Wekasarma

Muisais Kanaan nuṉka nakaararma

32 32:​1-19 Ruwin shuar, Kaat shuar tura Manasés shuar nuṉka jímiapetek nakaakarmia nuka Jurtan entsa amainia̱ nuṉkan seainiakui Muisais aṉkant aṉkant nuṉkan nakaararmiayi. Antsu mesetan najanawar Kanaan nuṉkanka ata̱i̱niarmiayi. 20 Nuya̱ṉka Muisais chicharainiak “Nu túrarum atumí puya̱ri̱ achikrum Uunt Yus íimmianum mesetnum wetarum. 21 Meset iwiarnatkarum atumí suntari̱ Uunt Yussha íimmianum Jurtan entsa ashí katitrarum atumí nemasri̱ atumíya̱ṉka ji̱i̱ra akupratarum. 22 Tura Uunt Yus íimmianum nuṉkasha nérentin ajasrum antsu nui̱ṉkia Uunt Yusai̱sha tura Israer shuarai̱sha túratniun amasmajrumna nu umikrum tura aṉkant ajasrum waketratarum. 23 Túrasha átum tárumna núnisrum túrachkurmeka Uunt Yusai̱ tunáa túrattarme tura ju̱sha nekaatarum atumí tunaari̱ṉ jeartámattarme. 24 Kame atumí uchirí̱ matsamsartin péprusha je̱a̱rmaktarum tura murik matsamsartincha péṉkratarum túrasha nekas túrattaji tíniuitrumna nusha umiktarum” tímiayi. 25 Nuna takui̱ Kaat shuarsha tura Ruwin shuarsha Muisaisan chicharainiak “Ame takarniúram ainia nuka winia úuntur tana núnaka tímiatrusaṉ túrawartatui. 26 Ii uchirí̱ṉkia tura ii nua̱ri̱sha nuyá̱ ii murikrí̱sha ii waakari̱sha núnisaṉ ashí ii taṉkuri̱sha Karaat nuṉkanam pepru írunna nui̱ṉ juákartatui. 27 Antsu ame takartámin mesetan iwiarnatkar matsatáinia nuka mesetnum wénak Uunt Yus íimmianum winia úuntur akupeana núnisaraṉ naṉkaamarartatui” tiármiayi.

28 32:​28-42 Tura Ruwin shuar tura Kaat shuar nuyá̱ ishichik Manasésa shuarsha Amun aents, Pasan aents tura Matian nuṉke̱n atantrarmia nuna aṉkantin ti shiir waakasha matsatma ajamniauyayi. Tuma asamtai Muisaisan ju̱ka ii nuṉke̱ atí tusa seawarmiayi. Tuíniakui Muisaissha chichaak “Péṉkeraiti. Túmaitkiuisha emka Israer shuarja̱i̱ métek Jurtan entsa katitkirum Kanaan nuṉka ata̱i̱tin yaiṉtarum” tímiayi.*