Wekasarma
Paraam Israer shuaran péṉkernum yumiṉkramu
23 Nuyá̱ Paraam Parakan chicharuk “Áestutai̱ ju̱i̱ siati najankata. Túram siati waaka áishmaṉ tura siati murik áishmaṉ maam iwiarata” tímiayi. 2 Paraam timia ímiatrusaṉ Parakka túramiayi. Tura nui̱ Parak Paraamja̱i̱ chikichik áestutai̱nmaṉ waakan murikji̱a̱i̱ áestuiniak aṉkant aṉkant siati áestutai̱nmasha núnisaṉ túrawarmiayi. 3 Nuyá̱ Paraam Parakan chicharuk “Ame takamtsuk áestamna ju̱i̱ṉ wajá jatá. Uunt Yus iṉkiunkataj tusa winiinti tusan wéajai. Tura wariṉkísha iniaktursamtaikia ujaktatjame” ti ikiuak náintiaani̱ wémiayi. 4 Tura Paraaman Yus iṉkiuṉtaj tusa tarimiayi. Tura Paraam Yusa chicharuk “Siati áestutai̱n najankajai. Túran nui̱ aṉkant aṉkant waakancha tura muriknasha takamtsuk áesawarjai” tímiayi. 5 Tura nuiṉkia Uunt Yus Paraaman chichaman akatar akupeak “Waketkim Parak chicharkum jú̱nisam titiá” tutai 6 Parakai̱ waketkimiayi. Tura Parakka takamtsuk áestamuri̱n ayamach Muápnumia̱ ashí uuntri̱ armia nuja̱i̱ nui̱ wajarmiayi. 7 Tura Paraam Yus timian étseruk chichaak
“Etsa̱ tatainmaani̱ naintiar naintiar nuṉkanam Sírianam pujái̱
Muápnumia̱ úunt akupin Parak itiarmiai.
Tura chichartak ‘Winitiá túram Jakup yajauchiji̱a̱i̱ yumiṉkrutrarta.
Winitiá túram Israer shuar makurtitia’ turutmiai.
8 Túrasha ¿yana Yus yúmiṉkiatsu nunasha wisha itiurak yajauchisha yumiṉkrataj?
Núnisnak ¿yana Uunt Yus makatsu nunasha wisha itiurá makurminiaitiaj?
9 Warí, kátsuram kaya tsakakaru ainia nuna tsakari̱ pujusnak wainiainiajai.
Núnisnak naint wajasnasha wainiainiajai.
Kame aents pujuiniana ju̱ka aya níṉkik matsamsartin áiniawai
tura chíkich uunt nuṉka mátsatkamu áiniana nuiṉkia peṉké pachischamu matsamsartatui.
10 Jakup shuar timiá untsurí ásar nuṉká ju̱yu̱ri̱ya̱ tímianuncha ¿yaki nekapmaraint?
Israer shuarka urutmá untsurík ainia nunasha kuatru nakakam chikichkinkisha ¿yaki nekapmaraint?
Kame wikia nekasa nuja̱i̱ métek túrinia jatai̱ri̱n jákaintjiai
tura winia amukatniursha niniu áiniana núnisaṉ winiasha arutti” tímiayi. 11 Nuya̱ṉka Parak Paraaman chicharuk “Ausha ¿urukamtai áitkiaram? Warí wikia winia nemasur yajauchiji̱a̱i̱ yumiṉkrutrarai tusan itiawitjiame túrasha ámeka tumá péṉker pujutnum yumiṉkrarume” tímiayi. 12 Tutai Paraam chichaak “¿Kame wikia Uunt Yus jú̱ titiá turutna nunak arantutskek chichaktataj?” tímiayi.
