Juaṉ

Iikia murikiua áintsar aji

10 Jesus chichaak “Wi tájana nu ti nekasaiti. Shuar murikiun takakna nu ni murikrí̱n wenuimiunam kashi ikiuawai. Tura murik wenuimiunam pujuiniakui yajauch shuar murikiun kasamkatniun wakerakka wáitiniam waya̱chmin asa tanishnum waruk yajá waya̱wainti. 2 Antsu murikiu wáinniuka wáitiniam waya̱a̱wai.

3 Waiti wáinniuka nekas murikiun wáinniun wáitin uratui. Muriksha ni wainniuri̱ chichame̱n nékainiawai. Nisha ashí ni murikrí̱n chikichik chikichik náari̱n anaitius untsúawai. Tura tsawai̱kia ni murikrí̱n ji̱i̱ki̱ ayurtainiam yarumui. 4 Tura ashí ni murikrí̱n ji̱i̱r émtuki̱ wéawai. Muriksha ni chichame̱n ántuiniak untsúam nemarainiawai. 5 Chíkich shuarnaka nékachu ásar nemarainiatsui. Antsu ni chichame̱n nékainiachu ásar pisainiawai” tímiayi. 6 Nu métektaku chichamnaka Jesus áujmatsamiayi tura shuar antukar nekaacharmiayi.

Péṉker wáinniuka Jesusaiti

7 Nuyá̱ Jesus chichaak “Ti nekasan tájarme. Murik wainia nu wáitinkia Witjiai. 8 Wi táatsa̱i̱ṉ ashí eem táaruka kasa áiniak winia shuarun kasartuktaj tusa wakeriarmiayi. Tura winia murikiur anturkacharmiayi. 9 Wikia wáitiya núnisketjai. Ashí Winin waya̱a̱ka uwemprattawai. Tura murikiua áintsaṉ wenuimiunmaya̱ jiinkí̱ péṉker yurumáttawai tura atak wayá̱ ayamprattawai.

10 Kásaka aya kasamkatniuncha mátniuncha emesratniuncha wakeruiniawai. Antsu Wikia yamaram iwiaakman tuke atsumtsuk nekaprarti tusan táwitjiai. 11 Wikia péṉker wáinniuitjiai. Péṉker wáinniuka ni murikrí̱n uwemtikrartaj tusa jakattawai. 12 Antsu aya kuitji̱a̱i̱ takauka ni murikri̱chu áiniakui tura nekas wáinniuchu asa péṉker waintsui. Kame úunt ya̱wa̱ winiakui murikiun ikiukí̱ pisaawai. Úunt ya̱wa̱sha murikiun achik tsakiṉmawai. 13 Nu shuarsha akikiam takáa asa murikiun enentáimtatsui. Nu asamtai aya pisaawai.

14 10:​14-15 Wikia péṉker wáinniuitjiai. Winia Aparsha nékarui. Wisha Aparun nékajai. Núnisnak murikrun nékajai tura winia murikrusha nékarui. Wisha murikiun uwemtikrataj tusan jakattajai. 16 Chíkich muriknasha takakjai. Nusha ju̱ wenuimiunmaya̱nchu áiniawai. Nunasha itiattajai. Nu muriksha Winia umirtukar ashí métek matsamsar chikichík wenuimiunmaya̱ ajasártatui tura chikichik wáinin átatui. 17 Winia murikrun uwemtikrataj tusan jakattajai túran atak nantaktiatjai. Nu asamtai winia Apar anentui. 18 Wi wakerakun jakattajai. Wi wakerachkuiṉkia chíkichkia mantuachminiaiti. Jákatniuncha tura nantaktinniasha winia Apar surusuiti” tímiayi Jesus.

