Matéu

Métektaku chichamja̱i̱ Jesus unuikiartamu

(1) Atsaamin atsaampramiayi

(Mar. 4:1-9; Ruk. 8:4-8)

13 Nu tsawantai̱ Jesus ni je̱e̱ya̱ jiinkí̱ antumiaṉka kaanmatkari̱n pujusmiayi. 2 Tura ti untsurí shuar káunkarmatai kanunam eṉkemár pujusmiayi. Shuarka antumiaṉka kaanmatkari̱n pujusármiayi. 3 Túrunawarmatai untsurí métektaku chichamja̱i̱ unuiniak chichaak “Atsaamin atsaamprataj tusa jiinkimiai. 4 Atsaamki̱ wesa arakri̱ jintia katsurmanam iniaarmai. Tura chiṉki káutkar yúawarmai. 5 Chikitcha kaya írunmanum iniaarmai. Nuṉka ishichik asamtai wárik tsapainiarmai. 6 Tura péṉker kaṉkaprurcharu ásar etsa̱ etsantar sukuam káararmai. 7 Chikitcha jaṉkí nupa̱nam iniaarmai. Tura jaṉki wárik tsakar nupetak ajakramai. 8 Chikitcha péṉker nuṉkanam iniaarmai. Nusha péṉker nerekar chíkich sian nerekarmai. Tura chikitcha sasaintia tura chikitcha traintia nerekarmai. 9 Kuishim ákuiṉkia antuktarum” tímiayi.

“¿Urukamtai aya métektaku chichamja̱i̱ jintíam?”

(Mar. 4:10-12; Ruk. 8:9-10)

10 Nuyá̱ ni unuiniamuri̱n Jesusan taruntar anintruiniak “¿Urukamtai aya métektaku chichamja̱i̱ ju̱ shuar unuiniam?” tiármiayi. 11 Tutai Jesus chichaak “Urukuk ju̱ nuṉkanam Yus akupin ati, nuka yaunchu nekanachmiayi. Tura yamaikia Yus ashí nuna atumín paant iniakturmawai. Antsu chíkich nuna nekaachmin áiniawai. 12 Kame núkap takakna nu shuar nú nukap patatnaktatui tura tí nukap takustatui. Antsu ishichik takakna nuka ishichik takakuk juruktiniaiti. Núnisaṉ Yusna tí nekarmena nu nú nukap yúpichuch nekaattarme. Tura ishichik nékarum wárik kajinmátkittiarme. 13 Tuma asamtai aya métektaku chichamja̱i̱ unuiniajai. Nú shuarka íiniayataṉ wainiainiatsui. Ántuiniayataṉ ántachua núnis nékainiatsui. Túmainiak Winia nekarainiatsui. 14 Nuja̱i̱ yaunchu Yúsnan etserin Isayas timia nu uminkiaiti.

16 Tura átumka paant wainkia asarum péṉker anta asarum shíiraitrume. 17 Nekasan tájarme, untsurí Yúsnan etserniusha tura péṉker shuarsha átum yamái wáintrum nuna wáinkiatniun wakeruiniayataṉ wáinkiacharmiayi. Tura átum yamái ántarme nuna antuktinian wakeruiniayataṉ antukcharmiayi” tímiayi.

Jesus atsaampramu chichaman paant awajma

(Mar. 4:13-20; Ruk. 8:11-15)

18 “Antuktarum. Atsaampramu chichaman paant jintintiátjarme. 19 Árak jintia katsurmanam iniaararma nuka shuar Yus Chichaman ántayataṉ ni enentái̱n ikiuiniatsna núiti. Tura íwianch nú Yus Chicham ni enentái̱n atsaampramua áinis antukman kajinmamtikiui. 20 Árak kaya írunmanum iniaarma nuka shuar Yus Chichaman antuk waras umirainia núiti. 21 Tura núkap kaṉkaprurcharu ásar katsuiniatsui. Antsu itiurchatan íṉkiuiniak tura Yus Chichaman wakeruinia ásarmatai chíkich yajauch áujmatam wárik iniaisar ikiuiniawai. 22 Árak jaṉki írunmanum iniaarma nuka shuar Yus Chichaman antuk emka umirna núiti. Tura ju̱ nuṉkanam írunna nuna tuke páchiniak ni kuítri̱ncha ti enentáimtuinia ásarmatai ashí Yus Chichaman enentáimtamun núpeteawai. Tuma asamtai nu shuarnum Yus Chicham atsaampramu nereatsui. 23 Tura árak péṉker nuṉkanam iniaarma nuka shuar Yus Chichaman antuk péṉker umirainia núiti. Tura péṉker nerenawai. Chíkich sian nerekarma núnis chikitcha sasaintia nerekarma núnis tura chíkichkia traintia nerekarma núnis áiniawai” tímiayi Jesus.

