer shuar Aratan emeskarma
21 Kanaannumia̱ úunt akupin Nekepnum Arat péprunam pujuya nu, Israer shuar Atarím jintianmaani̱ wininiawai táman antukmiayi. Tura Israerja̱i̱ mánaikiar nui̱ Israer shuaran wárumchik achirar yaruakarmiayi. 2 Nuiṉkia Israer shuar Uunt Yusan nekas umiktatji tusar chicharainiak “Ti nekas ju̱ aents tsaṉkamkakminkia ashí péprurtiuk emeskar amú amustatji” tiármiayi. 3 Nuya̱ṉka Uunt Yus Israer shuara chichame̱n anturkarmiayi. Tura Kanaannumia̱ aentsun amukarat tusa Israeran íktusarmiayi. Túram Israer shuarka Kanaannumia̱ aentsnaka ashí péprurtiuk takamtsuk emeskar amukármiayi. Tuma asamtai nu nuṉka náari̱ṉkia Urma anaikiarmiayi.
Yaṉkú jiruja̱i̱ napi najanamu
4 Nuyá̱ Israer shuarka Jur nainniumka ashinkiar Etum aentsu nuṉke̱n téntatkiar naṉkaikitiai tusar Kapantin nayantsanmaani̱ wéarmiayi. Túrasha Israerka jintiá weká weká nakitkiarmiayi. 5 Nuya̱ṉka Israer shuarka Muisaisan tura Yusnasha kajerkar chicharainiak “¿Urukamtai Ejiptu nuṉkanmaya̱sha ju̱i̱ kampuntin atsú nuṉkanam kaji̱nkiarat tusarmesha jukartukmiarum? Warí, yurumkasha tura umartincha peṉké atsawai. Aya imiancha yurumkak yuu yuu nakitkíji” tiármiayi. 6 Nuna tuíniakui Uunt Yuska najamin napin Israer shuaran akuptúrarmiayi. Tura nu napi esaim Israer shuarka untsurí kajinkiarmiayi. 7 Túmainiak Israer shuarka Muisaisan weriar chicharainiak “Iisha amiin tura Uunt Yussha yajauch chicharka asar tunáa túraitji. Túmaitkiuisha napi iiniya̱ṉka meṉkaarat tusam Uunt Yus seatá” tuíniakui Muisais Uunt Yusan seamiayi. 8 Nuya̱ṉka Uunt Yus Muisaisan chicharuk “Yaṉkú jiruja̱i̱ najamin napi nakumkam najanam numiniam awajaitia. Tura yaaksha napi esaimiu nu napin iis iwiaaku pujuttawai” tímiayi. 9 Tutai Muisais yaṉkú jiruja̱i̱ napin najana numiji̱a̱i̱ weak awajaimiayi. Tura aents napi esaimiuka nuna iisar péṉker ajarmiayi*. *
21 21:21-35 Nu ukunam Israer shuar Amur aentsu akupniúri̱n Sejunan chichaman akuptuiniak nuṉkemíni̱ naṉkaamaktin tsaṉkamkai tusa aentsun akuptúkarmiayi. Támaitiat Sejunka íksaṉ suntari̱n irur mesetan iwiarnatar iṉkiutukmiayi. Túrasha Israer shuar nupetkar mashi amukar ni pépruri̱ncha mashi akintrukarmiayi.