Wekasarma
24 Nuyá̱ Paraamka Úunt Yusja̱i̱ṉkia Israer shuar péṉkernum yumiṉkiamuka péṉkerauya nuna neka asa nekaattsa emka nekamniunam jimiará túramia núnaka túrutsuk antsu paṉkái̱ kampuntin atsú nuṉkanmaani̱ iimsamiayi. 2 Nui̱ Paraam naka íimias Israer shuar nu wéak iruntrar matsatainian wainkiamiayi. Tura Yusa Wakaní̱ nui̱ Paraaman tarimiayi. 3 Nuyá̱ Yus titiá timia nunak étseruk
“Piura uchirí̱ Paraamka ji̱ timiá péṉkeran takakna nu ju̱na tawai.
4 Kame Yusa chichame̱n antuk etserniua nu
tura iniant iimia tepaku Ashí Tujintkiachu Yus iniakmamuncha ímiaja̱i̱k wáinniua nu chichaak
5 ¡Maa Jakupá ame jutai̱ je̱e̱mesh
tura Israerá ame pujutái̱rmesha tí shiirmachichuk ainia!
6 Nuṉka péṉker arakma tímiatrus
tura aja entsá yantam takasma
núnisaṉ aruí Uunt Yus arakma
nuyá̱ sétur entsá yantam wajá urukua ainia tímiatrus áiniawai.
7 Israer shuarka entsa tuke waana núnis asa ti pampaṉkartatui.
Tura ni tiraṉki̱sha árak entsá ayamach tsapái̱ péṉker tsakaana núnisar shiir pujusártatui.
Ni akupniúri̱sha Akaakja̱i̱ṉkia naṉkaamas uunt átatui.
Tura ni akupeamuri̱sha naṉkamantu awajnástatui. 8 Kame Yusak Ejiptunmaya̱sha jí̱i̱rarma asar
Niji̱a̱i̱ íismaka kampunniunmaya̱ waaka áishmaṉka kachurí̱ya̱ tímianu áiniawai.
Tura uunt nuṉka mátsatkamu nemasri̱ áiniana núnaka
ashí amukar ukunchí̱ncha tsai̱ tsai̱ awajtúsar tsentsakrí̱ji̱a̱i̱ pana weakartatui.
9 Israer shuarka úunt ya̱wa̱ áishmaṉ
tura nuwa̱sha tepes kánana nuna yaki ishintiaraint núnisaiti.
¡Kame péṉkerja̱i̱ yumiṉkramainia nuka péṉkerja̱i̱ yumiṉkramu atí.
Núnisaṉ yajauchiji̱a̱i̱ yumiṉkramainia nusha yajauchiji̱a̱i̱ yumiṉkramu atí!”
tímiayi Paraam. 10 Takui̱ Parak suíran ka̱e̱ kaje̱ntukmiayi. Paraaman tura uwejé̱n paat awati Parak Paraaman chicharuk “Warí wikia winia nemasur yajauchiji̱a̱i̱ yumiṉkruttrarai tusan itiawitjiame. Túrasha ámeka tumá yamaikia péṉker pujutnum menaintiú yumiṉkrarume. 11 ¡Yamaik ame nuṉkemín waketrumkitia! Kame wikia páantin naat awajtiajam tíchamkajam túrasha Uunt Yus páantin naat ajastinniaka suritrámkayi” tímiayi. 12 Tutai Paraam aya̱k Parakan chicharuk “Kame ame takarniúram winia akuptúrkarmamna nuna chicharainiakun ¿tíchamkaj? 13 Kame Parak kuítniasha tura kurincha je̱á̱ piákun surakuisha wi wakeramun péṉkernasha tura yajauchincha túrataj tusan Uunt Yus timia núnaka peṉké yapaji̱áshtatjai. Antsu Uunt Yus títiatna nunak títiatjai ¿tíchamkaj? 14 Pai yamaikia jú̱ nekaata, wikia winia nuṉkarui̱ wáketjai. Túrasha winitiá, anairartaj tusan jú̱ shuar ame shuarumin ukunam itiurkartata nuna ujaktatjame” tímiayi Paraam.
Paraam Israeran kuatru awaiṉkir péṉkernum yúmiṉkiamu
15 Kame ukunam naṉkaamastatna nuna Yus iniaktusman étseruk chichaak
“Piura uchirí̱ Paraamka ji̱ timiá péṉkeran takakna nu jú̱naka tawai.
16 Yus timian antuk
Naṉkamantu Yusa nekatairi̱ncha nékana nu
tura iniar tepayataṉ
Ashí Tujintkiachu iniaktamuncha iimiá pujak jú̱nis tawai.
17 Jakupai̱ya̱ yaa núnis jíintiatui,
Israernumsha úunt akupin pujustatui.
Ninkia yamaikcha wainkiattajai tura árantiaṉ íistatjai.
Tura Muap aentsun núnisaṉ Set shuarnasha ashí amukártatui.
18 Tura Etumsha núnisaṉ Sairsha nupetnakartatui.
Nui̱ṉkia Israer shuarka mesetnum ti kakaram ártatui.
19 Nuyá̱ Jakupnumia̱ chikichik awakmártatui
tura nui̱ péprunam iwiaaku juákarunka ashí amutkartatui” tímiayi.
Paraam amúak etserkamu
20 Nuyá̱ Amaríkian wainiak nui̱ túrunattana nuna étseruk
“Amaríkkia chíkich nuṉkanmaya̱ja̱i̱ṉkia naṉkamantuyayi.
Túrasha ukunmaṉka takamtsuk emesnaktatui.”
21 Núnisaṉ Kiin aentsun wainiak nui̱ túrunattana nuna étseruk
“Ame pujutái̱rmeka emeskachminiaiti
tura ame je̱e̱mka kayanam je̱a̱mkamuiti.
22 Túmaitiataṉ Kiin aentska emeskar ashí amukma ártatui.
Tura misatkanka Asiria yaruakartatui” tímiayi. 23 Nuya̱sha chikichan ukunam naṉkaamastatna nuna chichaak
“Maj Yusá, nu túrakmincha ¿yaki iwiaaku pujusat?
24 Kame uunt kanusha Kitimnumia̱ nayantsa kaanmatkari̱ya̱ jíintrar
Asirianmaya̱ aents tura Iwirnumia̱ aentssha peṉké wáitkiasartatui.
Túrasha nisha núnisaraṉ ashí emeskamu ártatui” tímiayi. 25 Nuya̱ṉka Paraamsha ni nuṉke̱n waketkimtai Paraksha núnisaṉ waketkimiayi.