(2) Yajauch nupa̱ tríkiunam atsaamkamu

24 Jesus ataksha ju̱ métektaku chichaman áujmatsamiayi. “Shuar Yus akupeamunam pachinkiartin jú̱nisaiti. Shuar péṉker arakan tríkiun ni nuṉke̱n araamai. 25 Tura ashí kanararmatai nemasri̱ kashi tarí trikiu arakmanum yajauch nupa̱n aratak ikiukmiai. 26 Trikiu tsapakar nereakui nuyá̱ yajauch nupa̱sha nusháa nereku asa ti paant ajasmai. 27 Nuna iisar takainia nu ni úuntri̱n werí chichaak ‘Uuntá, ¿péṉker arak araachmakam? ¿Itiura ju̱sha yajauch nupa̱sha tsapakuit?’ 28 Tutai nérentin chichaak ‘Winia nemasur arakuiti.’ Takui̱ ni takarniúri̱ chichaak ‘¿Yajauch nupa̱n uwerat tusam wakerutamek?’ 29 Tutai ‘Atsá, uwerairap. Yajauch nupa̱ uweaj tukamarum trikiu uweniirum. 30 Iniaisatarum. Antsu métek tsakakti. Júuktin tsawant jeamtai winia takartinian emka yajauch nupa̱n uwer irumar jiṉkiawarat tusan akupkartatjai. Tura áesawartatui. Tura trikiu nere̱n júukar péṉker ikiusarat tusan akupkartatjai’ timiai” tímiayi Jesus.

(3) Mustasa jiṉkiái

(Mar. 4:30-32; Ruk. 13:18-19)

31 Jesus ataksha métektaku chichaman áujmatsamiayi. “Shuar Yus akupeamunam pachinkiartin mustasa jiṉkiaiya áintsaṉkete. Shuar péṉker nuṉke̱n araamai. 32 Mustasa jiṉkiaiṉkia imiá uchichitiat tsapái̱ tsakaakka ashí numichiji̱a̱i̱ naṉkaamas uunt ajawai. Ti uunt asamtai chiṉki ni kanawe̱n pasuṉmainiawai” tímiayi Jesus.

(4) Karin eṉketátin

(Ruk. 13:20-21)

33 Núnisaṉ chíkich métektaku chichaman áujmatsamiayi. “Shuar Yus akupeamunam pachinkiartin karinia áintsaṉkete. Nuwa̱ nijiamchiniam karinia eṉkea mash páchimiawai. Tura nu mash karimtikiawai” tímiayi.

Jesus aya métektaku chichamja̱i̱ṉ jintinma

(Mar. 4:33-34)

34 13:​34-35 Ashí nuna Jesus métektaku chichamja̱i̱ áujmatsamiayi. Yaunchu Yúsnan etserin timia nu uminkiati tusa túramiayi. Etserin ju̱na áarmiayi

tu áarmiayi. Nu asamtai aya métektaku chichamja̱i̱ṉ áujmatmiayi Jesus.

Tríkiunam nupa̱ atsamkamun paant awajma

36 Nuyá̱ shuaran ikiukí̱ Jesus je̱á̱ támiayi. Túramtai ni unuiniamuri̱ tariar “Yajauch nupa̱ áujmatmena nu paant awajsata” tiármiayi. 37 Tutai Jesus chichaak “Wi Aents Ajasuitjiai. Wi péṉker arakan atsaamkaitjiai. 38 Ashí nuṉka aja áintsaiti. Péṉker jiṉkiái Yus shuaran Yus akupea nuna nakumeawai. Yajauch nupa̱ iwianchna ainia nuna nakumeawai. 39 Tura íwianch ii nemasri̱ asa yajauch nupa̱n arakuiti. Tura nuṉka amúamunam Yusa suntari̱ arakan júuktinia áintsaṉ shuaran yaruaktatui. 40 Yajauch nupa̱ irur jinium áesatniua ánis nuṉka amúamunam túrunattawai. 41 13:​41-42 Nui̱ Wi Aents Ajasu asan winia suntarun akupkáttajai. Tura ashí yajauchin túruinia nunasha tura chikichan tunaanum útsuinia nunasha ashí irurar jinium apeáwartatui. Nui̱sha ti úttin ti wáitsatniusha átatui. 43 Antsu péṉker túruinia nuka ti shiir wincha ajasár* ni Aparí̱ akupeana nui̱ étsa̱ya núnis tsáapnin ajasártatui. Wats, kuishim átsuk. Antukta.

