Muisais Ujakma

Chíkich péṉker enentáimtustin

22 Atumí yachí̱ waakarí̱ṉsha murikrí̱ṉsha meṉkaka wáitkiarmeka ú̱rtsuk jukirum awaṉtuktiarum. 2 Tura atumí yachi̱ tíjiu̱ch pujachkuiṉkia núnisrumek yana taṉkurímpiait nusha nékachkurmeka jiṉkiarum awajtústarum. Tura nérentin e̱a̱ki̱ támatai awaṉtuktiarum. 3 Núnisaṉ ni umpururi̱sha tura pushiri̱ṉsha nuyá̱ warirí̱ṉkisha atumí yachi̱ emeṉkákma wainkiarmeka niniu asamtai nékachua ántsam ikiutsuk antsu wárik nérentin awaṉtuktia. 4 Núnisaṉ ame yatsumi taṉkuri̱ waakari̱ṉsha jintia iniant tepá wainkiarmeka íisrumek ikiutsuk iniantkitiarum.

5 Núwa̱ka áishmaṉka núnis iwiarmamprashtiniaiti. Tura áishmaṉsha nuwa̱ núnis iwiarmamprashtiniaiti. Yaaksha nuna túrakka Úunt Yusja̱i̱ṉkia mui̱jmiainiaiti. 6 Jintiá wesarum numinmaṉsha núja̱i̱ṉchuka nuṉkaṉsha chiṉki teketá awantu túrutskesha takiṉ eṉketu wainkiarmesha nukurtiuk júkishtiniaitrume. 7 Antsu nukurí̱ṉkia awemakrum aya uchirí̱ṉ jurumkitiarum. Túrakrumka péṉker pujakrum núkap tsawant iwiaaku pujustatrume. 8 Kame yaaksha yaki̱ya̱ iniáa jakamtai makuni̱j takumka je̱a̱ yama je̱a̱mkumka je̱á̱ tuntupe̱ pakarí̱n wénuitia. 9 Atumí ajarí̱n uwa arakrum chíkich arakja̱i̱ pachimprarum arakairap. Túrakrumka araksha mesekmatai nere̱sha peṉké júukchattarme. 10 Tura umpuru waakaja̱i̱ nuṉká pukuit tusarum apatkarum takamtiksairap. 11 Núnisaṉ murikiu uré̱ ríniuja̱i̱ eteṉkra najanamu entsarairap. 12 Pushí takamtsuk entsarearmena nu kuatru tsakari̱n sasariartarum.

Tsanirma asutiátin akupkámu

13 Núnisaṉ áishmaṉ nuwa̱ nuatak pujayat nakitiar 14 ántuiniamunam yajauch natsanmai̱ chicharuk ‘Ju̱ nuwa̱n nuatkan niji̱a̱i̱ tsaniṉmaj nui̱ takamchachua nuna nekaamjai’ tákui̱ṉkia 15 aparí̱ nukurí̱ji̱a̱i̱ nawantri̱n áishmaṉ nekas peṉké túrushtainti tusa chichama iwiarin pujuinia nui̱ júkiartiniaiti. 16 Tura uuntri̱ pujuinia nui̱ nuwá̱ aparí̱ chicharuk ‘Nuatkat tusan ju̱ áishmaṉkan nawantrun susamjai. Túramaitiat yamaikia nakitiak 17 natsanmai̱ jú̱nis chichartak “Antsu nawantrumin ¿peṉké takamchanak wainkiamaj?” túrutui. Túrasha nui̱kia nawantruka ¿nekas peṉké takamchachuka? ¡Wats ju̱á iisiá!’ tinia uuntri̱ iruntrar pujuiniamunam tarachin ayapá̱r aepsattawai. 18 Túramtai nú aishmaṉkan pepru uuntri̱ achikiar asutiáwartatui. 19 Warí Israernumia̱ nuwa̱n yajauch chicharak iniatsá̱ru asamtai nú aishmaṉkan sian kuit akikmakta tiar nuwá̱ aparí̱n súsartatui. Nu túramka iwiaaku pujuttana nuiṉkia nú nuwa̱nak ajaptsuk tuke aya̱statui.

20 Antsu nu nuwa̱n áishmaṉja̱i̱ nekas pujun nekaawarka 21 ni aparí̱ je̱e̱ya̱ a̱a̱ jí̱i̱kiar péprunmaya̱ aents kayaja̱i̱ tukurar máwartatui. Warí Israernum yajauchin túraiti. Áintsaṉ aparí̱ je̱e̱n tsanirma asamtai túrawartatui. Nu túrakrum atumíin tunáa pampartaj tau wárik asakáittiarme.

22 Núnisaṉ áishmaṉ nuwa̱ nuatkamuja̱i̱ tsaniṉ tepá achintkiámtaiṉkia mai̱ mátniuitrume. Nu túrakrumni̱ṉkia Israer shuarnum tunáa pampaṉki̱ wéchattawai.

23 Tura péprunam nuwa̱ natsach áishmaṉ túrushtai̱ anajmarman chíkich áishmaṉ wainiak niji̱a̱i̱ tsanirmamtaikia 24 nu pepru wá̱i̱ti̱a̱i̱ri̱n a̱a̱ jí̱i̱krum kayaja̱i̱ tukurá mai̱ mátniuitrume. Warí núwa̱ka untsumkachu asa núnisaṉ áishmaṉsha chíkich áishmaṉ nuatkataj táman yajauch awajsa asa nuka túrunatniuiti. Nu túrakrum atumíin yajauch túrutairam ti pampartaj tau wárik asakáittiarme.

25 Tura aents atsamunam chíkich áishmaṉ anajmarman níchiniak iṉkiuṉ kakarmaja̱i̱ achik tsanirmamtaiṉkia aya áishmaṉ umitmakua nuke mantamnati. 26 Antsu núwa̱ka itiurnakchati. Warí niṉkia itiurchatan túrachu asa mantamnachminiaiti. Ju̱ka áishmaṉ ni shuari̱ji̱a̱i̱ jímiarchik iṉkiunaik maṉkartua núnischakait. 27 Warí untsumkuisha anturkachminnium níchiniak iṉkiuṉ áishmaṉchak nuwa̱n yajauch awajsa. 28 Kame áishmaṉ nuwa̱ natsachin áishmaṉ túrushtai̱n anajmarchamun tsanirma nekanaṉka 29 tsanirma nú aishmaṉ nuwá̱ aparí̱n seṉkuintia kuítian akiktiniaiti tura nu nuwa̱ yajauch awajsa asa niṉki nuatak ajaptsuk iwiaaku pujutta nui̱ṉkia tuke aya̱stiniaiti.

30 Yaaksha ni aparí̱ kanutairi̱nkia íirsashtiniaiti. Tuma asa ni aparí̱ nuwe̱ja̱i̱ṉkia tsanirmashtiniaiti.