Muisais Ujakma
Mesetnum túratin
20 Atumí nemasri̱ji̱a̱i̱ mániktaj tusa wéakrum atumji̱a̱i̱ṉkia naṉkaamas suntarsha kawaisha nuyá̱ kárusha ti untsurí wáinkiurmesha ashamkairap. Warí Uunt Yus atumí Yusri̱ Ejiptunmaya̱ ji̱i̱rmarmiarmena nú Yus atumji̱a̱i̱ṉkia pujawai. 2 Tura meset juárkittsa ajakrumin Yúsnan pujurin eem wajas ikiakátmak 3 chichaak ‘Israer shuartiram antuktarum. Yamái atumí nemasri̱ji̱a̱i̱ mánaiktatrume. Túramkurminkia sapijmiatsuk kakaram ajastarum. Ashamkairap tura atumí nemasri̱ wáinkiurmesha sapijmiakrum imiaankirum mayai̱m ashinkiamnia nekaprairap. 4 Warí átumka mániatsrumni̱ṉ atumí Yusri̱ Uunt Yus atumí nemasri̱ji̱a̱i̱ṉkia mánaiktajtsa atumji̱a̱i̱ pujawai tuma asa nupetmamtikramkattarme’ títiatui.
5 20:5-9 Nuya̱ṉka suntara uuntri̱ aentsun chicharainiak ‘Yamá je̱a̱n je̱a̱mak nui̱ pujuschasha tura uwa ajan ajamkayat nuya̱ṉ umarchasha núnisaṉ yamái nuatkayat nuwe̱ja̱i̱ kanarchasha ni je̱e̱n waketkiar nuna túrawarti. Warí aneachma mesetnum wekas jakamtai chíkich aents ni túrachman túrawara̱i̱ṉ tusa waketkiarti. Tura aents sápij ákuṉka chíkich aentsnasha sapijmiamtiki̱a̱i̱j tusar waketkiarti’ tiártiniaiti. Tura nuna tinia umikiar suntara úuntri̱n anairartiniaiti.
10 20:10-18 Tura aents péprunam matsatáiniaja̱i̱ mánaiktajtsam jearumka ‘nawamnaikiatai’ títiniaitrume. Nuna ayu tuíniak wáitiri̱n uratramiakrumni̱ṉkia nuyá̱ aentska atumí takartámin ajasártatui. Antsu nuna nakitiáiniakuiṉkia mánaiktarum. Tura Uunt Yus atumín íkturmasakrumni̱ṉkia áishmaṉ ainia nuka puya̱ja̱i̱ ashí kajeṉtarum. Túrasha núwa̱ka uchisha tura taṉku áiniana nuka máwairap. Núnisrumek péprunam wariṉkísh írunea nuka yaruaktiniaitrume tura nuya̱ja̱i̱ṉ yurumtasha yurumátniuitrume. Ashí pepru atumí nuṉke̱ya̱ yajá pujuinia núja̱i̱ṉkia jú̱tiksarum túratniuitrume. Antsu Uunt Yus nuṉkan amasáruitrumna nui̱ waya̱rum ashí aents máarum chikichkisha iwiaakuka ikiukchatniuitrume. Kame Uunt Yus tiniua tímiatrusrumek ashí amuktiniaitrume. Nu túrarmeka nu nuṉkanmaya̱ aents mui̱jmiai̱ túrin ainia nuka atumsha utsumákchattarme.
19 20:19-20 Tura péprunam untsurí tsawant matsamtúkrum pujurkurmesha númikia ajakairap, warí nuna neré̱ yuámniaitrume. Kame numisha aentsuk ainia atumí kajertámiartinia. Antsu numí nere̱ yúchataiṉkiuiṉkia nu pepru nupetkatai tusarum wariṉkísh nájaneakrumka nuka páchitsuk ajaktarum. Uunt Yus tiniu asamtai Muisais Israer shuaran tú ujakármiayi.