Matéu
Jesusa unuiniamuri̱ ayamtai̱ tsawantnum trikiu pákamu
(Mar. 2:23-28; Ruk. 6:1-5)
12 Nuyá̱ Jesus ayampratin tsawantai̱ ajanmaṉ ajapéni̱ṉ naṉkaamamiayi. Ni unuiniamuri̱sha tsukarar trikiu neren maju̱sar yukamakia wéarmiayi. 2 Pariséu shuarsha nuna wáinkiar Jesusan aniasarmiayi “Iistá, ame unuiniamuram ayampratin tsawantai̱ túratin surimkiamua nuna túruiniawai.”
3 Tutai Jesus chichaak “Yaunchu úunt akupin Tawitcha tura nemarniusha tsukamainiak túrawarmia nu ántichukaitrum. 4 Yusa Uunt Je̱e̱n wayá̱ Yus Iiji̱a̱i̱ Pujawai tama páṉkan yuámiayi. Nu paṉsha aya Yúsnan pujurniuk yúatin asamtai Tawitniasha tura ni nemari̱n ana nunasha suritkiamuyayi. Túmai̱ṉ yúawarmiayi. 5 Muisais akupkámunam aarma nu áujsachukaitrum. Yúsnan pujurniuka ayampratin tsawantai̱ takainiayataṉ makumacharmiayi. 6 Nekas tájarme, yamái Yusa Je̱e̱n enentáimtustinia nuna naṉkaamas Wíniaka Aents Ajasuitjiana nu, nekas enentáimtursatniuitrume. 7 Yus Papinium tawai ‘taṉku máarum áesturatniuja̱i̱sha naṉkaamas nekaska Winia anentak tusan wakerajai.’* Nu nekas nékaitkiurmeka yamái túrarmena núnisrum tunáa túrachu ántrarum sumamtikiachaintrume. 8 Wi Aents Ajasu asan ayampratin tsawantan úuntri̱ntjiai” tímiayi.
Shuara uwejé̱ jakaan Jesus tsuarma
(Mar. 3:1-6; Ruk. 6:6-11)
9 Jesus nuyá̱ we Israer shuar iruntai̱niam waya̱miayi. 10 Nui̱ shuar uwejé̱ jaka ámiayi. Tura Jesusan ántar nekapsatai tusa wakeruinia ásar anintruiniak “¿Ayampratin tsawantai̱ jaa shuar tsuárminkiait?” tiármiayi. 11 Tutai Jesus chichaak “Atumsha atumí murikrí̱ ayampratin tsawantai̱ wa̱a̱nam akaikí̱ iniamtai jusatai tusarum wéchaintrumek. 12 Antsu shuarka murikji̱a̱i̱ naṉkaamaschakait. Tuma asamtai ayampratin tsawantai̱sha péṉkera nu túramniaiti” tímiayi. 13 Tinia iniais áishmaṉkan uwejé̱ jakaan chicharuk “Uwejé̱m takuitia” tutai uwejé̱ takuí chíkich uwejé̱ja̱i̱ métek péṉker ajasmiayi. 14 Nuna túramtai Pariséu shuar a̱a̱ jíinkiar Jesus itiurak máwaintiaji tusar chichaman najatiarmiayi.
Isayas Jesusna timia uminkiamu
15 Jesus nin mátniun nekaama nuyá̱ jiinkimiayi tura wéakui untsurí shuar nemariarmiayi. Untsurí jáiniancha tsuámiayi. 16 Tsuar “etserkairap” tinia akupiármiayi. 17 Yaunchu Yúsnan etserin Isayas timia nu uminkiati tusa túrunamiayi. Nisha ju̱na áarmiayi.
18 “Ju̱i̱ti Wi achikmaj nu.
Nisha Wi tájana nuna umin asamtai ti aneakun Niji̱a̱i̱ waraajai.
Winia Wakantrun Nin akupkáttajai.
Nisha ashí nuṉka mátsatkamun sumamtikiatniun etserkattawai.
19 Tura chichaaksha kakantar chichakchattawai.
Winia anturtukarat tusa péprunam wéak untsukchartatui.
