Muisais Ujakma

Sáirnumaani̱ naṉkaamaktin jintintrarma

2 2:1-7 “Nuya̱ṉka kampuntin atsú nuṉkanam waketkiar Kapantin nayantsanmaani̱ wéarmiaji Uunt Yus timia núnisrik tura untsurí tsawant naintiar naintiar Sair nuṉka nui̱ wekasarmiaji. Tura Uunt Yus chichartak ‘Núkap tsawant ju̱ nuṉkanam yujasurme tuma asamtai yamaikia arakaani̱ wetarum. Atumí yachi̱ Esaú uchirí̱ Sáirnum matsatainia nuní̱ naṉkaamakrumin nu aentska atumniaka ashampramkattarme túrasha aneartarum. Mánaikiairap. Wikia ni nuṉke̱nka amaschattajrume. Warí Sair nuṉkanka Esaun súsaitjiai. Yurumkesha tura entsasha kuitji̱a̱i̱ sumaktatrume. Kame Uunt Yuska ashí átum túramunka yaintmakchakaitrum. Núnisaṉ atsunum wekasamurmincha nékawai. Ju̱ kuaraintia uwí naṉkaamasainia ju̱i̱sha Uunt Yus atumí Yusri̱ṉkia atumji̱a̱i̱ pujusuiti túrasha wariṉkish tátramsachuitrume’ túramprume.

Muápnumaani̱ naṉkaamaktin jintintrarma

8 2:8-13 Tura Sáirnumia̱ṉka ni yachi̱ Esaú uchirí̱ pujuinia ásarmatai nákak naṉkaamarar atsú nuṉka Muap tutainmaani̱ wéarmaji. Tura nui̱ Uunt Yus chichartak ‘Átumka Muap aentska itiurchat awajírap tura mánitcha mánikiairap. Warí Ar nuṉkanka Raut aentsun súsacharukaitiaj. Tuma asan ni nuṉke̱nka atumniaka peṉké amaschattajrume.’ (Imiit aents nu nuṉkanmaṉka matsamin ármiayi. Nu aents ti untsurí ármiayi. Núnisaraṉ Anak aentsu núnin ti naya tura ti uunt aents ármiayi. Tura Jur aentssha Sáirnumka matsamin ármiayi. Túrasha Esaú shuar ji̱i̱r akuprar ni matsamkarmiayi. Nui̱ṉkia Israer shuar Uunt Yus súsarmia nu nuṉkanmaya̱ aentsun túrawarmiania núnisaṉ nu aentssha túrawarmiayi.) ‘Tuma asamtai yamaikia Sereet ashints katitratarum’ turamarmiaji Uunt Yus.

14 2:14-15 Jú̱nisar Sereet ashintsaka katitramiaji. Tura Káatish Parníanmaya̱ Sereet ashints katitmaamka traintiúchu uwí yujasarmiaji. Tuma túmainiai̱ aents mesetan unuimiátka armia nuka Uunt Yus timia tímiatrusaṉ ashí amuukarmiayi.

Amuna nuṉke̱ni̱ naṉkaamaktinian Yus ujakárma

16 Nuyá̱ aents mesetan unuimiátkaru armia nu mash amuukarmatai 17 Uunt Yus chichartak 18 ‘Yamaik Muap aentsu nuṉke̱n naṉkaamakim Ar péprunmaani̱ wétatme. 19 Túrasha nui̱ Amun aentsja̱i̱ wainniaiyakrumsha itit awajsairap. Tura ni nuṉké̱ ata̱i̱r nérentin ajastai tusarmesha mániawairap. Warí nu nuṉkanka Rauta shuari̱n nui̱ matsamsatniun súsaruitjiai. Tuma asamtai ni nuṉke̱nka amaschamniaitjiarme’ tímiayi.

20 Tura jú̱ nuṉkaka Repa aentsu nuṉké̱ tutaiyayi. Kame yáunchukka nu nuṉkanmaṉka Repa aents matsamin ármiayi. Túrasha Amun aentska núnaka Sumsum aents tiniu ármiayi. 21 Nu aentska uunt pepru ti untsuríyayi. Tuma ásar Anak aentsua timianú naya ármiayi. Túrasha Uunt Yus nú aentsnaka Amun aents iimiainiamunam amukármiayi. Túramtai ni akintrukar matsamsarmiayi. 22 Nuja̱i̱ métek Esaú aentssha Sáirnum matsamin armia nusha Jur aents armia nuna mash amukar nuṉké̱ akintrukar yamaisha tuke nui̱ṉ matsatainiawai. 23 Núnisaraṉ Jiristíu aentssha Kapturnumia̱ jíintrarmia nusha Ap aents matsatainian amukiár Kaasa tímianai jeawarmiayi. Túrawar akinkiar nui̱ṉ matsamsarmiayi.

