Muisais Ujakma
Uunt Yusa Je̱e̱n waya̱chmin armia nu
23 23:1-8 Aents sukiniam warinkish urukaitkiuṉka núja̱i̱nchuka pampatai̱ri̱ takamtsuk tsupirkamusha Uunt Yusa Je̱e̱nkia waya̱shtiniaiti. Núnisaṉ yajauch aents áiniana nusha nuna tiraṉki̱ nuyá̱ tiraṉki̱sha tias ejemam waya̱shtin áiniawai. Antsu Amun aentska tura Muap aentssha nuna tiraṉki̱sha nuyá̱ tiraṉki̱sha tias wea naṉkaamassha peṉké waya̱shtin áiniawai Uunt Yusa Je̱e̱nkia. Warí átum Ejiptunmaya̱ jiinkí̱ winiarmincha apatkuncha tura umartinniasha amatsuk Piura uchirí̱ Paraaman Israer shuar yajauchiniam yumiṉkrutrarta tusa akikiu asa Uunt Yusa Je̱e̱nkia waya̱shtiniaiti. Tura Etum aentska ame yátsum asamtai tura Ejiptunmaya̱ aentssha ni nuṉke̱n pujusu asarum yajauchikia enentáimtuschatniuitrume. Antsu nu shuara tiraṉki̱ya̱ nuyá̱ tiraṉki̱ nuyá̱ nuna tiraṉki̱nkia Uunt Yusa Je̱e̱nkia waya̱wartatui.
Matsamkamunam péṉker wáinmamkatin
9 23:9-11 Núnisaṉ mesetnum wéakrumka yajauchikia túrawairap. Tura yaaksha mui̱jmiai̱ ajasúka matsamkamunmaya̱ṉka jiinkí̱ kí̱akui̱ nijiamar nantu akaikímtai matsamkamunmaṉka tátiniaiti.
12 Kame ijiatmatai̱ṉkia matsamkamunmaya̱ arant átiniaiti. 13 Núnisrumek numi atsakamu atumí emenmamkari̱n atearum júkitniuitrume. Tura nu numiji̱a̱i̱ wa̱a̱ taura ijiatmarum nuṉkaja̱i̱ yutuurum ikiú wetarum. 14 Ti nekas atumí Uunt Yusri̱ atumí nemasri̱ nupetkatniun tsaṉkatramak ayamprutmaktaj tusa wekaawai. Tuma asamtai atumí matsamkamuri̱nkia imiatkincha átiniaiti. Nuíchuka átum pujamunmaya̱n mui̱jmiainian wainiak atumín ikiurmákirum.
15 Takarin ni úuntri̱ya̱ pisar atumín támataiṉkia awaṉtukirap. 16 Antsu atumji̱a̱i̱ tui̱ pujustinnia wakera úunt peprunmash kame itit awajkartutsuk péṉker pujusti.
17 Núnisaṉ Israer shuarnumka tsanirmatai nuwa̱sha tura tsanirmatai áishmaṉsha najankamu yus ainia nu shiir awajénaji tusar pujurin ácharti. 18 Tura warinkísha anajmatas ju̱ja̱i̱ umiktajai tusa atumí Uunt Yusri̱ Je̱e̱nkia nuwa̱ksha tura áishmaṉkesha tsanirmar kuit achikman itiacharti. Warí atumí Úunt Yusri̱ji̱a̱i̱ṉkia nuka mái̱ mui̱jmiainti.
Kuit pátasmek awaṉturkitia títin
19 Atumí yachi̱ kuit ikiasma awaṉturmakuisha patakam surusta tiirap. Núnisaṉ yurumkanmasha tura wariṉkísh chíkich ainia núja̱i̱sha patakam awaṉturkitia tiirap. 20 Kame yajaya̱ aents ainia nuka kuit pátasmek awaṉturkitia tíminiaitrume. Antsu atumí yachi̱ṉkia ataksha patakam surusta tiirap. Warí nu túrakminkia átum waya̱rum nuṉka nérentin ajasrum takakmasrum pujustatrumna nui̱ atumí Uunt Yusri̱ péṉker pujutnum yumiṉkramprattarme.
Ju̱na nekas túrattajai ii Yusri̱ tákur umiktin
21 Tura jú̱naka nekas yapaji̱áshtatjai atumí Uunt Yusri̱ tíniuitkiurmeka wárik umiktiniaitrume. Túrachkurmeka tunáa tura asakrumin ti nekas atumí Uunt Yusri̱ asutiámattarme. 22 Tura amastájai tíchaitkiurmeka átumka tunaaka túratsrume. 23 Atumí Uunt Yusri̱ atumí wene̱ja̱i̱ṉ chichaakrum ju̱ka ántrar amastatji tíniuitkiurmeka átum tímiarmena ímiatrusrumek umiktarum. 24 Kame atumí írutramuri̱ uwa ajarí̱n waya̱krumka atumí wakeramuri̱ yúakrum nútsurtaj tusarum waya̱ttarme. Túrasha chaṉkintruminkia juuka eṉkea júkishtatrume. 25 Chíkich shuara ajarí̱n waya̱rmesha aya uwejmíji̱a̱i̱ṉ trikiu nére̱ṉka akartarum túrasha machitji̱a̱i̱ṉkia tsupirairap.*