19 Israer shuarsha nuna antukar niisháa enentáimprar kanakiármiayi. 20 Untsurí chicharainiak “¿Urukamtai ántarum wáuruk tausha. Yajauch wakaní̱n takaktsuk?” 21 Tura chikitcha chichainiak “¿Yajauch wakantri̱nniusha núnisaṉ chichasminkiait. Yajauch wakantri̱nniusha kusurun íimtikramniashit?” tiármiayi.

Israer shuarka Jesusan nakitrámu

22 Micha nantutin Israer shuar Jerusaréṉnum namperan najanainiawai. Nu nampernumsha Yusa Uunt Je̱e̱ atak je̱a̱mman enentáimtuiniawai.

23 Jesussha Yusa Uunt Je̱e̱ Saramúṉka á̱a̱ri̱ya nui̱ wekasamiayi.

24 Israer shuarsha Nin téntakar chicharainiak “¿Ame nekas Krístukaitiam? Ju̱ chichamaik etserkata. ¿Urukamtia nekas paant tátsum?” tiármiayi. 25 Tutai Jesus chichaak “Yaunchu tiniu ai̱ṉ enentáimturachmarme. Winia Apar akupkámun takaajna nu ti paant awajtawai. 26 Tura átumka winia murikruchu asarum enentáimturtsurme. 27 Wisha winia murikrun untsúam anturtuiniak nemartuiniawai. Wisha wínianak mash nékajai. 28 Tura yamaram iwiaakman tuke jákashtinian súajai. Nu asamtai jákachartatui tura Wi wáinmancha ¿yaki jurutkit? 29 Winia Aparka murikiun surusuiti. Nisha ashí naṉkaamas kakaram asamtai ¿yaki Ni uwejé̱ya̱n atankit? 30 Wikia winia Aparja̱i̱ aya chikichkitji” tímiayi Jesus. 31 Tutai Israer shuarsha atak kayan achikiar tukutaj tiármiayi.

32 Jesussha chichaak “Winia Aparu kakarmari̱ji̱a̱i̱ ti untsurí péṉkera nuna takasuitjiai. ¿Túja̱i̱mpia mantuattarum?” 33 Israer shuarsha Nin chicharainiak “Péṉker tura asakmin mátaj tátsuji antsu Yus yajauch chicharkumin túrattaji. Ámeka shuáraitiatam Yusa nuke enentáimtumame” tiármiayi. 34 Nuyá̱ Jesussha chichaak “Atumí akupeamuri̱i̱n Yus timia nu áarmaiti ‘Átum yúsaitrume’* tawai. 35 Kame Yus Papinium aarma nu tuke nekaschakait. Tuma asamtai ni chichame̱n antukarun Yuska ‘yúsaitrume’ takui̱ nuikia ti nekaschakait. 36 Nisha yúsaitkiuiṉkia nuikia Yus Apa anaikia ju̱ nuṉkanam akupkámu asan ti nekas Yúschakaitiaj. Núja̱i̱ṉkia wi ‘Yusa Uchirí̱ntjiai’ takui̱ ¿itiurak ‘Yusan yajauch chicharui’ túrutrum? 37 Winia Apar túramu túrachkuiṉkia enentáimtursairap. 38 Tura nekas túrakuiṉkia enentáimtursatarum. Tura Winia nakitrakrumsha nuikia wi túramu enentáimtustarum. Núja̱i̱ṉkia winia Apar Winin pujamu ashí nekaattarme. Núnisnak Wisha Niin pujajai. Iisha chikichkitji.” 39 Tutai ataksha sepunam eṉkeatai tiármiayi. Túrasha Jesus uwempramiayi.

40 Nuyá̱ Jesus Jurtannum amain we yaunchu Juaṉ imiakrattainium pujusmiayi. 41 Ti untsurí shuar iyuwar chichainiak “Nekas Juaṉka aentsti tujintiamun túrachiat ashí Jesusnan timia nu nekasaiti” tu tiármiayi. 42 Nui̱sha untsurí Jesusan enentáimtusarmiayi.