24 Tura Uunt Yussha atak chichartak ‘Pai, yamaikia wetarum tura Arnun entsa katitkirum pakarí̱ naṉkaikirum Amur aentsu nuṉke̱n waya̱taj tusarum meset najanatarum. Ishpun pepru úunt akupniuri̱ Sejunja̱i̱ meset najanawakrumin ni nuṉké̱ átum nérentin ajastinian tsaṉkatkattajrume. 25 Tura yamaiya̱ ju̱yá̱ juárkimiutak ashí nuṉkanmaya̱ aents atumín ashampramin awajsartatjai. Atumí naari̱ páchinian antukarka sapijmiainiak wáitin ártatui’ turutmiai Uunt Yus” tímiayi Muisais.

Israer shuar Sejunan nupetkarma

26 Muisais chichaak “Kame kampuntin atsú Katimiút nuṉkanam pujusan Ishpuna úunt akupniuri̱ Sejunan mesetnaka najanashtatjai tusan winia áentsruja̱i̱ chichaman akuptakun 27 ‘Wi atumí nuṉke̱n waya̱n menaṉki̱ wétsuk nákak naṉkaamaktin tsaṉkatrukta. 28 Tura wi yurumátniuncha umartinniasha kuítji̱a̱i̱ṉ sumaktatjai. Antsu aya naṉkaamaktin tsaṉkatrukta. 29 Warí Jurtan entsa katitkin Yus nuṉkan amastinia nui̱ jeatniun Esaú aentssha Sair nuṉkanam pujuinia nu tura Muap aents Ar nuṉkanam pujuinia nusha naṉkaamaktinian tsaṉkatrukarmai tawai titiarum’ tu akatmampramjai. 30 Túrasha Ishpunnumia̱ úunt akupniuri̱ Sejun ni nuṉke̱ni̱ naṉkaamaktinian tsaṉkamkachmai. Warí jú̱ nuṉkaka atumnia atí tusa atumí Uunt Yusri̱ Sejuna enentái̱n ikiatsuátar peṉké nakitmamtikramai. Iisiana, yamaiya̱ ju̱i̱kia jú̱ nuṉkaka nekas atumniachukait. 31 Nuya̱ṉka Uunt Yus winia chichartak ‘Iisiana, Sejunan tura ni nuṉke̱n amastinian juarjai. Yamaikia ni nuṉké̱ waya̱rum nérentin ajastin juárkitiarum’ turutmiai.

32 Nuya̱ṉka úunt akupin Sejun ashí ni suntari̱n yaruak mesetan iṉkiutuktai tusar Jajasa péprunam káunkarmai. 33 Túrasha ii Uunt Yusri̱ nin nupetkatniun tsaṉkatramkakrin nisha tura uchirí̱sha nuyá̱ ashí ni shuari̱sha amukármaji. 34 Núnisaṉ ashí ni pépruri̱ iruniarmia nuka ii akintrukar mash emestukmaji. Tura aents nui̱ pujuarmia nusha áishmaṉsha nuwa̱sha uchisha maar chikichkisha iwiaaku apujkicharmaji. 35 Túrar ashí nuṉka nupetkar aya ni warirí̱ armia nuke kuítri̱sha tura waakari̱sha yarurkarmaji. 36 Tura uunt pepru Aruir Arnun entsa pakarí̱n ayaam nainnium matsamárma nusha núnisaṉ Karaat péprunam pujuarmia nusha iiji̱a̱i̱ mániatniunka peṉké jeacharmai. Uunt Yus ii Yusri̱ awakmáktinian tsaṉkatramkamji. 37 Antsu aya Amun aentsu nuṉke̱n ashí Japuk entsa pakarí̱n matsamárma nuke, núnisaṉ nainnium matsamárma nunasha Uunt Yus ii Yusri̱ tsaṉkatramkachu asakrin pachischamji.