Paraam Israer shuaran ataksha yúmiṉma
13 Kame Parak Paraaman chicharuk “Yamaikia waitneasam chíkich nainnium wetái nuya̱ṉ wainkiamnium. Kame ashí wáinchakmesha matsamkamu náṉkatkamuri̱ wainkiattame. Túran nuya̱ṉ yumiṉkrutrarminiam” tímiayi. 14 Nuya̱ṉka Sujim nuṉkanam Piska naintia pakarí̱n jukí̱ Yus áestutai̱n siati najanak waaka uchichin nuyá̱ murikniasha aṉkant aṉkant nui̱ áestukmiayi. 15 Tura Paraam Parakan chicharuk “Ámeka takamtsuk áestutai̱ya̱ ju̱i̱ ayamach wajata. Nuyá̱ wikia Yusja̱i̱ chichastaj tusan ai̱ wéajai” tímiayi. 16 Nuya̱ṉka Uunt Yus Paraaman iṉkiuṉ warinia títiata núnaka jintintiar chicharuk “Parak pujamunam waketkim chicharkum jú̱nisam titiá” tímiayi. 17 Nuyá̱ Parakai̱ waketkimiayi. Tura takamtsuk áestutairi̱n ayamach wajamiayi. Núnisaṉ Muápnumia̱ náakam armia nusha nui̱ṉ wajarmiayi. Nuyá̱ Parak anintrak “¿Uunt Yussha warí tawa?” tímiayi.
18 Tutai Paraamka ukunam túrunattana nuna étseruk chichaak
“Paraká anturtukta,
maa Sépura uchiri̱yá émamkesam antukta.
19 Uunt Yuska áentschaiti wáitritin núja̱i̱nchuka
aentsu uchirí̱nchuiti mái̱ áwake ajatniuka.
¿Ju̱na umiktatjai táyat umikchattuak
tura chichaksha túrashtatuak?
20 Ju̱sha nekaata, wikia péṉker pujutnum yumiṉkrata tusan akupkámuitjiai.
Niṉki péṉker pujutnum yumiṉkraruiti tura wikia nuna yapaji̱áchminiaitjiai.
21 Israer shuara tunaari̱ṉkia Yus ishichkisha wáitkiachmaiti.
Núnisaṉ Israer shuarnum yajauch túruinian wáinkiachuiti.
Antsu Israer shuarnum Uunt Yus ni Yusri̱ pujurkui
úunt akupniuri̱ asamtai ti shiir enentáimtuiniak wararainiawai.
22 Kame Yusak Ejiptunmaya̱sha ji̱i̱ru asa
Nisha kampunniunmaya̱ waaka áishmaṉ kachurtin kajena tímianiuiti.
23 Jakup yajauch yumiṉkratin peṉké atsawai
kame Israer shuarsha yajauchiji̱a̱i̱ yumiṉkratniuka peṉké atsawai.
Yamaikia Jakup shuarai̱sha nuka Israer shuaran tawai
‘Iisiá, Yus túramia nuna’ áujmatiartatui.
24 Wats ju̱ aentska úunt ya̱wa̱ kuntinian esái numpe̱ncha umar
tura yuá amuumam ayamtsuna núnis peṉké ayamprachartatui” tímiayi. 25 Nuyá̱ Parak Paraaman chicharuk “Yajauchiji̱a̱i̱ yúmiṉkiachkumka péṉker pujutnumsha yumiṉkraraip” tímiayi. 26 Tutai Paraam Parakan aya̱k chicharuk “¿Warí yaunchu chichaakun, áyatik Uunt Yus túruteana nunak túrattajai tíchamkajam?” tímiayi. 27 Tutai Parak Paraaman chicharuk “Yamaikia chíkich náinniumaani̱ jukittiajme. Kame Yusja̱i̱ péṉkeraitkiuiṉkia nuya̱sha yajauchinmaṉka yumiṉkrutraraintme” tímiayi.
Paraam Israer shuaran menaintiú yúmiṉma
28 Nuyá̱ Parakka Piur naint kampuntin atsamunmaani̱ íirkana nuna tsakari̱n Paraamnaka iwiakmiayi. 29 Nui̱ Paraam Parakan chicharuk “Siati áestutai̱ ju̱i̱ najankata. Túram siati waaka áishmaṉ tura siati muriksha áishmaṉ máwaram iwiarata.” 30 Paraam tutai Parakka nuna tímiatrusaṉ najanak umik nui̱ aṉkant aṉkant waakancha tura muriknasha áestuamiayi.