20 Tura pintiu punuancha kupikchattawai.
Núnisaṉ ji kaji̱niuncha ikiajniákchattawai.
Antsu nekasa nuja̱i̱ métek sumamtikiattawai.*
21 Tura Israer shuarchasha Nin nekas enentáimtusartatui.”*
Iwianchi kakarmari̱ji̱a̱i̱ Jesus túrawai timia
(Mar. 3:19-30; Ruk. 11:14-23; 12:10)
22 Nuyá̱ Jesusan shuar yajauch wakantrukun itiariármiayi. Nu shuar ji̱ kusurúsha chichachusha ámiayi. Tura Jesus tsuármatai paant iimsamiayi tura chichakmiayi. 23 Nuna wáinkiar shuar shiir enentáimprar chicharainiak “¿Tawitia uchirí̱ pampaṉku iniaṉnamu uwemtikkiartin tátinia nuáshit?” tiármiayi.
24 Tura Pariséu shuarsha nuna antukar yajauch enentáimtuiniak “Ju̱ka iwianchi kapitiántri̱n Pirsepún umirniuiti. Tuma asa nuna kakarmari̱ji̱a̱i̱ yajauch wakaní̱n ji̱i̱ki̱ akupeawai” tiármiayi. 25 Jesus tu enentáimainian neka asa chichaak “Nú nuṉkanmaya̱ shuar nuamtak kajernaiyakuiṉkia nú nuṉka wari meserchattawak. Núnisaṉ nuamtak shuar ní shuarja̱i̱ mánainiakka amunaikchartatuak. 26 Núnisaṉ íwianch nuamtak ji̱i̱ki̱ akupnáiniakka mánaikiar wárik amuukashtatuak. 27 Kame Wi Pirsepú iwianchi kakarmari̱ji̱a̱i̱ iwianchin ji̱i̱ki̱ akupeakuiṉkia atumí uchirí̱sha ¿yana kakarmari̱ji̱a̱i̱ṉ ji̱i̱ki̱ akupéna? Ni túramuri̱ji̱a̱i̱ átum awajirma nekamatarum. 28 Wi Yusa Wakaní̱ kakarmari̱ji̱a̱i̱ yajauch wakaní̱n ji̱i̱ki̱ akupea asamtai atumsha Yusa akupeamuri̱ atumíin jeartámarmena nu nekaatniuitrume. 29 Iistá. Shuar kakarma nuna kuítri̱n kasarkataj tákuṉka emka jiṉkiartatui nuyá̱ ni je̱e̱n wai̱ntiá kasarkamniaiti.
30 Wiji̱a̱i̱ tsaniṉ pujatsna nuka winia nemasruiti. Núnisaṉ Winia yáintsuna nu aya itiurchat nájateawai. 31 Tuma asamtai tájarme, Ashí shuar yajauchin túruinia nusha yajauch chichainia nusha tsaṉkuratin awai. Antsu Yusa Wakaní̱n yajauch chicharin ainia nuka tsaṉkurashtiniaiti. 32 Winiasha Aents Ajasuitjiana nuna yajauch chichartuinia nú shuarsha tsaṉkuramniaiti. Tura Yusa Wakaní̱n yajauch áujmatainia nuka peṉké tsaṉkurachminiaiti. Ju̱ nuṉkanmasha tura ukunmasha tsaṉkurnarchattawai” tímiayi.
Númikia nere̱ja̱i̱ nekaamniaiti
(Ruk. 6:43-45)
33 “Yutai̱ númikia péṉkeran nereawai. Tura tséas numisha yajauchin nereawai. Ni nere̱ja̱i̱ numi nekaamniaiti. Atumji̱a̱i̱sha núniskete. 34 Yajauch wenumkatirmesha tura imiá yajauchitirmesha ¿itiurak péṉker chichamsha chichastarum? Shuarka ni enentái̱ya̱ enentáimna nuna chichawiti. 35 Péṉker shuar péṉker enentáimiu asa shiir chichawiti. Tura yajauch shuar yajauch enentáimiu asa yajauch chichawiti. 36 Tura Wisha tájarme, nekapnastin tsawant jeamtai ashí enentáimtsuk chichakma nuna Yusan paant ujakártatui. 37 Iis, ame chichammiji̱a̱i̱ nekanattarme. Péṉker chichakuitkiumka sumamashtatme. Tura péṉker chichakchaitkiumka sumamattame” tímiayi.
