Muisais Ujakma
Israer ené enentáimiá ajasmatai waitnentramu
30 Atumín ashí yajauch yumiṉkian tura péṉker yumiṉnasha atumín tájarmena nu jeartámkui Uunt Yus ashí yajá nuṉkanam tsakiṉmakma matsamsarum wi tájarmena nui̱ enentáimsattarme. 2 Tura átum núnisaṉ atumí uchirí̱ji̱a̱i̱ atumí Uunt Yusri̱ atak waketrukrum wi yamái tájarmena ju̱ja̱i̱ métek atumí nekas enentái̱ji̱a̱i̱ tura wakaní̱ji̱a̱i̱sha nekas umireakrumni̱ṉkia, 3 nui̱ṉkia atumí Uunt Yusri̱ ji̱i̱r ashí yajá nuṉkanam akuptámprarmia nuyá̱ waitnentramprar ataksha awaiṉki̱ ikiatmaktatrume. 4 Kame atumsha imiá yajá nuṉkanam akuprámu matsatrumin ímianianak atumí Uunt Yusri̱ irutmar juramkittiarme. 5 Tura yaunchu atumí uuntri̱ pujú armia nu nuṉkanmaṉ awaiṉki̱ apujtamsattarme. Nui̱ Nisha ashí túrittiarmena nunasha péṉker awajtúrmas nuyá̱ atumí úuntri̱ji̱a̱i̱sha naṉkaamas pampaṉtinian tsaṉkatramkattarme. 6 Tura atumí nekas enentái̱ji̱a̱i̱ tura takamtsuk wakaní̱ji̱a̱i̱ Winia anentakrum iwiaaku pujusmíntrum tusa aya̱shnium tsupirnaktinia núnis Uunt Yus atumín tura atumí uchirí̱ enentái̱ncha yapajtiúrmattarme. 7 Nuna túrutma Uunt Yus atumí Yusri̱ ashí wi tímiajrumna nu yajauch yumiṉkian atumí nemasri̱ kajertamainiak apapétmakmarumna núnaka akuptúkartatui. 8 Túrasha átumka Uunt Yus atumí Yusri̱ chichame̱ ataksha anturkarum ashí ni akupkámu chichaman wi yamái ujajrumna nu umirkattarme. 9 Nui̱ṉkia Uunt Yus atumí uchirí̱ncha tura waakari̱ncha núkap pampaṉtinian tura atumí nuṉke̱n arakmamusha núkap juurmaktinian tura ashí takatrumniasha tí nukap awajtúrmastatrume. Tura yaunchu atumí we̱a̱trí̱n wararsamia núnisaṉ atumniasha warartamsattarme. 10 Kame Uunt Yus atumí Yusri̱ akupkámu umiktin chicham ju̱ papinium aarma ana nu antukrum atumí nekas enentái̱ji̱a̱i̱ tura takamtsuk wakaní̱ji̱a̱i̱ umíakrumni̱ṉkia atumniasha warartamsattarme.
11 Tura ti nekas tájarme, ju̱ akupkámu chichaman yamái wi tájarmena ju̱sha átum nekaatniuka tikia itiurchatchaiti tura yajá ikiuschamu asa wáinkiachminchaiti. 12 Ju̱ akupkámu chichamsha nayaimpinmaṉka pujatsui. Tuma asamtai nu chicham antukar umiktinian ¿yaki nayaimpiniam waka tara ujatmáktaji? tíchamniaitrume. 13 Núnisaṉ nayants amaini̱ṉkia pujatsui. Tuma asamtai nu chicham antukar umiktinian ¿yaki nayantsanam katiṉkí̱ taa ujatmáktaji? tíchamniaitrume. 14 Antsu ju̱ chichamka ju̱i̱ṉ wenumini̱ṉ tura enentáimini̱ṉ umiki̱á̱i̱ tusa tíjiu̱ch pujurtamui.
15 Ju̱sha antuktarum. Jimiará túrunatniun ujajrume, iwiaaku péṉker pujustinian tura yajauch túrakur jákatniun. 16 Wi yamái tájarmena nuja̱i̱ métek Uunt Yus aneatarum Ni akupkámuri̱sha umíakrum péṉker wekasatarum. Núja̱i̱ṉkia iwiaaku pujusrum núkap pampartatrume. Tura átum nuṉka pujursattarmena nui̱sha atumí Uunt Yusri̱ ti shiir atí tusa yaintmaktatrume. 17 Túrasha wi tájarmena nu anturtutsuk atumí wakeramuri̱ nupettamkakrumin kanakrum najanamu yus tikishmáteakrumka, 18 átum jákatniun yamái paant ujajrume. Nu péṉker nuṉkanmaṉka núkap uwí pujuschattarme. Jurtan entsa katitkirum nú nuṉkanmaya̱ aents nupetkarum núṉkentin ajasiatrumek núkap tsawant pujuschattarme. 19 Tura nayaimpinmaya̱sha nuṉkaya̱sha mash nekas iimiainiamunam tájarme átum túa wakerarum nu e̱a̱ktarum, iwiaaku pujustiniak antsu jákatniuk, Yusa yajauch yumiṉkiartutai̱ri̱n nuíchuka aneṉkrattairi̱n. Nu atumsha tura atumí tiraṉki̱sha shiir pujusármí tusarum iwiaaku pujustin e̱a̱ktarum. 20 Núnisaṉ atumí Uunt Yusri̱ aneatarum tura ni chichame̱sha anturkarum yawe̱tsuk enentáimtustarum. Warí Niṉkia atumí iwiaakmari̱nti. Tuma asamtai nu túrakrumka péṉker nuṉkanam núkap uwí pujustatrume. Warí yáunchuk atumí úuntri̱n Aprajáman ni uchirí̱ Isakan núnisaṉ ni tiraṉki̱n Jakupun chicharainiak ‘Ju̱ nuṉkanka atumín amastiniaitjiarme’ tíchamkia” Muisais tímiayi.