Muisais Ujakma
Uwemtai̱ pepru armia nu
19 19:1-13 Núnisaṉ ju̱ nuṉka amastiniaitjiarme Uunt Yus turamiarum nú nuṉkanam matsamkarum nérentin ajasrumka menaintiú pepru akankarum jinti̱sha iwiartuktarum. Núnisrumek nuṉke̱sha nakararum menaint awajtústarum. Kame aents aya aneachma maṉkartuaṉka nu péprunam uwemprarti. Núnisrumek Uunt Yus timia núnisaṉ nupetmaki̱ wéakrum atumí nuṉke̱sha ti uunt ajasmataiṉkia ataksha núnismek menaintiú pepru akankatarum. Kame aents mantamnachminiaitiat Yus susamu nuṉkanam ántar mantamnashti tusa túratniuitrume. Antsu aents túkeneas maṉkartua nui̱ u̱mkamtaikia pepru uuntri̱ ainia nu ji̱i̱ktiarum tuíniakuiṉkia jí̱i̱krum waitnentsuk mátarum. Nuja̱i̱ ántar maṉkartuan ayampruiniana nu Israeran makuchartatui.
Nuṉka tesarnáiyamu arantúktin
14 Tura Uunt Yus nuṉkan amastatrumna nui̱ pujusrumsha atumí uuntri̱ nuṉkan tesawarmatai nu ukunmasha atumí shuari̱ eṉkemtutsuk tuke tesamua nuka arantúktiniaitrume.
Wáitrin sumamtikiatin chicham
15 Kame chikichik aentsuk umitmakun nekas wi wainkiajai tákui̱ṉkia pachischatniuitrume. Antsu jímiarkesha núja̱i̱nchuka menaintiú aents chikichkimsar ‘wisha nekas wainkiamjai’ tuíniakui asutiátniuitrume.* 16 Tura sumamtikniunam chíkich aentsun ántar tsanumprak ‘wi umitmakun wainkiajai’ tau asa 17 nisha tura tsanumprurmasha Uunt Yus íimmianum tura Yúsnan pujurin núnisaṉ sumamtikin nu tsawant pujuartatna nui̱ iwiaratai tusar mai̱ wéartin áiniawai. 18 Nuyá̱ sumamtikin pujuinia nui̱ untsunáikiainia nuna apatkar émamkes péṉker nekáa untsumka nu chichaman péṉker ejekachmatai̱ṉkia 19 waitruá yachi̱n tí waitkiastajtsa enentáimtimia tímiatrusaṉ asutniáttawai. Nuja̱i̱ átum yajauch túramu arantúku tusa túrunattawai. 20 Nuní̱ túruiniamun antukar chikitcha ashamkar nuiṉkia yajauch túratniun arantúkartatui. 21 Antsu tunamkaka peṉké waitnentrairap. Shuar maṉkartua nuka mantamnati. Núnisaṉ aents chikicha ji̱n apujtúkmataiṉkia nisha ji̱n apujtúnkati. Tura nai̱n akarkámtaisha nisha nai̱n akarnakti. Núnisaṉ aents chikicha uwejé̱n tsupirkamtaiṉkia nisha uwejé̱n tsupirnakti tura nawe̱n tsupirkamtaisha nisha nawe̱n tsupirnakti.*