Shuar yajauch ásar iniakmamu seamu
(Mar. 8:12; Ruk. 11:29-32)
38 Pariséu shuarsha Israer shuara jintinniuri̱sha Jesusan chicharuk “Uuntá, ame Yusai̱ya̱itjiai tusam nayaimpinmaya̱ kakarmaja̱i̱ iniakmamu túrata, iisha wáinkiatai” tiármiayi. 39 Tutai Jesus chichaak “Shuar yajauch tura Yusan enentáimtachu ásar nayaimpinmaya̱ iniakmamun seainiawai. Tuma asamtai áyatik yaunchu Junas túrunamu iniakmastiniaiti. 40 Junas menaintiú kashi menaintiú tsawantcha namaka ampuje̱n eṉkemiayi.* Núnisnak Wi, Aents Ajasu asan, menaintiú kashi menaintiú tsawant nuṉká jakan tepestatjai. 41 Junas Níniwinmaya̱ aentsun Yus Chichaman ujakármia nui̱ nu shuar ni yajauch túrutai̱n enentáimtusar ni enentái̱n yapaji̱áwarmiayi. ¡Tura ju̱i̱ yamái Junasja̱i̱ naṉkaamas etserin pujawai! Tuma asamtai nekapsatin tsawant jeamtai Níniwinmaya̱ aents ju̱yá̱ shuaran sumamtikiawartatui.
42 Yaunchu nuwa̱ yajaya̱ shuaran úunt akupniuri̱yayi. Kame Saramúṉ ti neka asamtai nu nuwa̱ nin anturkataj tusa werimiayi. ¡Tura ju̱i̱ yamái Saramúṉja̱i̱ naṉkaamas anturkamnia pujawai! Tuma asamtai nekapsatin tsawant jeamtai nu nuwa̱ ju̱yá̱ shuaran sumamtikiawartatui” tímiayi.
Yajauch wakan ji̱i̱ki̱ akupkámuitiat wáketma
(Ruk. 11:24-26)
43 “Shuara enentái̱ya̱ yajauch wakan jiinkí̱ yumi peṉké yútatsna nui̱ wéawai. Tura nui̱ péṉker pujustinian wáinkiach ataksha waketkitniun enentáimiui. 44 ‘Wi jiinkimiaj nui̱ waketkittiajai’ tawai. Tura waketki̱ shuara enentái̱n péṉker iwiaramu tura aṉkantan wainiak 45 ni ai̱n siati iwianchin niji̱a̱i̱ naṉkaamas yajauchin itiá shuara enentái̱n eṉkemáwartatui. Túrunamtai nu shuar nuiki̱ núna naṉkaamas yajauch ajastatui. Núnisaṉ ju̱yá̱ shuar túrunawartatui” tímiayi Jesus.
Jesusa yachí̱ tura Jesusa nukurí̱
(Mar. 3:31-35; Ruk. 8:19-21)
46 Jesus nu shuarja̱i̱ tuke chichaak pujái̱ ni nukurí̱sha ni yachi̱sha tariarmiayi. Tura a̱a̱ wajasar Niji̱a̱i̱ chichastaj tiármiayi. 47 Túramtai Jesusan ujainiak “Ame nukusha yatsumsha a̱a̱ wajasar chichastaj turamainiawai” tiármiayi. 48 Chichaman ujakmia nuna Jesus chicharuk “Winia nukursha winia yatsursha ¿ya ainia?” 49 Nuyá̱ ni unuiniamuri̱n iniakmas chichaak “Ju̱ áiniawai winia nukurka tura winia yatsurka. 50 Ashí shuar winia Apar nayaimpiniam pujana nuna wakeramuri̱n umirainia nu winia yatsurka winia umaruka winia nukurka áiniawai” tímiayi.