Muisais Ujakma

Akupkámu chichaman Muisais awena ujaamu

1 Tura Sup nuṉkanam Paran, Tupir, Rapan, Jaserút tura Tisajap pepru armia nui̱ Jurtan entsa ju̱i̱ni̱ kampuntin atsú Arapán Muisais Israer shuaran chicharkarmia nuka ju̱ áiniawai. 2 Tura naintiar naintiar Sáirnumaani̱ wéakur Urepnumia̱ jíinkir Káatishnum jeatniuka aunse tsawant najanamiaji. 3 1:3-4 Kame Muisais Amur aentsu akupniúri̱n Sejunan Ishpunnum pujan tura Úkan Pasana akupniúri̱n Itri nuṉkanam nuntumas Astarútnum pujan nupetkarmiayi. Nuyá̱ uwí kuaraintiatin emka nantu náṉkamuk tsawant chikichkitin Muisais Israer shuar Uunt Yus akupkámu umiktin chichaman ujakármiayi. 5 Nuyá̱ Jurtan entsa ju̱i̱ni̱ Muápnum Muisais Yus akupkámu umiktin chichaman jintíatniun náṉkamuk chichaak 6 “Ii Uunt Yusri̱ Urepnum chichartamuk ‘Atumsha jú̱ nainnium tí nukap tsawant pujusúrme. 7 Tuma asamtai waketkirum Amur aents tura Arapánam tíjiu̱ch naintiar naintiar nuṉkanmaani̱ matsatainia nuní̱ wetarum. Túrarum Seperanam Nekep nuṉkanmaani̱ wéakrum nayants ayamach Kanaan aentsu nuṉke̱ni̱ naṉkaamaktiarum. Nuya̱ṉka Ríwianunmaani̱ uunt Yúpratis entsa tímianai jeatarum. 8 Túrarum iistarum Wi yamaikia ju̱ nuṉkan amaajrume. Tuma asamtai ju̱ nuṉkan atumín nekas amastiniaitjiarme tura átum kajinkiakrumnisha atum aentsun súsartiniaitjiai. Uunt Yus atumí úuntri̱n Aprajáman, Isakan tura Jakupan tímiania nu nuṉkanam yamaikia waya̱rum nuṉka nérentin ajasrum matsamsatarum’ turammaji.

Sumamtikniun Muisais anairamu

9 1:9-18 Uunt Yus tí untsurí awajtámsa asakrumin wiki júkichminiaitjiarme. Tuma asamtai yamaikia atumíya̱ áishmaṉ neka tura péṉker esetar enentáimin áiniana nu anaikiatarum. Túrawakrumin atumí úuntri̱n wi anairartatjai tímiajai. Tura wi takui̱ atumsha chichakrum ame támena nu nekas péṉkeraiti turutmiarme. Túrutkurmin nú aishmaṉkan neka tura péṉker esetar enentáimin átum anairamu arma nuna chikichnaka tiásnum chikichnaka seṉkuintianam chikichnaka siánnum tura chikichnaka mírnum atumín sumamtikniun anairan apujsarmajai. Núnisnak sumamtikin anairamun chicharainiakun ‘Yamaikia atumí yachi̱ tura írar atumji̱a̱i̱ pujuiniana nusha chichame̱ péṉker anturkarum itiurchatri̱ péṉker iwiarturtarum. Warí sumamtikiatniuka Yúsnachukait. Antsu chícham peṉké iwiarachminiaitkiui wíniaka itiartitiarum’ timiajai.

Mamikmaan Kanaannum Muisais akuprámu

19 1:19-21 Tura Urepnumia̱ jíintrar kampuntin atsú nuṉka uunt tura tsuumai̱ tépakna nuní̱ naṉkamakiar Amur aentsu nuṉké̱ naintiar naintra nuní̱ wéar Uunt Yus tiarmia núnisaraṉ Káatish Parníanam jeawarmiayi. Tura Muisais Israer shuaran chicharainiak ‘Iistarum Amur aentsu nuṉké̱ naintiar naintra nui̱ taarji. Tura ii úuntri̱n tiarmia núnisaṉ yamaikia ju̱ nuṉkan Uunt Yus ii Yusri̱ amaaji. Tuma asamtai sapijmiatsuk waya̱rum nuṉka nérentin ajasrum matsamsatarum’ tímiayi.

22 1:22-25 Takui̱ Israer shuar Muisaisan káutkar chicharainiak ‘Emka nu nuṉkan nekaawarat tura ¿tú jintianmaani̱ wéartatajⁱ? Núnisrik ¿tú peprunma jeawartatajⁱ? nunasha nekaawarat tusar aents eem akuprartai’ tiármiayi. Tuíniakui Muisais tuse weanmaya̱n chikichkiniak chikichkiniak anair nuṉkan nekáa chichaman itiarat tusa tuse áishmaṉkan akuprámiayi. Túram náintiaani̱ wéar Iskur ashintsanam jeawar nuṉkancha nekaawar araka nere̱ncha íisarat tusa ikiankarmiayi. Tura chichainiak ‘Uunt Yus nuṉkan amaajnia nuka tí peṉker núṉkaiti’ tiármiayi.