(5) Kuit wainkiamu

44 Shuar Yus akupeamunam pachinkiatin kuit nuṉká u̱kma áintsaṉkete. Shuar nu kuítian wainiak nuiṉ ataksha u̱kmai. Tura ti waras waketki̱ nu kuit niniu atí tusa ashí ni takakman suruk nu nuṉkan sumakmai.

(6) Shíirmach kaya ti kuitia nu

45 Shuar Yus akupeamunam pachinkiatin jú̱nisaiti. Shuar kayachin ti shíirman e̱a̱k wekaana áintsaṉkete. 46 Tura kayan ashí naṉkaamas kuit jean wainiak waketki̱ ashí takakna nuna suruk nu kayan niniu atí tusa súmawai.

(7) Neka

47 Shuar Yus akupeamunam pachinkiartin jú̱nisaiti. Shuar nekaja̱i̱ namakan achía áintsaṉkete. Nekan nayantsanam aju̱ntak chíkich namakaim achíawai. 48 Tura nekanam nemarmatai kukar ji̱i̱ki̱, nui̱ péṉker namaknasha chaṉkinnium chumpiniawai. Tura yajauch namaknaka ajapenawai. 49 Núnisaṉ átatui nuṉka amúamunam. Yusa suntari̱ taara péṉker enentáimkia ainia nuna tura Yusan enentáimtichu ainia nuja̱i̱ akantrar 50 uunt jinium apeáwartatui. Nui̱sha tí uttin tura tí waitsatin átatui.” Nuna ashí ni unuiniamuri̱ji̱a̱i̱ Jesus áujmatsamiayi.

Yamái tura yaunchu jintíamu

51 Jesus nuna tuasua amuk “¿Ju̱ mash antukurmek?” tutai ni unuiniamuri̱ “Ee, Uuntá, ashí antukji” tiármiayi. 52 Tuíniakui Jesus chichaak “Ashí Yus Chichaman tuke aaru ainia nu nayaimpiniam Yusa akupeamuri̱n péṉker unuimiáruka je̱a̱ néreniuri̱ya áintsaṉkete. Ni kuitri̱ ikiutai̱nmaya̱ yamái nekaamuja̱i̱sha tura yaunchu nekaamuja̱i̱sha jí̱i̱kminiaiti.”

Jesus Nasarétnum wáketma

(Mar. 6:1-6; Ruk. 4:16-30)

53 Jesus nu métektaku chichaman áujmatas amuk nuyá̱ wémiayi. 54 Tura ni pépruri̱n Nasarétnum jeá Israer shuar iruntai̱niam wayá̱ unuiniamiayi. Tura nuyá̱ shuar antukar tí enentáimprarmiayi. Tura “¿Ju̱sha tui̱ imiá unuimiáruit. Itiurak aents tujintiamun tura? 55 Ju̱ka numiji̱a̱i̱ takáu uchirí̱nchukait. Nukurí̱sha Marichukait. Tura ni yachi̱sha Sántiak, Jusé, Semuṉ, Jútas áiniatsuk. 56 Tura ni umai̱sha iiji̱a̱i̱ írutra pujuiniatsuk. ¿Nuikia itiura mash neka?” tiármiayi. 57 Túrawar Jesusan itiurchat enentáimturarmiayi. Túramtai Jesus chicharuk “Yúsnan etserniun ashí shuar péṉker anturainiawai túrasha ni nuṉke̱ya̱ shuarka tura ni shuari̱sha niṉkia anturainiatsui” tímiayi. 58 Tura nú shuar Jesusan enentáimtuiniachu ásarmatai aentsti tujintiamun aya ishichik túramiayi.