Wekasarma

Matian aents máwarma

31 Uunt Yus Muisaisan áujeak chicharuk 2 “Israer shuar jákarmanum ti nekas yapajmiatkum Matian aents máwarta. Nu túram ame úuntrum jaka ayamainia nui̱ ayamuttame” tímiayi. 3 Nuya̱ṉka Muisais ashí aentsun irur áujainiak chichaak “Mesetan juárkiarat atumí shuari̱ iwiarkatarum túrarum Uunt Yus yapajmiátkatai tusarum Matiannumia̱ aents weritiarum. 4 Tura mesetnum akupeakrum chikichik weanmaya̱ṉ mir akupeakrum ashí tuse weanmaya̱ akupkatarum” tímiayi. 5 Kame Israer shuarka tí untsurí áiniayat chikichik weanmaya̱ mir wénak ashikia tuse mir mesetan iwiarnatkarmiayi. 6 Tura Muisais mesetnum akupénak chikichik weanmaya̱nak mir chíkichnumia̱nash mir irur Yúsnan pujurin Iriasára uchirí̱ Piniasja̱i̱ akuprámiayi. Kame niṉkia wéak Yus Shiir Awajtai̱ Je̱e̱n takatai̱ írunun yaruak tura mesetnum umpuartinniasha kachun jukí̱ wémiayi. 7 Tura Uunt Yus Muisaisan akupkámia núnaka tímiatrusaṉ umikiar Matiannumia̱ aentsun mesetan najatawarmiayi. Túrawar áishmaṉnaka ashí amukármiayi. 8 Kame nu mesetnun Matian nuṉka úunt akupniuri̱ seṉku armia nuna Iwin, Rikimian, Suran, Uran tura Rípan máwarmiayi. Núnisaṉ Piura uchirí̱n Paraamnasha puya̱ja̱i̱ máwarmiayi. 9 Túrawar Israer shuarka Matiannumia̱ nuwa̱n tura uchincha achirar yaruakarmiayi. Núnisaraṉ Israer shuarka waakancha muriknasha tura kuit nui̱ iruniarmia nunasha jú jú awajsarmiayi.*