Israer shuar sapijmiakarma

26 1:26-33 Túrasha nui̱ waya̱tniun nakitrarmiayi. Antsu kajekar Uunt Yusa chichame̱ncha umirkacharmiayi. Tura chichainiak ‘Uunt Yuska iinkia muí̱jrama asa Ejiptunmaya̱ ji̱i̱rmar ii nemasri̱n surutmaktaj tusa ju̱i̱ṉkia ikiatmakuitji. Tuma asamtai yamaisha ¿urukatjik? Warí ii yachi̱ chichainiak “Ju̱ aentska ti untsurí tura íiji̱a̱i̱ṉkia naṉkaamas naya áiniawai. Tura ni pépruri̱sha ti uunt tura wenuke̱sha nayaimpin ántiaku áiniawai. Núnisaraṉ naya uunt aents Anaka aentsri̱sha nui̱ matsatainiawai” turamainiatsjik’ tiarmiayi. Tura nisha sapijmiainiakui Muisais Israer shuaran chicharainiak ‘Sapijmiakairap. Warí Uunt Yus atumji̱a̱i̱ eem wéana nu Ejiptunam atumsha íimprumni̱ṉ nuyá̱ aentsun itiurkarma núnisaṉ Ni mánitramkattaji. Tura kampuntin atsú nuṉkanmasha Uunt Yus wainkiamarme. Nuya̱sha aents ni uchirí̱n júana nútiksaṉ tímiaja̱i̱ itiarmárme. Túramaitiatrumek átumka Uunt Yuska ii Yusri̱nkia ¿ánturtsuram? Enta, ¿ya káshikia jiji̱a̱i̱ tura tsawai̱kia yuraṉmiji̱a̱i̱ tú jintianmaani̱ wétiniait tura tui̱ matsamkatniuit nunasha iniakmastajtsa eem we wemia?’ tímiayi.

Kampuntin atsunum Israer shuar asutiáwarma

34 1:34-40 Nuna Uunt Yus antuk ti kajek atumín chichartamainiak ‘Nekas ju̱ aentska yajauch ásar ju̱ nuṉkan atumín amastiniaitjiai. Ni úuntri̱n tiármiajna nui̱ṉkia peṉké waya̱chartatui. Antsu Jipuni uchirí̱ Karepak nekas Winia enentáimtursa asa niṉki ni uchirí̱ji̱a̱i̱ nu nuṉkanka wáinkiartatui’ takui̱ wi chichaakun ‘Átum tusakrumiṉ Uunt Yus winiasha kajertuk amesha nu nuṉkanmaṉka waya̱shtatme’ turutchamka. Antsu Nuuna uchirí̱ Jusuí atumín júramprumna nu nú nuṉkanmaṉka waya̱ttawai. Tuma asamtai nisha ikiaká̱rtarum. Warí Jusuí atumín nu nuṉkanam awa̱intiámawar nérentin ajasarat tusar suramsartatui. Núnisaṉ átum chichaakrum ‘Ii nemasri̱ ii uchirí̱n amukártatui’ tímiarumna nu uchin nú nuṉkan nérentin ajasarat tusa súsartatui. Tuma asamtai yamaikia átumka kampuntin atsunumaani̱ waketkitiarum túrarum Kapantin Nayantsa nuní̱ wetarum.

Úrmanam Israer shuaran nupetkarma

41 Nuya̱ṉka winiasha chichartakrum ‘Uunt Yusai̱ tunáa túraji. Tuma asamtai Uunt Yus ii Yusri̱ túramjinia núnisrik werir mániktai’ tímiarme. Nuya̱ṉka mash iwiarnakrum kaki emenmamkarum atumí naṉkiri̱ achikrum naintiar naintra nuní̱ wákatin yúpichu enentáimsamarme. 42 Túmakrumin Uunt Yus winia chichartak ‘Atumí nemasri̱ nupettamka̱i̱rum. Warí wikia yamaikia atumji̱a̱i̱ṉkia pujatsjai. Tuma asamtai wérap tura mánitcha mánikiairap’ tiartá.

43 1:43-46 Túrasha ujakármaitiat Yusa chichame̱nka ántutsuk wémarme. Túmainiakui nu nuṉkanam matsatainia Amur aents jíintiurar ete itiurawa nútiksaraṉ Sáirnumia̱ apapésaraṉ kajeṉkiar Úrmanam itiarmiayi. Túram kaunkarum Uunt Yus íimmianum útmiarme túrasha peṉké antukchamarme. Aya túmasrumek untsurí tsawant matsamsarme.”